Ni kenshi Naomi yakunze kugaragaza amarangamutima ye ku rukundo akunda Ygal Lavi, usanzwe ari umuhanga mu bya mudasobwa mu kigo cya Younicorns Studio.

Abinyujije ku mbuga nkoranyambaga ze, yavuze ko we na Levi bamaze gusezerana imbere y’amategeko, kandi ko abonye umugabo uwo bazabana akaramata.

Aba bombi batangiye gukundana mu 2017. Tariki ya 30 Nzeri 2023, ubwo bari mu Bufaransa, Levi asaba Naomi ko yazamubera umugore, na we ntiyazuyaza ahita abimwemerera.

Mu butumwa yageneye umukunzi we, Naomi yagize ati “Yego, ntabwo nabishidikanyagaho, kuko n’ubundi yari wowe. Nishimiye ibihe byiza nzagirana nawe akaramata."

Ubwo basezeranaga imbere y’amategeko bari bashyigikiwe n’inshuti zabo za hafi zirimo izikora mu itangazamakuru ryo gusiganwa mu modoka arizo Martin Brundle, Natalie Pinkham, Bernie Collins n’abandi.

Kuwa Gatatu tariki ya 25 Nzeri 2024, ni bwo aba bateganya indi mihango y’ubukwe

Naomi w’imyaka 30 amaze kwandika amateka mu mukino wo gusiganwa mu modoka kuva mu mwaka wa 2010. Yakinnye mu marushanwa ya Southern African Formula Volkswagen, akina muri Clio Cup China Series, KTM X-Bow GT4 ndetse kuva mu mwaka wa 2019 ari gukina muri W Series.

Mu mwaka wa 2020 yagizwe umwe mu bashinzwe imenyekanishabikorwa mu isiganwa ry’abagore ry’utumodoka duto dutwarwa n’umuntu umwe, ‘single-seater racing’ ryitwa W Series.

Umukino wo gusiganwa ku modoka awufatanya no gukora itangazamakuru kuko kuri ubu ni umukozi wa Sky Sports, by’umwihariko muri Formula 1.

View this post on Instagram

A post shared by NAOMI SCHIFF RACING (@naomischiff)

Naomi Schiff na Ygal Lavi bazakora imihango y'ubukwe isigaye mu cyumweru gitaha

Byari ibirori by'akataraboneka

Naomi Schiff yagaragaje ko anejejwe n'umubano mwiza afitanye na Ygal Lavi

Naomi Schiff ukorera Sky Sports yiyemeje kurushinga na Ygal Lavi

Naomi amaze igihe kinini ari umusesenguzi kuri Sky Sports

Naomi afite amateka muri Formula 1