00:00:00 IGIHE NETWORK KN KINYARWANDA EN ENGLISH FR FRANCAIS

IPRC Musanze yabaye indashyikirwa mu mikino ya Rwanda Polytechnic

Yanditswe na Iradukunda Olivier
Kuya 2 June 2024 saa 08:19
Yasuwe :

IPRC Musanze yahize andi makipe yegukana ibikombe bibiri mu byakiniwe mu marushwa ahuza amashuri yose ya Rwanda Polytechnic (RP) harimo icya Ruhago ndetse na Volleyball y’abagabo.

Ni mu mikino imaze hafi amezi abiri n’igice ariko ikaba yasorejwe ku kibuga cya IPRC Kigali, kuri uyu wa Gatandatu, tariki a 1 Kamena 2024, hakinwa umukino wa nyuma muri Ruhago.

Saa Cyenda za nimugoroba ni bwo IPRC Musanze yageze ku mukino wa nyuma itsinze IPRC Tumba yacakiranye na IPRC Gishari yasezereye IPRC Ngoma.

Umukino warimo ishyaka ku mpande zombi watangiye nta n’imwe ibasha kugera imbere y’izamu byoroshye ariko uko iminota yigira imbere IPRC Gishari ikinjira mu mukino, byatumye ifungura n’amazamu mbere.

Iki gitego cyatsinzwe na Kubwimana Olivier nicyo cyajyanye amakipe yombi mu karuhuko ariko Haragirimana Elysée abona icyo kwishyura mu cya kabiri bituma IPRC Musanze izamura icyizere.

Izi mbaraga kandi zatumye Haragirimana abona ikindi gitego cyahesheje intsinzi IPRC Musanze ya 2-1, ihita inegukana irushanwa rihuza amashuri ahuriye mu Ishuri Rikuru ry’u Rwanda ry’lmyuga n’Ubumenyingiro ryabaye ku nshuro ya mbere.

Si muri ruhago gusa IPRC Musanze yegukanye igikombe kuko n’icya Volleyball yahatambutse gitwari mu cyiciro cy’abagabo ariko mu bagore, uyu mukino wegukanwa na IPRC Kigali.

Muri Basketball IPRC Kigali yegukanye irushanwa mu bagabo, IPRC Huye iryegukana mu bagore.

Haragirimana Elysée witwaye neza ku mukino w’uyu munsi yagaragaje ko iyi mikino hari umusanzu ishobora kugira ku myigire y’umunyeshuri. Ati “Turanezerewe kugitwara ari ubwa mbere, ariko nanone ntitwakwibagirwa amasomo kuko iyi ni siporo iturindira ubuzima bityo tukayitwaramo neza.”

Umuyobozi wa IPRC Huye akanaba uhagarariye iyi mukino Lt. Col. Dr. Barnabe Twabagira yavuze ko imikino yabaye yasize hagaragaye abakinnyi beza mu bakobwa n’abahungu bazahagararira RP mu mikino izayihuza n’izindi kaminuza.

Umuyobozi Mukuru wa RP, Dr. Mucyo Sylvie yavuze ko imikino igira uruhare runini mu buzima bwa buri munsi akaba ariyo mpamvu yifuza ko umwaka utaha ubwitabire bwakwiyongera.

Yagize ati “Tubikora kugira ngo twidagadure, tunanure ingingo, twige gukorera hamwe no kubahiriza gahunda. Umwaka utaha rero turashaka ko ibigo byose byaseruka mu mikino yose kandi mu bahungu n’abakobwa.”

Imikino yabaye ku nshuro ya mbere ariko guhera uyu mwaka izakomeza kubaho buri mwaka n’imikino ikinwa yiyongere.

Umukino wa IPRC Gishari na IPRC Musanze werekanye abakinnyi bazahagararira RP mu mikino ihuza za kaminuza mu Rwanda
IPRC Gishari yihariye igice cya cya mbere
Umukinnyi wa IPRC Gishari yerekwa ikarita y'umuhondo
IPRC Musanze yakinnye neza mu gice cya kabiri
Umukino wari ukomeye cyane hagati ya IPRC Musanze na IPRC Gishari
Haragirimana Elysée niwe watsinze ibitego bya IPRC Musanze
Haragirimana Elysée ateruwe n'abafana ba IPRC Musanze
Umutoza wa IPRC Musanze yashimiwe bikomeye
Imikino ihuza ibigo biri muri RP igiye kujya iba buri mwaka
IPRC Huye iri mu makipe yatanze amakipe y'abakobwa
IPRC Kigali yahize andi makipe muri Baketball y'abagabo
IPRC Huye yahize andi makipe mu bagore muri Basketball
Igikombe cya Basketball mu bagore cyegukanywe na IPRC Huye
Lt. Col. Dr. Barnabé Twabagira yashimye ko imikino yagenze neza
IPRC Musanze yegukanye igikome gihuza kaminuza za Rwanda Polytechnic
Umuyobozi wa Rwanda Polytechnic, Dr Sylvie Mucyo yifuza ko ubutaha ibigo byose byatanga amakipe y'abagore
IPRC Musanze yitwaye neza muri ruhago
Abafana ba IPRC Musanze bishimira igitego cya kabiri
IPRC Kigali yahawe igihembo cyo kuba yaritabiriye imikino

Amafoto: Kasiro Claude


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .