Ni siporo yitabiriwe n’abagore b’abayobozi mu nzego nkuru z’igihugu barimo Minisitiri w’Uburinganire n’Iterambere ry’Umuryango, Dr. Uwamariya Valentine, Perezida w’Umutwe w’Abadepite mu Nteko Ishinga Amategeko y’u Rwanda, Mukabalisa Donatille, Minisitiri wa Siporo, Munyangaju Aurore Mimosa, Meya w’Umujyi wa Kigali, Samuel Dusengiyumva n’abandi.

Iyi siporo yahujwe na Car Free Day, yabaye mu gitondo cyo kuri iki Cyumweru tariki 2 Kamena 2024, aho bamwe mu batuye mu Mujyi wa Kigali batangiriye kuri BK Arena basoreza kuri Kigali Convention Centre, bafashwa n’abatoza mu myitozo ngororamubiri.

Abitabiriye iyi siporo bahawe ubutumwa bugaruka ku buryo icyuho cy’abagore mu gukora siporo kikigaragara cyane, bityo bikaba ari ngombwa ko bakunda bakanashishikariza bagenzi babo kuzikora.

Meya w’Umujyi wa Kigali, Samuel Dusengiyumva watanze ikaze ku bitabiriye siporo, yashishikarije abaturage guhora bakora siporo mu rwego rwo kugira Umujyi mwiza utuwe n’abafite ubuzima bwiza.

Ibi byashimangiwe na Minisitiri Dr. Uwamariya Valentine wakebuye abagore, abibutsa ko gukora siporo biri mu nyungu zabo bwite ndetse no kubyaza umusaruro amahirwe igihugu kibaha.

Yagize ati “Abagabo, basaza bacu ndetse n’abana bahora bibaza bati kubera iki abagore? Ariko mu by’ukuri ikwiriye kuba iy’umuryango wose muri rusange. Siporo iraduhuza tukunga ubumwe ariko ikanatuma tugira ubuzima bwiza.”

“By’umwihariko rero abagore, iyi ni imwe mu nzira nziza zadufasha kwirinda indwara zitwibasira kuko akenshi usanga tumeze nk’aho twiyibagirwa. Igihugu cyaduhaye amahirwe, mureke tuyakoreshe.”

Kuko iyi siporo yabereye mu gihugu hose, Mukandayambaje Zubby ufite imyaka 50 wo mu karere ka Rwamagana, yavuze ko yamubereye umuti ku buzima bwe.

Ati “Ubu maze imyaka itanu nkora siporo, natangiye kuyikora nyuma yo kurwara umugongo, abaganga bakambwira ko ndamutse nkoze nyikoze yambera umuti mwiza. Ubu rwose umubiri wanjye usigaye umerewe neza nta kibazo nkigira ahubwo nashishikariza n’abandi bagore gukora siporo nyinshi.”

Abanyarwanda batuye mu bice bitandukanye by’igihugu basanzwe bahurira muri siporo iba kabiri mu kwezi, aho nta binyabiziga bya moteri biba byemewe gukoreshwa mu masaha aba yagenwe.

Madamu Jeannette Kagame yitabiriye siporo rusange yahujwe n’Ubukangurambaga #AbagoreTwagiye

Abagore bari mu nzego z'umutekano ntibatanzwe no gukora siporo

Imyitoza ngororamubiri yatangiriye kuri BK Arena

Abatuye mu Mujyi wa Kigali bitabiriye Siporo Rusange

Buri mugore wese yasabwe gukundisha mugenzi we siporo

Ubukangurambaga bwa #AbagoreTwagiye bubashishikariza gukora siporo bwari bwitabiriwe

Abatuye mu Mujyi wa Kigali bakoze siporo yiganjemo abagore

Abayobozi mu nzego zinyuranye za Leta bitabiriye siporo

Perezida w'Umutwe w'Abadepite, Mukabalisa Donatille, ari mu bazindukiye muri Siporo Rusange

Siporo yaranzwe no kunanura imitsi

Ubwitabire bwari hejuru cyane

Abitabiriye siporo bafashijwe no kunanura ingingo

Abagore bo mu Karere ka Rwamagana ntibatanzwe muri siporo Rusange

Abatuye mu Karere ka Rwamagana bahuriye hamwe bananura imitsi

Umunyamabanga Nshingwabikorwa w’Intara y’Iburasirazuba, Dr. Nyirahabimana Jeanne yasabye abagore kongera siporo bakora

Abitabiriye Siporo Rusange bari benshi

Siporo Rusange imaze kuba umuco mu Rwanda

Siporo yabaye umuti kuri ku buzima bw'abatuye mu Mujyi wa Kigali

Abana batangiye gutozwa siporo bakiri bato

Abasaga ibihumbi 10 ni bo bitabiriye Siporo Rusange mu Karere ka Ruhango