Amakipe atandukanye akomeje gukina imikino ya gicuti mu rwego rwo gutyaza abakinnyi bayo ndetse no kumenyereza abashya.

Umukino wa mbere Rayon Sports igomba gukina, ni umukino uzayihuza n’ikipe ya Musanze FC kuri Stade ya Kigali i Nyamirambo saa kumi n’ebyiri z’umugoroba.

Undi mukino Rayon Sports biteganyijwe ko izakina, uzayihuza na AS Kigali ku cyumweru tariki 7 Kanama 2022 kuri stade ya Kigali i Nyamirambo saa cyenda.

Ni umukino uzagaragaramo abakinnyi bashya iyi kipe imaze iminsi igura, barimo na Mbirizi Eric uzagera mu Rwanda kuri uyu wa Kane saa moya z’ijoro.

AS Kigali ikomeje kwitegura APR FC dore ko aya makipe ari yo azafungura umwaka mushya w’imikino, akina igikombe kiruta ibindi (Super Cup). Iki gikombe gihuza uwatwaye shampiyona n’uwatwaye igikombe cy’amahoro.

Uyu mwaka uyu mukino uzabera kuri stade mpuzamahanga ya Huye, tariki 14 Kanama 2022. Rayon Sports iracyari ku isoko kuko isigaje kugura abakinnyi batatu, barimo Rutahizamu, umukinnyi utaha izamu aca mu mpande ndetse n’umunyezamu.

Kuwa Gatanu nibwo Rayon Sports izakina na Musanze FC

Abakinnyi bakomeje imyitozo bitegura shampiyona

Umutoza Haringingo akomeje gukoresha imyitozo muri Rayon Sports

Abakinnyi ba Rayon Sports bakomeje imyitozo ku Ruyenzi bitegura shampiyona

Onana ni umwe mu bakinnyi ngenderwaho ba Rayon Sports FC