Kuva tariki ya 7 Mata 2025, Abanyarwanda n’inshuti zabo batangiye iminsi 100 yo kwibuka ku nshuro ya 31 Jenoside yakorewe Abatutsi mu 1994, yatwaye ubuzima bw’abarenga miliyoni, yangiza byinshi kandi ishegesha imitima y’abayarokotse.

Kugeza n’uyu munsi haracyagaragara abagifite ihungabana rikomoka ku bikomere batewe n’iyi Jenoside, gusa inzego zibishinzwe zita ku bagaragaza ibibazo bitandukanye by’umwihariko muri ibi bihe byo kwibuka.

Mu kiganiro yagiranye na IGIHE, Dr. Jean Michel Iyamuremye, umuvuzi mu Bitaro by’Indwara zo mu Mutwe by’i Ndera, by’umwihariko mu ishami ryabyo rya "Icyizere Psychotherapeutic Center", yavuze ko mu barwayi benshi bakira kugeza ubu, nibura 60% usanga bafite ibibazo bifitanye isano n’ihungabana rishingiye kuri Jenoside yakorewe Abatutsi.

Yagaragaje ko hari uburyo bwinshi bwo gufasha abagana ibi bitaro, ariko ahanini bigaterwa n’ikigero cy’ikibazo bafite, aho hari igihe umurwayi aba ageze ku rwego rwo kubanza kujya mu bitaro, hari uhabwa gahunda yo gutaha akajya yitaba muganga inshuro nyinshi mu gihe hari abasabwa kuzana imiryango, inshuti cyangwa abo babana kugira ngo baganirizwe uburyo bamwitaho.

Siporo ni umuti ku bafite ihungabana

Dr. Iyamuremye yashimangiye ko siporo ifasha cyane mu kuvura ihungabana n’izindi ndwara zifite aho zihuriye n’ubuzima bwo mu mutwe.

Ati “Mu buryo bwo kubavura, hari abo dukoresha imirimo isanzwe ya buri munsi nko gutunganya ubusitani cyangwa igikoni. Abandi tubakoresha siporo no gukina imikino itandukanye. Ni byinshi dukoresha kugira ngo tuvure umuntu.”

Yashimangiye ko “Siporo ni imwe mu ntwaro dukoresha hano mu kuvura abarwayi. Iyo umuntu akoze siporo hari imisemburo ubwonko buzana; iyo irimo ituma twishima, igabanya ububabare, igabanya umuhangayiko. Rero umuntu wakoze siporo, iyo misemburo ijya ku murongo cyangwa ikazamuka.”

Yongeyeho ko ibyo bitaba ku barwayi gusa, ahubwo ari ko bigenda no ku muntu udafite ikibazo, gusa ufite ikibazo we bikamufasha gusubira ku murongo.

Abajijwe niba umuntu usanzwe ukora siporo yagira ihungabana, cyane mu bihe byo kwibuka, Dr. Iyamuremye yashimangiye ko bishoboka.

Ati “Birashoboka ko wagira ihungabana ukora siporo kuko ibi ni ibihe navuga ko biba biremereye. Iki gihe umuntu yongera kwitekerezaho cyane, agatekereza ku bihe biruhanyije yaciyemo. Birasanzwe ko waba uri ukora siporo ukagira ibibazo kuko watekereje cyane. Ariko usanga abantu bakora siporo kenshi bitabagaragaraho cyane ugereranyije n’abatazikora.”

Yatanze urugero ku bushakashatsi bwigeze gukorwa na Minisiteri y’Ubuzima ku ihahamuka ryigeze kugaragara mu mashuri atandukanye yo mu Rwanda, aho abaganga babukozeho basanze icyo kibazo cyari cyiganje mu bigo by’amashuri bidafite ibibuga byo gukiniraho.

Siporo nziza zafasha uwahungabanye

Dr. Iyamuremye yavuze ko hari uburyo bwinshi bwo gukora siporo, harimo iza rusange, izo umuntu akora ku giti cye, izisaba ko umuntu akoresha imbaraga nka ruhago, kwiruka, koga, hari n’izisaba ko umuntu yoroshya imikaya nka Yoga n’izindi.

Ati “Ababishoboye babizi, bakunze gukoresha ziriya siporo zo gutuza kuko bavuga ko ari zo ziba nziza kurushaho. Ariko ku bantu bafite ihungabana, siporo za rusange ziba nziza kurushaho.”

“Ntabwo ari ikintu gituma yihugiraho wenyine. Iyo akoranye n’abandi bamutera akanyabugabo. Ntabwo ari siporo yunguka gusa, kuko abona n’ikindi kintu cyo kumva ko atari wenyine, dore ko akenshi umuntu wahungabanye aba ashaka kuba wenyine.”

Nubwo hari siporo zigenewe umuntu wahungabanye, Dr. Iyamuremye yagaragaje ko hari siporo umuntu ufite ihungabana cyangwa ibibazo byo mu mutwe adakwiriye gukora.

Ati “Bariya bamanukira mu mitaka cyangwa bagasimbuka ahantu harehare cyane, ntabwo twazikoresha. Ikintu cyose gituma agira ubwoba ntabwo nagihitamo. Twe kwa muganga dusobanurira umuntu akamaro ka siporo, tukamusobanurira ko ishobora gusimbura ibintu bibi yakoreshaga.”

Siporo zisaba imbaraga ni nziza ku basore kuko zibafasha cyane, ariko abakuze ntabwo bagirwa inama yo kuzikora.

Dr. Iyamuremye agira ati “Inama naha abantu bafite ihungabana n’abandi muri rusange ni uko gukora siporo byagakwiriye kujya muri gahunda zabo za buri munsi. Umuntu akareba siporo akunze, abakuze bakirinda izisaba imbaraga nyinshi cyane.”

“Nakangurira abantu gukora Yoga kuko ntisaba byinshi, isaba kwicara ugahumeka. Hari ikoranabuhanga nka YouTube byagufasha ugakurikira. Abasore bo bakina Volleyball, Basketball, bakoga, bakiruka, bagakina ruhago n’izindi zisaba imbaraga nta kibazo. Ibyo bifasha umuntu guhangana n’ibibazo by’ihungabana.”

Gukorera hamwe siporo ni kimwe mu bifasha abahungabanye

Dr. Iyamuremye Jean Michel avuga ko siporo ari umuti w'ingenzi mu guhangana n'ihungabana

Video: Byiringiro Innocent