Igikombe cy’Isi cy’abatarengeje imyaka 20 cyimuriwe mu 2023

Yanditswe na Uwimana Abraham
Kuya 25 Ukuboza 2020 saa 01:47
Yasuwe :
0 0

Coronavirus ikomeje gukoma mu nkokora gahunda nyinshi z’Ishyirahamwe ry’Umupira w’Amaguru ku Isi (FIFA), kuko kuri ubu uretse ibikorwa byinshi byagiye bisubikwa, n’Igikombe cy’Isi cy’abatarengeje imyaka 20 n’icy’abatarengeje 17, byari biteganyijwe mu mwaka utaha wa 2021 byasubitswe bikimurirwa mu 2023.

Mu itangazo ryasohowe na FIFA ku wa 24 Ukuboza 2020, rivuga ko imikino y’Igikombe cy’Isi cy’abatarengeje imyaka 20 n’icy’abatarengeje imyaka 17 yari iteganyijwe mu 2021 itakibaye.

Riragira riti “Biragaragara ko uburyo ubuzima buhagaze ku Isi butaragera ku rwego rwiza rwatuma aya marushanwa yombi abasha kuba.”

FIFA yatangaje ko mu gihe aya marushanwa azaba asubukuwe mu 2023 n’ubundi azabera mu bihugu yagombaga kuberamo umwaka utaha ari byo Indonesie na Peru.

Amarushanwa menshi y’umupira w’amaguru yari ateganyijwe yagiye yimurwa bitewe n’ikwirakwira ry’icyorezo kigiteye impungenge.

Muri ayo harimo Euro ya 2020 yimuriwe mu mpeshyi y’umwaka utaha kuva ku wa 11 Kamena kugeza ku wa 11 Nyakanga 2021, Copa América nayo yimuriwe muri iyo mpeshyi, ndetse n’Igikombe cya Afurika cy’ibihugu cyimuriwe muri Mutarama 2022.

Imibare y’Ishami ry’Umuryango w’Abibumbye ryita ku Buzima (OMS), igaragaza ko kugeza ubu ku isi yose abamaze kwandura Coronavirus barenga miliyoni 79,4, abamaze kuyikira bagera kuri miliyoni 44,8 mu gihe abamaze guhitanwa nayo bagera kuri miliyoni 1,74.

Ukraine ni yo yegukanye Igikombe cy'Isi cy'abatarengeje imyaka 20 giheruka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .