00:00:00 IGIHE NETWORK KN KINYARWANDA EN ENGLISH FR FRANCAIS

Niyonzima Haruna yashimiwe n’uwo yafashije kuvuza umugore

Yanditswe na Iradukunda Olivier
Kuya 7 June 2024 saa 03:58
Yasuwe :

Haruna Niyonzima ukinira Al Ta’awon yo muri Libya yashimiwe bikomeye n’umwe mu bakunzi be kuba yaramuhaye ubufasha bumwunganira kuvuza umugore we wari urembejwe na kanseri yaje gukira burundu.

Uyu mukinnyi ari mu Rwanda aho ari mu kiruhuko ndetse akaba ari gukina irushanwa ritegura umwaka utaha w’imikino ku bakinnyi babyifuza rya ‘Agaciro Tournament Pre-Season 2024’.

Iyi mikino yakinwe no mu mwaka ushize, akaba aribwo Niyonzima yahuye n’uyu mugabo uvuga ko bari inshuti kuva cyera ariko akaba atarumvaga ko akimwibuka.

Icyo gihe yaramwegereye amwibutsa aramwiyibutsa ndetse ntiyibagirwa kumubwira ko afite ikibazo cy’umugore we usigaye uba mu bitaro kubera uburwayi bwa Kanseri.

Yagize ati “Haruna muzi ari muri Rayon Sports, ari inshuti yanjye ndi umusore. Naje kurwaza umusore ndamushakisha ndetse mu mwaka ushize musanga ku Mumena [..]. Yampaye nimero ngo nzamuhamagare, nyuma ampa ibihumbi 86 Frw ari nayo Ibitaro bya Butaro bari banciye.”

“Ntiyari aziko tuzongera kubonana, ntiyaraziko nageze i Butaro, ntiyarazi ko n’umudamu yakize. Ndagira ngo ngutangarize ngo umudamu Marceline Uwimana yarakize, kanseri yashizemo na raporo ya muganga ndayifite. Ndagushimiye n’igihugu kibyumve.”

Niyonzima Haruna w’imyaka 34 yakiniye amakipe arimo Rayon Sports, APR FC, AS Kugali yo mu Rwanda, Young Africans na Simba SC yo muri Tanzania, kugeza ubu akaba ari muri Al Ta’awon yo muri Libya.

Si ayo makipe gusa kuko yakiniye n’Ikipe y’Igihugu ‘Amavubi’ akanayibera kapiteni, ndetse akaba anafite agahigo ko kuba ariwe mukinnyi wenyine wayikiniye imikino irenga 100.

Niyonzima Haruna yashimiwe n'uwo yagiriye neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .