00:00:00 IGIHE NETWORK KN KINYARWANDA EN ENGLISH FR FRANCAIS

U Burusiya ntibuzitabira Euro 2024

Yanditswe na Israel Ishimwe
Kuya 20 September 2022 saa 08:05
Yasuwe :

Ishyirahamwe ry’Umupira w’Amaguru ku Mugabane w’u Burayi, UEFA, ryongereye ibihano ryafatiye u Burusiya kubera intambara bwashoye muri Ukraine, bituma iki gihugu gikurwa mu bizitabira Euro ya 2024.

Ibi bihano byafatiwe u Burusiya byiyongereye ku byo gukurwa mu marushanwa mpuzamahanga yose bwashyiriweho kuva bwatangiza intambara muri Ukraine ku wa 24 Gashyantare 2022.

UEFA yahagaritse Ikipe y’Igihugu y’u Burusiya mu mikino yayo yemewe n’itegurwa n’Ishyirahamwe ry’Umupira w’Amaguru ku Isi, FIFA ndetse amakipe yo muri iki gihugu akumirwa kwitabira imikino ya Champions League, Europa League na Europa Conference League muri uyu mwaka.

U Burusiya byatangajwe ko butazakina Euro 2024 mu gihe imikino yo gushaka itike yo kuzayitabira izabera mu Mujyi wa Frankfurt mu Budage ku wa 9 Ukwakira 2022.

UEFA yatangaje ko ibihugu biri ku ruhande rw’u Burusiya nka Belarus byo bizitabira tombola ya Euro 2024 izabera mu Budage nta nkomyi.

Muri Nyakanga uyu mwaka, u Burusiya bwari bwajuririye icyemezo bwafatiwe ariko Urukiko rwa Siporo rwatesheje agaciro ubujurire bwarwo.

Itangazo rya UEFA ryo kuri uyu wa Kabiri, tariki ya 20 Nzeri 2022, ni ryo ryemeje ko iki gihugu kitazitabira Euro iteganyijwe mu myaka ibiri iri imbere.

Rigira riti “Amakipe yose y’u Burusiya kuri ubu yarahagaritswe nyuma y’icyemezo cy’Akanama Nshingwabikorwa ka UEFA kateranye ku wa 28 Gashyantare 2022, kikaza gushimangirwa n’Urukiko rwa Siporo ku wa 15 Nyakanga 2022.’’

Rikomeza rivuga ko kubera iyo mpamvu “U Burusiya ntiburi mu bihugu bizitabira tombola ya Euro 2022-24.’’

Icyemezo cyo gukura u Burusiya muri Euro 2024, cyatangajwe nyuma y’uko UEFA yihanangirije Umutoza w’Ikipe y’Igihugu ya Ukraine, Oleksandr Petrakov, watangaje ko yifuza kurasa ku basirikare b’Abarusiya binjiye muri Kyiv.

Muri Mata 2022, Petrakov w’imyaka 65 yabwiye Guardian ko nibagera muri Kyiv, nzafata imbunda ndinde umujyi wanjye. Ntekereza ko nakwegezayo abanzi babiri cyangwa batatu.’’

Aya magambo yatumye Ishyirahamwe rya Ruhago mu Burusiya ryandikira UEFA rirega Petrakov ko yakoze ivangura ku gihugu ribarizwamo ndetse risaba ko ahanwa kuko yananiwe kutabogama mu bijyanye na politiki.

Daily Mail yanditse ko mu butumwa bwanyujijwe kuri Facebook, Perezida w’Ishyirahamwe ry’Umupira w’Amaguru muri Ukraine, Andrii Pavelko, yanditse ko UEFA yihanangirije Petrakov ikanamuca amande yoroheje, rikayamwishyurira.

Nyuma yo gukurwamo k’u Burusiya no kuba u Budage bufite itike nk’igihugu kizakira imikino, ibihugu 53 bisigaye bizagabanywa mu matsinda arindwi agizwe n’amakipe atanu n’andi matsinda atatu agizwe n’ibihugu bitandatu.

Ibihugu 10 bya mbere n’icumi bya kabiri bizakomeza mu cyiciro cya nyuma mu gihe imyanya itatu isigaye izagenwa n’imikino ya kamarampaka izakinwa muri Werurwe 2024.

U Burusiya ntibuzitabira Euro 2024 kuko bukiri mu bihano bwafatiwe kubera intambara bwatangije muri Ukraine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .