Kuri iki Cyumweru, tariki ya 23 Gashyantare 2025, ni bwo aba bombi batangije isiganwa mpuzamahanga rya ‘Tour du Rwanda 2025’.

Nyuma yo gutangiza agace kabanza karyo (Prologue), Perezida Kagame na Lappartient baganiriye ku iterambere ry’iri siganwa.

Baganiriye kandi ku ifungurwa ry’ikigo cyo guteza imbere umukino w’amagare cyashyizwe mu Rwanda. Kizafasha mu kuzamura abakinnyi b’Abanyarwanda, abo ku Mugabane wa Afurika n’ahandi.

Ibiganiro bya Perezida Kagame na Lappartient kandi byagarutse ku buryo Tour du Rwanda yazamurirwa urwego ikaba mu marushanwa ari ku rwego rwa kabiri rw’akomeye ku Isi, no ku rwego rwa mbere rwa ‘World Tour’.

World Tour ni urwego rw’amarushanwa ahatse andi mu mukino w’amagare, kuko yitabirwa n’amakipe akomeye ndetse n’abakinnyi bakomeye.

Perezida Kagame kandi yahawe impano y’umwambaro w’umukinnyi wegukana Shampiyona y’Isi, dore ko u Rwanda rugeze kure imyiteguro y’iri siganwa ruzakira, ari no ku nshuro ya mbere ribereye muri Afurika.

Agace kabanza ka Tour du Rwanda 2025, kakiniwe mu muhanda uzenguruka Stade Amahoro na BK Arena, kegukanywe n’Umubiligi Aldo Taillieu ukinira Lotto Dstny.

Perezida Kagame yagiranye ibiganiro na Perezida wa UCI, David Lappartient, ndetse n'uhagarariye imikino y'amagare muri Afurika, Dr. Allah Kouame

Ibiganiro bya Perezida Kagame na David Lappartient byibanze ku kugeza Tour du Rwanda mu masiganwa yo ku rwego rwa mbere 'World Tour'

U Rwanda rwiteguye kwakira Shampiyona y'Isi iteganyijwe muri Nzeri

Perezida Kagame yitabiriye agace kabanza ka Tour du Rwanda

Perezida Kagame na David Lappartient wa UCI batangije Tour du Rwanda 2025