Basketball: Ihatana ridasanzwe nyuma y’ubufatanye na Banki ya Kigali

Yanditswe na Eric Tony Ukurikiyimfura
Kuya 21 Werurwe 2019 saa 06:11
Yasuwe :
0 0

Ishyirahamwe ry’umukino wa Basketball mu Rwanda, FERWABA, ryishimira ko urwego rwa shampiyona y’uyu mukino n’ubwitabire bw’abafana ku bibuga byazamutse ku rwego rwo hejuru nyuma y’aho batangiye gukorana n’umuterankunga mukuru, Banki ya Kigali.

Banki ya Kigali itera inkunga amarushanwa ane ya FERWABA arimo shampiyona guhera muri uyu mwaka w’imikino 2018/19. Mu masezerano yashyizweho umukono n’impande zombi mu mpera z’Ugushyingo 2018, BK yashoye miliyoni 300 muri Basketball y’u Rwanda mu gihe cy’imyaka itatu.

Amafaranga yatanzwe n’uyu muterankunga, afasha mu gutegura amarushanwa y’abato batarengeje imyaka 18, abahungu n’abakobwa, irushanwa ribanziriza shampiyona, shampiyona “BK Basketball National League” ndetse n’irushanwa rihuza amakipe yabaye ane ya mbere muri shampiyona rizwi nka “Playoffs”.

Mu kiganiro yagiranye na IGIHE, Perezida w’ishyirahamwe ry’Umukino wa Basketball mu Rwanda; Mugwiza Désiré, yadutangarije ko gukorana na BK byatumye urwego rwa shampiyona ruzamuka ndetse n’abakunzi b’uyu mukino bakomeza kwitabira ku bibuga ku rwego rushimishije,

Ati” iyo urebye urwego shampiyona yacu igezeho, uburyo shampiyona yacu ikunzwe n’abafana, iri ku rwego rushimishije ariko turifuza ko byarushaho cyane cyane ko n’ikibuga dukiniraho bimaze kugaragara ko ari gito, cyane ko Guverinoma y’u Rwanda iri gushak uburyo twabona ikibuga gihuje n’igihe tugezemo.”

“Kuva rero Bank ya Kigali yaza, hari byinshi bigaragara ku kibuga, hari byinshi bigagaraza ko harimo guhangana, harimo ishyaka cyane cyane kubera ibihembo ndetse n’uburyo Bank ya Kigali yamamazamo imikino yacu nabyo biri mu bituma abakunzi ba Basketball baza bishimye, atari n’umukino wa Basketball uhari gusa ahubwo n’ibindi bikorwa bijyanye na wo.”

Uyu muyobozi yavuze ko kandi byongereye ishyaka mu makipe no mu bakinnyi dore ko amakipe abiri ya mbere muri shampiyona mu byiciro byombi azajya ahembwa ndetse n’abakinnyi batanu bitwaye neza muri buri cyiciro bagashimirwa.

Binyuze muri ubu bufatanye, buri kipe izitabira shampiyona na Playoffs, mu bagabo n’abagore, ihabwa agera kuri miliyoni 2 z’amafaranga y’u Rwanda abafasha mu ngendo n’ibindi bitandukanye.

Ikindi ni uko, amakipe abiri ya mbere mu bagabo n’abagore azaba yatsindiye guhagararira igihugu mu mikino y’Akarere ka 5 “Zone V” azajya ahabwa miliyoni 2 n’ibihumbi 500 ndetse akazajya yamamaza uyu muterankunga ‘BK’.

Ku bakinnyi 10 bitwaye neza (5 mu bagore na 5 mu bagabo) buri mukinnyi azajya ahabwa miliyoni imwe y’amafaranga y’u Rwanda ndetse bazajya basinya amasezerano yo kuba abambasaderi ba BK mu gihe cy’umwaka umwe.

Mugwiza Désiré yasabye abakunzi ba Basketball gukomeza gushyigikira uyu mukino kuko ari ugushyigikira abana b’u Rwanda.

Ati” Nashimira abafatanyabikorwa bacu, nkashimira amakipe k’ubwitange cyane ko kugira ikipe atari ibintu byoroshye, noneho igikomeye cyane ni uburyo abakunzi ba Basketball bakomeje kongera uburyo badufasha mu bitekerezo ndetse n’ubwitabire ku bibuga, ni inkunga ikomeye ndetse mbasaba ko bakomeza kwiyongera kuko ni ugufasha abana b’abanyarwanda, ni ugufasha u Rwanda rw’ejo. “

Ngwijuruvugo Patrick, umutoza w’ikipe ya REG BBC yabwiye IGIHE ko kuba Shampiyona yarongerwemo ubushobozi, abakinnyi bajya gukina bafite buri kimwe, byongereye guhangana hagati y’amakipe.

Ati” Shampiyona y’uyu mwaka urabona ko ikomeye kuko hiyongeyemo ubushobozi, umukinnyi aba afite buri kimwe, afite urukweto ntacyo abuze. Buri kipe ubona ko ikomeye, buri wese arahangana kandi arashaka kuza imbere.”

Nka Banki ya Mbere mu Rwanda, BK ikomeje kwegereza abakiliya bayo serivisi itanga, aho bakoresheje nka telefoni zisanzwe, bashobora gukanda *334# bakabona inguzanyo yihuse ishobora kugera ku 500,000 Frw.

BK Basketball National League izasubukurwa mu mpera z’iki cyumweru hakinwa imikino yo kwishyura guhera kuri uyu wa Gatanu.

Saa 18:00 Patriots BBC yasoje imikino ibanza iyoboye n’amanota 16, izakina na IPRC-Kigali BBC mu gihe umukino uzakurikiraho guhera saa Mbiri z’umugoroba (20:00) uzahuza REG BBC na APR BBC.

Gahunda y’imikino iteganyijwe mu mpera z’icyumweru

Kuwa Gatanu tariki ya 22 Werurwe 2019

PATRIOTS vs RP-IPRC KIGALI BBC (Stade Amahoro, 18:00)

APR BBC vs REG BBC (Stade Amahoro; 20:00)

Kuwa Gatandatu, tariki ya 23 Werurwe

RUSIZI BBC vs RP- IPRC HUYE (Rusizi, 09:00)

ESPOIR BBC vs UGB (Stade Amahoro; 13:00)

Ku Cyumweru tariki ya 24 Werurwe 2019

RUSIZI BBC vs UR HUYE (Rusizi, 09:00)

Uko amakipe azahura muri shampiyona y’Abagore:

Kuwa Gatandatu tariki ya 23 Werurwe

APR BBC vs THE HOOPS (Stade Amahoro, 11:00)

Ku Cyumweru tariki ya 24 Werurwe

RP IPRC HUYE BBC vs UBUMWE (IPRC Huye, 11:00)

APR BBC vs MARIE REINE BBC (Stade Amahoro, 11:00)

Banki ya Kigali itera inkunga Shampiyona ya Basketball guhera muri uyu mwaka w'imikino
Perezida wa FERWABA Mugwiza Désiré
Umutoza wa REG BBC Ngwijuruvugo Patrick asanga kuba shampiyona yarongerewemo ubushobozi byaratumye guhangana kwiyongera
Uburyo amakipe ahagaze kugeza ubu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza