00:00:00 IGIHE NETWORK KN KINYARWANDA EN ENGLISH FR FRANCAIS

Huye: Ishuri ry’umupira w’amaguru rya Paris Saint Germain ryatangijwe ku mugaragaro (Amafoto)

Yanditswe na Prudence Kwizera
Kuya 27 Ugushyingo 2021 saa 06:55
Yasuwe :

Kuri Stade ya Huye hatangijwe ishuri ry’umupira w’amaguru ry’ikipe ya Paris Saint Germain (PSG) yo mu Bufaransa rizajya ryigisha abana b’Abanyarwanda umupira w’amaguru rigafasha n’abatoza kunguka ubumenyi.

Ni ishuri ryatangijwe ku mugaragaro kuri uyu wa Gatandatu tariki ya 27 Ugushyingo 2021, ryashyizweho ku bufatanye bwa PSG n’u Rwanda.

Kugeza ubu iryo shuri ryatangiye gutoza abana bo mu Karere ka Huye bagera ku 172 bari mu byiciro icyenda, barimo abafite imyaka itandatu kugeza ku myaka 14. Harimo abakobwa 62 n’abahungu 110. Intego ni uko mu cyiciro cya mbere hazatozwa abana 200.

Bose batoranyijwe mu bigo by’amashuri bigera kuri 38 byo mu Karere ka Huye ndetse no mu bigo bisanzwe bitoza abana umupira w’amaguru.

Umwe mu bana batorezwa muri iryo shuri witwa Irafasha Deny, yavuze ko bizamufasha kuba umukinnyi mwiza uikinira amakipe akomeye ku Isi.

Ati “Bizadufasha kuko tubasha kubona ibikoresho n’imipira yo gukina n’abatoza batuzamurira impano. Urumva bizamfasha kumenya umupira w’amaguru no kubana neza na bagenzi bacu mu mahoro twishimanye. Intego ni uko nzakina muri PSG y’abakuru.”

Umunyamabanga Uhoraho muri Minisiteri ya Siporo, Shema Maboko Didier, yavuze ko iryo shuri baryitezeho kuzamura impano z’abana b’Abanyarwanda ndetse n’iz’abatoza, bityo mu Rwanda haboneke bakinnyi bakomeye bari ku rwego mpuzamahanga.

Ati “Ibikorwa by’iri shuri bizadufasha gukomeza gahunda yo gutangira umupira w’amaguru duhereye mu bana bato, ikindi kandi twiteze ni uko muri gahunda zabo bafitemo kwigisha umupira bahereye ku batoza b’umupira w’amaguru bakawumenya bakabaha ubumenyi bwo ku kibuga n’ubumenyi buherekeza abakinnyi mu mwuga wabo.”

Yavuze kandi ko abana bari kwigishwa bazakura abafite uburere, ikinyabupfura n’ubumenyi bw’umupira w’amaguru bwiza bahabwa n’inzobere z’ikipe ya PSG.

Ati “Kuko PSG ni imwe mu makipe afite ubumemyi atanga ku bana batoya mu bihugu bitandukanye ku Isi, natwe rero turizera ko ubwo bumenyi abana bacu bazabubona noneho bagakura bazi umupira, bafite uburere ndetse bubaka ubuzima bwabo.”

Umuyobozi w’amashuri y’umupira w’amaguru ya PSG ku Isi, Nadia Benmokhtar, yavuze ko bahisemo kuzana iri shuri mu Karere ka Huye kuko basanze ari ahantu heza hari ibikorwaremezo.

Ati “Twatekereje Huye mu rwego rwo kwegereza abaturage imishinga itandukanye ndetse no kuyiteza imbere nk’umwe mu mujyi ifite ibigo by’amashuri abanza n’ayisumbuye byinshi ndetse na za Kaminuza. Hari kandi ibikorwaremezo nk’ikibuga gifite n’amatara. Minisiteri ya Siporo mu Rwanda yishimye ko twahisemo Huye bituma twemeranya gutangiza ishuri rya mbere rya PSG hano muri Huye.”

Bamwe mu babyeyi bo mu Karere ka Huye bafite abana batangiye kwigishwa umupira w’amaguru, bavuga ko babyishimiye kandi bazakomeza kubashyigikira kugira ngo bige neza.

Munganyinka Esperence ati “Tukaba twarishimiye iki gikorwa n’ababyeyi kuko abana bacu bafite impano zigomba gutezwa imbere bakaba abantu bakomeye kandi igihugu cyacu na cyo kigakomera. Abana bacu turabashyigikiye kandi iyo baje kwitoza turabaherekeza tukabaha n’ibyo badukeneyeho.”

Semwiza Jean Damascène na we yavuze ko yizeye ko umwana we azavamo umukinnyi mwiza ku rwego mpuzamahanga.

Ati “Azamenya umupira w’amaguru n’amategeko awugenga kandi azavamo umukinnyi mwiza wifuzwa n’amakipe akomeue ku Isi. Mu kumushyigikira ndamuganiriza nkamugira inama kandi nkamuha ibikoresho akeneye n’amafunguro meza amutera imbaraga.”

Ambasaderi w’u Bufaransa mu Rwanda, Anfré Antoine, yavuze ko iryo shuri rizagira uruhare rukomeye mu gukomeza gushimangira umubano mwiza w’u Rwanda n’u Bufaransa wigeze kuzamba mu myaka yashize.

Yavuze ko iryo shuri rije rikurikira ibindi bikorwa bishimangira umubano w’ibihugu byombi birimo uruzinduko rw’amateka Perezida w’u Bufaransa, Emmanuel Macron yagiriye mu Rwanda muri Gicurasi 2021 rwabanjirijwe no gutorwa kwa Mushikiwabo Louise ku mwanya w’Umunyamabanga Mukuru w’Umuryango uhuza ibihugu bivuga ururimi rw’Igifaransa mu 2018.

Ikindi yagarutseho ni itabwa muri yombi rya Kabuga Felicien ukekwaho kugira uruhare muri Jenoside yakorewe Abatutsi mu 1994 ryabaye muri Gicurasi 2020 ndetse na Raporo yitiriwe Komisiyo “Duclert” y’Abashakashatsi mu mateka igaragaza uruhare rw’u Bufaransa muri Jenoside yakorewe Abatutsi yamuritswe muri Werurwe 2021.

Ati “Iri rero ni ishuri rya PSG rizakomeza gushimangira umubano w’ibihugu byombi kandi riteze imbere n’ubufatanye busanzwe hagati y’u Rwanda na PSG bwa Visit Rwanda.”

Ishuri ry’umupira w’amaguru rya PSG mu Rwanda rimaze amezi atandatu ritangiye ibikorwa byo gutoza abana.

Igikorwa cyo gutangiza iryo shuri ku mugaragaro cyitabiriwe n’icyamamare Raimundo Souza Veira de Oliveira, uzwi nka Rai, wahoze akinira ikipe ya PSG, uri mu ruzinduko rw’iminsi itatu mu Rwanda.

Abo ryigisha batoranyijwe mu bigo by’amashuri bigera kuri 38 byo mu Karere ka Huye ndetse no mu santere (centers) asanzwe atoza abana umupira w’amaguru.
Abana bo mu Karere ka Huye bishimira ko batangiye gufashwa kuzamura impano zabo
Bamwe mu bana batorezwa mu ishuri rya PSG i Huye
Ishuri ry'umupira w'amaguru rya PSG mu Rwanda rimaze amezi atandatu ritangiye ibikorwa byo gutoza abana
Kugeza ubu iryo shuri ryatangiye gutoza umupira w’amaguru abana bo mu Karere ka Huye bagera ku 172 bari mu byiciro icyenda
Kugeza ubu ryigisha abakobwa 62 n’abahungu 110
Igikorwa cyo gutangiza iryo shuri ku mugaragaro cyitabiriwe n’icyamamare Raimundo Souza Veira de Oliveira, uzwi nka Rai, wahoze akinira ikipe ya PSG
Hatanzwe n'impano mu kwishimira ishuri rya PSG ryatangijwe i Huye
Kuri Kuri Stade mpuzamahanga ya Huye hatangijwe ishuri ry’umupira w’amaguru ry’ikipe ya Paris Saint Germain
Mu Karere ka Huye hatangijwe ishuri ry’umupira w’amaguru ry’ikipe ya Paris Saint Germain yo mu Bufaransa
Souza Veira de Oliveira, uzwi nka Rai, yavuze ko yaje gushyigikira abana b'u Rwanda kugira ngo bazige neza umupira w'amaguru
Umuyobozi w'amashuri y'umupira w'amaguru ya PSG ku Isi, Nadia Benmokhtar, yavuze ko bahisemo kuzana iryo shuri mu Karere ka Huye kuko basanze ari ahantu heza hari ibikorwa remezo
Umunyamabanga Uhoraho muri Minisiteri ya Siporo, Shema Maboko Didier, yavuze ko iryo shuri baryitezeho kuzamura impano z'abana b'Abanyarwanda ndetse n'iz'abatoza
Umuyobozi wa Tekinike wa PSG mu Rwanda, Nyinawumuntu Marie Grace yavuze ko batoza abana mu byiciro icyenda bafite imyaka 6 kugeza kuri 14

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .