00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwihaye intego yo kuzamuka mu Itsinda rya Gatatu rya Billie Jean King Cup

Yanditswe na Eric Tony Ukurikiyimfura
Kuya 6 June 2024 saa 09:51
Yasuwe :

Perezida w’Ishyirahamwe ry’Umukino wa Tennis mu Rwanda, Karenzi Théoneste, yavuze ko bafite intego yo kwitwara neza mu mikino bagiye kwakira, Ikipe y’Igihugu ikazamuka mu Itsinda rya Gatatu ry’Irushanwa rya Billie Jean King Cup.

Guhera tariki ya 10 kugeza ku ya 15 Kamena 2024, mu Rwanda hazabera imikino ya Tennis yo mu Itsinda rya Kane rya Billie Jean King Cup rigizwe n’ibihugu 10 mu bari n’abategarugori.

Uretse u Rwanda ruzakirira iri rushanwa ku bibuga bya IPRC Kigali, ibindi bihugu bizaba biri i Kigali ni Angola, Cameroun, Congo, Repubulika Iharanira Demokarasi ya Congo, Ethiopia, Lesotho, Mozambique, Algeria na Tanzania.

Billie Jean King Cup ni irushanwa ryitiriwe umukinnyi w’Umunyamerika wa Tennis, Billie Jean King. Mbere ryitwaga Fed Cup, ndetse rikinwa mu matsinda bitewe n’uko ibihugu bihagaze.

Ni ku nshuro ya kabiri ribereye muri Afurika ndetse no mu Rwanda, mu gihe ubusanzwe ryaberaga i Burayi. U Rwanda rwaryitabiriye bwa mbere mu 2021 ubwo Ikipe y’Igihugu yajyaga muri Lithuania.

Perezida w’Ishyirahamwe ry’Umukino wa Tennis mu Rwanda, Karenzi Théoneste, yavuze ko imyiteguro iri kugenda neza ndetse igeze kure, by’umwihariko ku Ikipe y’Igihugu ifite intego yo kuzamuka mu Itsinda rya Gatatu.

Ati "Ni ibintu tumaze kumenyera kuko ni ubwa kabiri iri rushanwa tugiye kuryakira hano. Twizeye ko rizongera kugenda neza kandi impamvu bongeye kuriduha ni uko bishimiye uko iry’ubushize ryagenze. Ku Ikipe y’Igihugu cyacu, intego ni uko tugomba kuzamuka mu Itsinda rya Gatatu."

Muri iri rushanwa rya Billie Jean King Cup 2024, Umutoza w’Ikipe y’Igihugu, Rutikanga Sylvain, yitabaje abakinnyi bane ari bo Umumararungu Gisèle, Tuyisenge Olive, Lia Kaishiki na Tuyishime Sonia.

Rutikanga yavuze ko bagize igihe gihagije cyo kwitegura ndetse agira amahirwe yo kubona Irushanwa ryo Kwibuka Jenoside yakorewe Abatutsi, aho batatu mu bakinnyi afite bageze muri 1/2, babiri muri bo bakina umukino wa nyuma.

Kapiteni w’Ikipe y’Igihugu, Tuyisenge Olive, na we yashimangiye ko bashaka kuzamuka mu Itsinda rya Gatatu kuko bagiye umwanya uhagije wo kwitoza.

Ati "Tumaze iminsi mu myitozo, navuga ko buri kimwe kimeze neza kandi intego dufite ni ukwitwara neza. Ibihugu tuzahangana harimo ibikomeye, ariko natwe twifitiye icyizere kandi tubona ko bishoboka."

Mbere y’uko irushanwa ritangira hazaba tombola ishyira ibi bihugu mu matsinda abiri aho rimwe rizaba ririmo amakipe atanu.

Buri kipe izaba ifite abakinnyi bane aho ku munsi w’umukino, igihugu gikina n’ikindi imikino itatu irimo ibiri mu bakina ari umwe [simples] n’undi umwe mu bakina ari babiri [doubles]. Buri mukino ubarirwa amanota atatu, igihugu gitsinze ibiri kikaba ari cyo cyegukana intsinzi.

Ku mukino, umutoza w’igihugu atanga abakinnyi babiri baza gukina imikino ibiri mu bakina ari umwe [simples] ndetse agatanga abakinnyi babiri bakinana muri "doubles".

Birashoboka ko irushanwa ryose ryarangira umutoza akinisha abakinnyi babiri gusa mu gihe yaba ababonamo ubushobozi. Aha, birashoboka kandi ko yaba afite abakinnyi babiri yizeye mu bakina ari umwe, noneho akanagira abandi babiri beza muri ‘doubles’.

Ikipe ya mbere muri ibi bihugu 10 bigiye gukinira mu Rwanda, ni yo izabona itike yo kuzamuka mu Itsinda rya Gatatu rya Billie Jean King Cup ku Mugabane wa Afurika.

Ubwo iri rushanwa ryaherukaga kubera i Kigali muri Kamena 2023, Madagascar yabonye itike yo kuzamuka, u Rwanda ruba urwa kane.

U Rwanda rugiye kwakira imikino y'Irushanwa rya Billie Jean King Cup ku nshuro ya kabiri yikurikitanya
Perezida w'Ishyirahamwe Nyarwanda ry'Umukino wa Tennis, Karenzi Théoneste yavuze ko intego bafite ari ukuzamuka mu Itsinda rya Gatatu ry'iri rushanwa
Umutoza w’Ikipe y’Igihugu, Rutikanga Sylvain afitiye icyizere abakinnyi be
Kapiteni w'u Rwanda, Tuyisenge Olive yavuze ko imyiteguro bagize iba icyizere cyo kwitwara neza
Ibihugu 11 ni byo bizahurira i Kigali muri iri rushanwa riteganyijwe tariki ya 10-15 Kamena

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .