Abakunzi ba NBA muri Afurika bagiye gutangira kurebera imikino kuri YouTube

Yanditswe na Eric Tony Ukurikiyimfura
Kuya 20 Werurwe 2019 saa 10:05
Yasuwe :
0 0

Ishyirahamwe ry’Umukino wa Basketball muri Amerika (NBA) n’urubuga rushyirwaho amashusho rwa YouTube, batangaje ubufatanye bugiye gufasha abatuye muri Afurika yo munsi y’ubutayu bwa Sahara kureba imikino ya NBA irimo kuba.

Ubu bufatanye bwatangajwe kuri uyu wa Gatatu mu mujyi wa Johannesburg ahari icyicaro cya NBA muri Afrika, bijyana n’itangazwa ry’umurongo wa NBA Africa kuri YouTube, ugenewe abafana bo muri Afurika yo munsi y’ubutayu bwa Sahara.

Uzajya unyuzwaho imikino ibiri ya NBA buri cyumweru muri iyi shampiyona ya 2018/19 harimo Playoffs n’imikino ya za Conference, mu kwishimira uruhare rw’abakinnyi b’Abanyafurika muri NBA. Uzajya unerekana amateka y’iri rushanwa ku nzego zose.

Imikino ibiri ya mbere izerekanwa kuri uyu murongo izaba ku Cyumweru tariki ya 24 Werurwe, aho Charlotte Hornets izakira Boston Celtics saa 12:00 n’umukino uzahuza L.A Clippers yasuye New York Knicks saa 18:00.

Kuri uwo murongo kandi hazajya hatambukaho gahunda zirimo ibiganiro byakozwe kuri shampiyona ya NBA birimo abakinnyi b’abanyafurika bakina n’abakinnye uyu mukino ariko bawufitemo ibigwi.

Visi Perezida wa NBA unayihagariye muri Afurika; Amadou Gallo Fall, yavuze ko itangizwa ry’umurongo wa YouTube ugenewe Abanyafurika werekana iyi mikino ari ikintu gikomeye.

Ati “Bizafasha abafana benshi kureba imikino yacu irimo kuba kandi uko bayishaka, kuri uyu mugabane. Mu gihe twinjiye mu gihe gishyushye cya NBA aho amakipe ahatanira kuzakina ibyiciro bisoza, twizeye kugeza ibyishimo ku bafana benshi ba NBA muri Afurika yo munsi y’ubutayu bwa Sahara tunishimira amateka akomeye ya NBA n’ahazaza heza muri Afurika.”

Dayo Olopade uhagariye ibikorwa bya YouTube muri Afurika, yavuze ko kuva yatangira, YouTube yakomeje kuba uburyo bufasha abantu kwiyibutsa ibihe no gukurikirana imikino bakunda.

Ati “Dushimishijwe no gufatanya na NBA mu kwegereza abakunzi bacu muri Afurika ibyiza bya Basketball. Twizeye ko abafana ba NBA bazishimira kureba imikino irimo kuba n’ibitekerezo bigenda bitangwa banyuze kuri YouTube.”

Ubufatanye bwa NBA na YouTube bumaze igihe kuko shene yayo ya mbere yafunguwe kuri uru rubuga mu 2005, ikaba imaze kurebwa n’abasaga miliyari 5.4.

Mu bakinnyi batangajwe mu ntangiriro za shampiyona ya NBA 2018/19 harimo 13 bavuka ku mugabane wa Afurika ndetse hari n’abasaga 80 bakomoka kuri uyu mugabane bamaze kugaragara muri iyi shampiyona barimo abanyabigwi nk’umunya-Nigeria Hakeem Olajuwon na Dikembe Mutombo wo muri RDC.

Mu kwezi gushize NBA na FIBA batangaje gahunda yo gutangiza irushanwa rishya, Basketball Africa League (BAL) rizajya rihuza amakipe 12 atandukanye yo muri Afurika, rigamije guteza imbere uyu mukino kuri uyu mugabane, harimo n’irushanwa ry’abato, Jr. NBA, Basketball Without Borders (BWB) Africa na NBA Academy Africa.

Ibihangange nka LeBron James bigiye kujya bigaragara kuri YouTube imikino irimo kuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza