Siporo Rusange ya Car Free Day igiye gusubukurwa nyuma y’amezi atandatu

Yanditswe na Eric Tony Ukurikiyimfura
Kuya 12 Nzeri 2020 saa 10:02
Yasuwe :
0 0

Minisiteri ya Siporo ku bufatanye n’Umujyi wa Kigali, batangaje ko Siporo Rusange ya Car Free Day ihuza Abanyarwanda bagakora siporo mu rwego rwo kurushaho kugira ubuzima bwiza, izasubukurwa tariki ya 20 Nzeri 2020.

Kimwe n’ibindi bikorwa byose bihuza abantu benshi, Kigali Car Free Day yari yasubitswe kuva muri Werurwe ubwo mu Rwanda hageraga icyorezo cya Coronavirus cyibasiye Isi.

Kuri uyu wa Gatandatu nibwo Minisiteri ya Siporo yatangaje ko iyi siporo rusange itegurwa n’Umujyi wa Kigali, ikaba kabiri mu kwezi, izongera kuba ku wa 20 Nzeri 2020 hubahirizwa amabwiriza yo kwirinda Coronavirus.

Ingamba zigomba kwitabwaho mu gihe bazaba hongera kuba Kigali Car Free Day zirimo kwambara neza agapfukamunwa mbere na nyuma ya siporo ndetse n’igihe cyose bibaye ngombwa.

Hari kandi kubahiriza intera ya metero ebyiri hagati y’umuntu n’undi, kwitwaza no gukoresha imiti yabugenewe isukura intoki ndetse no kuzirikana ko siporo ikorewe mu matsinda ibujijwe.

Minisiteri ya Siporo yatangaje ko “Amasaha n’imihanda izakoreshwa ni ibisanzwe. Abafite umuriro, ibicurane n’inkorora, ntibemerewe kwitabira iyi siporo.”

Siporo rusange ya Kigali Car Free Day, yaherukaga kuba tariki ya 1 Werurwe 2020, aho abayitabiriye babanje gupimwa umuriro kuko byari mu mwaduko wa Coronavirus yari imaze gukwira cyane mu Bushinwa.

Iyi siporo rusange yatangijwe muri Gicurasi 2016 igamije gushishikariza abatuye Umujyi wa Kigali umuco wo gukora siporo no kubiborohereza; gushishikariza abaturage kwirinda indwara zitandukanye, aho bahabwa inama bakanapimwa izi ndwara ku buntu. Kuri ubu no mu ntara zindi iyi Siporo ikaba ikorwa.

Mu ntangiriro za 2018 nibwo Perezida Kagame yasabye ko yazajya iba kabiri mu kwezi; ku Cyumweru cya mbere cy’ukwezi n’icya gatatu.

Siporo rusange ya Kigali Car Free Day izasubukurwa ku wa 20 Nzeri, hubahirizwa amabwiriza yo kwirinda icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .