Mu gitondo cyo kuri uyu wa Gatanu, tariki ya 10 Nyakanga 2026, ni bwo imikino yombi yakinwe, hanatangizwa irushanwa rya Shampiyona y’Isi muri Volleyball y’Abafite Ubumuga iri kubera Hangzhou mu Bushinwa.

Ikipe y’Abagabo ni yo yabanje gukina, ndetse itangira neza umukino igerageza kwegerana na Misiri, ariko ku bw’amahirwe make itsindwa amanota 25-20. Ibi byayiciye intege itsindwa manota 25-15 mu iseti ya kabiri, mu ya gatatu ho itsindwa itagejeje amanota 15, kuko yarangiye ari 25-14.

Iyi kipe iri mu Itsinda B izasubira mu kibuga ku wa Gatandatu, tariki ya 11 Nyakanga, ihure na Ukraine, mbere yo guhura na Leta Zunze Ubumwe za Amerika, ku Cyumweru, tariki ya 12 Nyakanga 2026.

Indi kipe yakinnye kuri uyu munsi ni iy’Abagore, aho u Rwanda rwatsinzwe rurushwa cyane na Iran. Amaseti yose uko ari atatu u Rwanda rwayatsinzwe ku manota 25-11.

U Rwanda ruri mu Itsinda A muri iki cyiciro, ruzasubira mu kibuga ku wa Gatandatu, rukina n’u Bushinwa, mbere yo guhura na Kenya mu mukino wa nyuma mu itsinda.

Iri rushanwa ryitabiriwe n’ibihugu 16 mu bagore ndetse n’ibindi 16 mu bagabo.

Abakinnyi bifashishijwe ku mukino wa mbere Ikipe y'u Rwanda y'Abagabo yakinnye muri Shampiyona y'Isi

Abakinnyi b'Ikipe y'Igihugu y'Abagore bari kuririmba indirimbo y'u Rwanda yubahiriza igihugu

Abakinnyi u Rwanda rwitwajwe mu bagore muri Shampiyona y'Isi ya Sitting Volleyball

Nyiraneza Solange ukinira u Rwanda ari gutangiza umupira

Amakipe y'u Rwanda arashyigikirana muri iri rushanwa