00:00:00 IGIHE NETWORK KN KINYARWANDA EN ENGLISH FR FRANCAIS

Impamvu Manchester City yajyanye Premier League mu nkiko

Yanditswe na Iradukunda Olivier
Kuya 9 June 2024 saa 09:55
Yasuwe :

Manchester City iherutse kujya mu nkiko irega Premier League itegura Shampiyona y’Icyiciro cya Mbere mu Bwongereza kubera amategeko mashya akumira amakipe ku kuba yakoresha umutungo uko abyifuza.

Premier League yasohoye amategeko mashya mu Ukuboza 2021 ndetse aza no gusubirwamo muri Mutarama 2024 aho yatangiye gushyira imbaraga mu gukurikirana amakipe akoresha umutungo mu buryo budahwitse.

Manchester City ni imwe mu makipe yakozweho iperereza kubera kurenga ku mategeko agena ikoreshwa ry’umutungo inshuro zirenga 115 muri Premier League, byashoboraga gutuma icibwa amande, gukurwaho amanota cyangwa gukurwa muri Shampiyona y’Icyiciro cya Mbere mu Bwongereza.

Iperereza ryakozwe na komisiyo yigenga mu gihe cy’imyaka ine, ni ryo ryagaragaje amakosa yakozwe na Manchester City yarenze ku mategeko hagati 2009 na 2018.

Iyi komisiyo yashinje kandi Manchester City ko itigeze iyorohereza mu mikoranire kuva iperereza ritangiye mu Ukuboza 2018. Mu Ugushyingo 2024, ni bwo Man City izagezwaho ibyavuye mu iperereza.

Mu mwaka ushize w’imikino, iyi kipe yatwaye igikombe cya Premier League, kiba icya munani itwaye kuva mu 2008 ubwo yagurwaga na Sosiyete ya Abu Dhabi United Group.

Mu kirego cy’amapaji agera ku 165 hagaragaramo ko Man City itishimiye uko ifatwa muri Premier League kuko ibiyibaho byose ari akagambane igirirwa n’andi makipe bihanganye cyane ko imaze kwiharira ruhago y’u Bwongereza.

Man City kandi ishimangira ko nta bwisanzure amakipe 20 yo muri Premier League aba afite mu kuba yakumvikana n’abaterankunga bayo, aho yatanze urugero kuri Etihad Airways ifite amafaranga runaka itarenza kubera amategeko ariho.

Iyi komisiyo ishobora gushyiraho ibihano birimo gucibwa amande, gukurwaho amanota no kwirukana ikipe muri Premier League.

Urukiko Nkemurampaka rwa Ruhago mu Bwongereza ruzumva impande zombi ku wa Mbere, tariki ya 10 Kamena 2024, aho mu byumweru bibiri uhereye icyo gihe aribwo hazafatwa umwanzuro kuri iki kirego.

Mu 2020, Impuzamashyirahamwe y’Umupira w’Amaguru i Burayi (UEFA) yavuze ko City yarenze ku mategeko agena ikoreshwa ry’umutungo mu makipe hagati ya 2012 na 2016.

Gusa, ibihano yari yashyiriweho byo guhagarikwa imyaka ibiri mu marushanwa ya UEFA byakuweho n’Urukiko rwa Siporo ku Isi (CAS) mu mpera za 2022.

Financial Fair Play (FFP), ni amategeko yashyizweho na UEFA mu 2009 mu rwego rwo kurinda amakipe ari mu marushanwa yayo gutakaza amafaranga arenze ubushobozi bwayo, harebwe ku yinjizwa.

Muri aya mategeko, amafaranga yose ikipe yinjije n’ayo yatanze mu bikorwa bitandukanye aba agomba kumenyekanishwa ndetse amakipe agakora ku buryo ajya kungana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .