Ku wa Gatandatu, tariki ya 30 Gicurasi 2026, ni bwo hakinwe imikino ya nyuma y’irushanwa rya Tennis ryo kwibuka ku nshuro ya 32 Jenoside yakorewe Abatutsi mu 1994.

Iri rushanwa ryahurije hamwe abakinnyi barenga 100 baturutse mu makipe yose y’abanyamuryango b’Ishyirahamwe rya Tennis mu Rwanda (FRT), bakina mu byiciro umunani.

Muri ibi byiciro harimo iby’ababigize umwuga, abatarabigize umwuga, abakuze ndetse n’abafite ubumuga. Haba mu bakina ari babiri ndetse n’abakina ari umwe, bahatanye mu bagabo ndetse n’abagore.

Abakinnyi b’itwaye neza harimo Matjaz Rakun watsinze Rukundo Innocent amaseti 2-1 (6-4, 2-6, 6-3) mu bagabo batabigize umwuga, mu bakina ari babiri muri iki cyiciro harimo Hanchez Antony ukinana na Buckley Sean batsinze Hakorimana Juvens na Mugisha Livingstone ku mukino wa nyuma (6-4, 2-6, 10-6).

Mu bagore batabigize umwuga bakina ari umwe, Umuhoza Zawadi yatsinze Umutoni Gloria amaseti 2-0 (6-2, 6-3).

Abakina ari babiri bakuze mu bagabo hatsinze Gashugi Innocent ukinana na Mucyurabuhuro Eslon, bakina na Mutabazi Jean Baptiste ukinana na Ntagungira Carpophore.

Mu bafite ubumuga bakina ari umwe mu bagore, Imaniragena Yvonne yatsinze Mutesi Faith amaseti 2-0 (6-1, 6-0), mu bagabo Hakizimana Emmanuel atsinda Ndayishimiye Ernest amaseti 2-0 (6-1, 6-1).

Mu bagore babigize umwuga Nishimwe Carine yatsinze Tuyishime Rona amaseti 2-0 (6-0, 6-1). Ni mu gihe mu bagabo Niyigena Etienne watwaye iri rushanwa mu mwaka ushize wa 2025, yaryisubije atsinze Rwamucyo Davide amaseti 2-0 (7-6(5), 6-4).

NCBA Rwanda ivuga ko izakomeza gufatanya n’Ishyirahamwe rya Tennis mu Rwanda (FRT), igamije gushyigikira no guteza imbere urubyiruko binyuze muri siporo, ariko nanone himakazwa kwigisha urubyiruko amateka y’igihugu no kurushishikariza kugira ubumwe n’ubwiyunge.

Matjaz Rakun ari gutera umupira wa mbere

Matjaz Rakun na Rukundo Innocent bahuriye ku mukino wa nyuma

Abakunzi ba Tennis bitabiriye imikino ya nyuma yo kwishyura

Matjaz Rakun yitwaye neza ku mukino wa nyuma

Imikino yo kwibuka izakomeza kuba buri mwaka

Rukundo Innocent yatsindiwe ku mukino wa nyuma

Abafana ba Tennis bakurikiye irushanwa

Umusifuzi w'umukino ari gukiranura Matjaz Rakun na Rukundo Innocent

Abakinnyi bahataniye ibihembo bya 2026

Irushanwa ryitabiriwe n'abakinnyi barimo abakuze

Umulisa Joselyne ari mu batanze ibihembo

Matjaz Rakun yahembwe na Perezida wa FRT, Karenzi Théoneste

Hanchez Antony na Buckley Sean batsinze mu bakina ari babiri batabigize umwuga

Niyigena Etienne na Nishimwe Carine ni bo begukanye irushanwa ryo kwibuka mu babigize umwuga

Abakinnyi bakinnye imikino ya nyuma y'irushanwa ryo kwibuka muri Tennis

Imaniragena Yvonne yegukanye irushanwa mu bagore babigize umwuga