00:00:00 IGIHE NETWORK KN KINYARWANDA EN ENGLISH FR FRANCAIS

SUMMA yubatse Stade Amahoro, yahawe akazi muri Uganda

Yanditswe na Iradukunda Olivier
Kuya 9 June 2024 saa 10:46
Yasuwe :

Minisitiri w’Uburezi na Siporo muri Uganda, Janet Museveni, yasinye amasezerano y’ubufatanye hagati ya Leta ya Uganda na Sosiyete y’ubwubatsi ya SUMMA izubaka Hoima City Stadium izaberaho imikino y’Igikombe cya Afurika cya 2027.

Iyi sosiyete ya SUMMA niyo yubatse inyubako zitandukanye mu Rwanda zirimo BK Arena, inzu African Leadership University ikoreramo i Masoro ndetse ni nayo yahawe isoko ryo kuvugurura Stade Amahoro isa n’iyamaze kurangira.

Amasezerano yo kubaka Hoima Stadium yashyizweho umukono kuwa Gatandatu, tariki 8 Kamena 2024. Muri uyu muhango Leta ya Uganda yari ihagarariwe na Minisitiri w’Uburezi na Siporo, Janet Museveni, uw’Ubutaka, Ibikorwaremezo n’Amajyambere y’imijyi, Judith Nabakooba.

Muri uyu muhango kandi Minisitiri Judith Nabakooba yashyikirije minisiteri ya Siporo ubutaka buzubakwaho Hoima City Stadium bungana na hegitari 32.9.

Madamu Janet Museveni yasabye iyi sosiyete gukorana umurava iyi stade ikuzura byibuze mu 18 kuko hari ibindi bikorwaremezo bya siporo bigomba kwitabwaho birimo Lugogo Sports Complex na National High Altitude Training Centre.

Yasabye kandi iyi Sosiyete y’Abanya-Turkey gukorana imbaraga kugira ngo isura y’iki gihugu ikomeze igaragare neza.

Ati "Ntimuzatume Uganda isubira hasi kuko guhabwa kwakira Igikombe cya Afurika ni iby’agaciro cyane kuko inyungu ntabwo ziza muri siporo gusa.”

Ni Stade izaba igezweho ndetse ikazaba yakira abantu ibihumbi 20 bicaye neza. Biteganyijwe ko Uganda izafatanya na Kenya ndetse na Tanzania mu kwakira Igikombe cya Afurika kizaba mu 2027.

SUMMA igiye kubaka Hoima City Stadium muri Uganda
Minisitiri w’Uburezi na Siporo muri Uganda, Janet Museveni, yasabye SUMMA gukorana imbaraga Hoima City Stadium ikaboneka mu mezi 18

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .