Uyu mukinnyi w’imyaka 41 yatandukanye na Los Angeles Lakers nyuma y’imyaka umunani, ahitamo Philadelphia 76ers mu gihe agiye gutangira umwaka we wa 24 muri NBA.

James yavuze ko yari yabanje gutekereza guhagarika gukina nyuma y’umwaka ushize w’imikino, ariko aza gusanga agikunda Basketball kandi agifite ubushobozi bwo guhatanira ibikombe.

Ati “Iki ni cyo cyemezo cyanjye cya nyuma. Nizeye ko nshobora gufasha Philadelphia 76ers kuba ikipe yegukana igikombe.”

Yasobanuye ko guhitamo Philadelphia bitatewe n’amafaranga cyangwa umuryango, ahubwo ko ashaka kongera guhatanira igikombe cya NBA mbere yo gusoza umwuga we.

James yegukanye ibikombe bine bya NBA, yabaye umukinnyi mwiza wa shampiyona inshuro enye ndetse ni we umaze gutsinda amanota menshi mu mateka ya NBA.

Philadelphia 76ers ibaye ikipe ya kane agiye gukinira nyuma ya Cleveland Cavaliers, Miami Heat na Los Angeles Lakers.

Byibuze mu mwaka ushize, LeBron James yashoboye gutsinda amanota 23 ​ku mukino, atanga imipira irindwi ivamo ibindi, ndetse anakora rebound esheshatu.

Mu mateka ye yabaye mu ikipe nziza y’umwaka inshuro 22, yegukana NBA inshuro enye. Ni na we uyoboye abandi gutsinda amanota menshi muri iyo shampiyona. Mu mikino 1622 yakinnye yatsinze amanota 43.440.

LeBron James yerekeje muri Philadelphia 76ers, ikipe ya nyuma agiye gukinira