00:00:00 IGIHE NETWORK KN KINYARWANDA EN ENGLISH FR FRANCAIS

Mo Farah yahishuye ko yakoreshejwe nk’umucakara mu bwana bwe

Yanditswe na Iradukunda Olivier
Kuya 12 July 2022 saa 11:53
Yasuwe :

Umwongereza Mohamed Farah wubatse izina mu marushanwa yo kwiruka ku maguru nka ‘Mo Farah’ yahishuye inkuru idasanzwe ku buzima bwe, avuga ko yajyanywe mu Bwongereza binyuranye n’amategeko akiri umwana ndetse ahatirwa gukora nk’umukozi wo mu rugo.

Sir Mohamed Muktar Jama Farah w’imyaka 39 ni umwe mu bubatse amateka mu gusiganwa ku maguru ndetse yagiye yesa uduhigo twinshi mu mikino irimo iya Olempike. Yatangiye gukina imikino yo gusiganwa ku maguru mu 1996 urugendo rwe rurangira mu 2021.

Mo Farah yavuze ko yahawe izina rya Mohamed Farah n’abamuguriye muri Djibouti. Ubusanzwe amazina ye ni Hussein Abdi Kahin.

Mu nkuru ye, Mo Farah yavuze ko yajyanywe muri iki gihugu cyo muri Afurika y’Iburasirazuba afite imyaka icyenda n’umugore atigeze amenya. Icyo gihe yakoreshejwe akazi ko mu rugo ko kurera abana bagenzi be.

Yagize ati “Mu myaka yashize nakomeje kwihagararaho simvuge ibyambayeho. Ariko biragoye kubihagarika igihe kirekire.’’

Uyu mukinnyi yavuze ko yageze mu Bwongereza avuye muri Somalia nk’impunzi.

Muri filime mbarankuru yakozwe na BBC, Mo Farah yavuze ko ababyeyi be batigeze bajya mu Bwongereza. Nyina na barumuna be bombi ubu baba muri Somalia.

Se umubyara Abdi, yishwe ahitanywe n’amasasu igihe Mo Farah yari afite imyaka ine. Icyo gihe hari ihohoterwa ryakorerwaga abaturage muri Somalia, bashaka ubwigenge babonye mu 1991.

Mo Farah yavuze ko yari afite imyaka iri hagati y’umunani n’icyenda ubwo yavanwaga mu rugo aho yari kumwe n’umuryango we muri Djibouti. Yaje kujyanwa mu Bwongereza n’umugore atigeze amenya.

Yamubwiye ko amujyanye i Burayi kubana na bene wabo bahatuye. Ikintu avuga ko yishimiye icyo gihe.

Yakomeje ati “Sinari nagera mu ndege, bwari bwo bwa mbere kandi narabyishimiye.’’

Uyu mugore ni we wamubwiye ko agomba kuvuga ko yitwa Mohamed. Avuga ko yari afite ibyangombwa by’ingendo mpimbano byerekanaga ifoto ye iruhande rw’izina rya Mohamed Farah.

Bageze mu Bwongereza, uyu mugore yamujyanye mu nzu ye i Hounslow, mu Burengerazuba bwa Londres, amwambura urupapuro rwari rwanditseho amakuru n’amazina ya bene wabo.

Yagize ati “Nanjye icyo gihe nahise menya ko yanshimuse. Muri ako kanya, nari nzi ko mfite ibibazo kandi byari byo.’’

Mo Farah avuga ko yagombaga gukora imirimo yo mu rugo no kwita ku bana be kugira ngo amuhe ibyo kurya.

Yaramubwiye ati “Niba ushaka kongera kubona umuryango wawe, ntukagire icyo wongera kuvuga.’’

Akenshi iyo Mo Farah yashakaga kurira yifungiranaga mu bwiherero akabona kurira.

Mu myaka mike yabanje uwo muryango ntiwamwemereye kujya mu ishuri, ariko afite imyaka igera kuri 12 yiyandikishije mu mwaka wa Karindwi muri Feltham Community College. Abayobozi baho babwiwe ko Sir Mo ari impunzi yaturutse muri Somalia.

Umwarimu we wasaga n’aho akuze uzwi nka Sarah Rennie yabwiye BBC ko yaje ku ishuri nta gaciro yahawe kandi atanitaweho.

Asobanura ko yavugaga Icyongereza gike cyane kandi ko yari umwana w’amarangamutima n’umuco.

Umwongereza Mohamed Farah yubatse izina mu marushanwa yo kwiruka ku maguru nka ‘Mo Farah’

  Mo Farah wa nyawe ni nde?

Mo Farah yatangiye kwamamara nk’umukinnyi afite imyaka 14 yatumiwe mu marushanwa y’amashuri mu isiganwa ryabereye muri Latvia, gusa icyo gihe nta byangombwa yari afite.

Watkinson wamufashije gusaba ubwenegihugu bw’u Bwongereza ku izina rya Mohamed Farah, abuhabwa muri Nyakanga 2000.

Muri filime mbarankuru, Umunyamategeko Allan Briddock abwira Sir Mo ubwenegihugu bwe bwarimo uburiganya cyangwa kubeshya.

Mu buryo bwemewe n’amategeko, guverinoma yashoboraga kumukuraho ubwenegihugu bw’u Bwongereza bwabonetse binyuze mu buriganya.

  Umukino wo gusiganwa ku maguru ni wo wamukijije

Mo Farah avuga ko yashatse kuvuga ku mateka ye kugira ngo ahangane n’imyumvire ya bamwe ku bijyanye n’ubucuruzi ndetse n’ubucakara.

Agira ati “Sinari nzi ko hari abantu benshi bahura n’ibikorwa nk’ibyo nakorewe. Gusa nyuma y’ubwo buzima naje kugira amahirwe. Icyankijije cyatumye nerekana itandukaniro ni uko nari nzi kwiruka.’’

Mohamed Farah wavukiye muri Somalia, yubatse izina rikomeye mu gusiganwa ku maguru muri metero ibihumbi bitanu n’ibihumbi 10. Afite inkomoko muri Somalia.

Uyu mugabo ufite imidali ibiri ya Zahabu yakuye mu mikino Olempike, ni umwe mu bashimwe n’Umwamikazi w’u Bwongereza ndetse amwemerera gukoresha inyito ‘Sir’ imbere y’amazina ye.

Mo Farah afite imidali 10 yegukanye mu marushanwa atandukanye yo kwiruka harimo ine yakuye mu ya Olempike n’indi itandatu yegukanye ku rwego rw’Isi.

Ubusanzwe amazina ye ni Mohamed Muktar Jama Farah akaba yaravutse mu 1983. Yagiye mu Bwongereza akiri umwana muto azamukira mu ikipe y’imikino yo kwiruka ya Newham & Essex Beagles Athletics Club.

Mo Farah yahuye n'ubuzima bw'ubucakara mu bwana bwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .