00:00:00 IGIHE NETWORK KN KINYARWANDA EN ENGLISH FR FRANCAIS

Muhire na Tuyisenge begukanye Cogebanque Open 2022 (Amafoto)

Yanditswe na Byiringiro Osée Elvis
Kuya 5 Ukuboza 2022 saa 09:46
Yasuwe :

Muhire Joshua na Tuyisenge Olive begukanye irushanwa rya Cogebanque Tennis Open 2021 ryari rimaze iminsi umunani ribera ku bibuga bya Cercle Sportif de Kigali mu Rugunga, ryasojwe ku Cyumweru, tariki ya 4 Ukuboza 2022.

Iri rushanwa ryabaga ku nshuro ya gatandatu, ryitabiriwe n’abakinnyi barenga 120 baturutse mu Rwanda, u Burundi na Repubulika Iharanira Demokarasi ya Congo.

Muhire wari umaze kwitabira iri rushanwa inshuro ebyiri, uyu mwaka yaritwaye nyuma yo gutsinda Ishimwe Claude amaseti 2-1 (1-6,6-3,6-3).

Yavuze ko yishimiye gutsinda, asaba ababishinzwe kongera amarushanwa kugira ngo barusheho kuzamura urwego.

Yagize ati “Nishimiye gutsinda iri rushanwa kandi rirampa imbaraga zo gukomeza kwitegura ‘Rwanda Open’ izatangira tariki 12 Ukuboza. Ndashimira Cogebanque iritera inkunga kuko tugira amarushanwa make cyane. Urebye nk’ubu twaherukaga gukina ‘Davis Cup’ yo muri Nyakanga.”

Mu bagore babigize umwuga, Tuyisenge Olive ni we watwaye irushanwa nyuma yo gutsinda Mutuyimana Chantal amaseti 2-6, 6-4 na 6-4 ku mukino wa nyuma.

Mu bafite ubumuga bakina bicaye mu tugare (Wheelchair Tennis), Hakizimana Emmanuel yatsinze Dusengimana Jean Luc amaseti 2-1 (6:4 na 6:4).

Umuyobozi Mukuru wa Cogebanque, Habarugira Ngamije Guillaume, yashimiye abakinnyi n’abakunzi ba Tennis bitabiriye, abashishikariza gukoresha serivisi z’iyi Banki y’Ubucuruzi.

Ati “Ni iby’agaciro kuri Cogebanque guharanira ubuzima bwiza bw’abantu binyuze mu gutera inkunga Tennis na siporo muri rusange. Iri rushanwa ryagize uruhare rukomeye mu kuzamura ubuhanga bw’abakinnyi babigize umwuga n’abatarabigize umwuga kandi rinashimangira umubano wa Cogebanque n’abaryitabiriye.”

Abitabiriye iri rushanwa ryari ryatangiye tariki ya 26 Ugushyingo 2022, bagejejweho gahunda zitandukanye za Cogebanque zirimo serivisi yo gufunguza konti zo kwizigamira, gahunda y’inguzanyo yo gutunga inzu na Gisubizo Loan Express ishobora kugufasha kubona inguzanyo igera ku nshuro 15 z’umushahara wawe kimwe n’izindi umuntu yifuza.

Ukeneye izo serivisi agana ishami rya Cogebanque cyangwa umu-agent wayo cyangwa akaba yahamagara umurongo wa Cogebanque utishyurwa 5050.

Kuva Cogebanque yakwemererwa gukorera mu Rwanda mu 1999 imaze kuhagira amashami 28 ayifasha kugeza serivisi ku bayigana. Ifite ATM 36, aba-agents barenga 650 bafasha abayigana gufunguza konti, kubitsa no kubikuza.

Itanga izindi serivisi zirimo izifashisha ikoranabuhanga binyuze muri Internet Banking, Mobile Banking (ukoresheje telefoni kuri *505# na Mobile App ya “Coge mBank”), Ikarita ya Smart cash ndetse n’amakarita ya MasterCard (Debit, Credit na Prepaid) yifashishwa mu kwishyura no kubikuza ahantu harenga miliyoni 36 ku Isi yose.

Muhire yishimira inota yari amaze gutsinda
N'abari n'abategarugori bitabiriye Cogebanque Open 2022
Ishimwe Claude (ibumoso) na Muhire Joshua basuhuzanya mbere y'umukino
Aba bakinnyi berekanye ko mu Rwanda hari impano mu mukino wa Tennis
Byari ibyishimo ku bakurikiye iri rushanwa rya Tennis
Iyi mikino iterwa inkunga na Cogebanque
Muhire Joshua yabaye uwa mbere mu bagabo ahembwa n'Umuyobozi wa Cogebanque
N'abafite ubumuga bitabiriye iri rushanwa bahembwe
Umuyobozi Mukuru wa Cogebanque, Habarugira Ngamije Guillaume, yashimiye abakinnyi n’abakunzi ba Tennis bitabiriye iri rushanwa
Nyuma y'irushanwa hafashwe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .