Verstappen ni we mukinnyi wa mbere mu bari gukina Formula 1 kugeza ubu kuko aherutse no kwegukana isiganwa riheruka rya 2024, rikaba irya kan ryikurikiranya.

Nyuma y’aho amasiganwa ya 2024 arangiye, uwari ushinzwe gukurikirana imikorere y’imodoka ze, Adrian Newey, yahise yerekeza muri Aston Martin asezera kuri Red Bull.

Uyu mugabo bnshi baketse ko ashobora kujyana na Verstappen kuko ari we wagiraga uruhare runini mu kumukorera imodoka yifuza, kuko uyu mukinnyi akunze gushimangira ko icyo akurikiye mu mukino ari “ibyishimo kurenza kuba ari akazi”.

Umuyobozi ushinzwe Iyamamazabikorwa ndetse n’Ubucuruzi muri Aston Martin, Jefferson Slack, aherutse kugaragaza ko yakwishimira kubona uyu mukinnyi mu ikipe yabo.

Ikinyamakuru Daily Mail cyahise gitangaza ko uyu mukinnyi aramutse agiye muri iyi kipe yagenda ku masezerano afite agaciro ka miliyari 1£, kugira ngo ave muri iyi kipe yagezemo mu 2016.

Verstappen yabajijwe niba koko yifuza kwerekeza muri iyi, avuga ko “ibyo ni byiza”, gusa agifite amasezerano muri Red Bull nk’umukinnyi wayo, ndetse ikimuraje ishinga mu mukino atari amafaranga.

Ati “Ntangira gukina uyu mukino yari ukwinezeza, ntabwo ari amafaranga nashakaga ahubwo byaje kuziramo n’akazi. Nifuza gutwara imodoka nkagera kure.”

Kugeza ubu ntabwo Aston Martin iri kwishimira umusaruro wa Lance Stroll ukinana na Fernando Alonso, wahesheje iyi kipe ibikombe bibiri bya Formula 1.

Umuholandi Verstappen wavuzwe mu makipe atandukanye arimo na Mercedes, yiteguye gutangira umwaka w’imikino 2025 ari muri Red Bull. Amasiganwa azahera ku rya Australian Grand Prix, riteganyijwe tariki ya 15 Werurwe.

Max Verstappen akomeje kwifuzwa n'amakipe akomeye muri Formula 1

Max Verstappen yaciye amarenga yo kujya muri Aston Martin