PMC (Piga Mingi Crew) ni irushanwa ryatangijwe nk’igitekerezo cy’abakinnyi bahoraga batsindwa kenshi muri Golf mu Rwanda, biyemeza kujya bahura hagati yabo na bo bakabona amahirwe yo kubona ibihembo.

Bitewe no gutera imbere kwaryo kandi rikitabirwa cyane, ryashyizwemo imbaraga riba irya mbere mu Rwanda, ndetse rifungurira amarembo n’abandi bose bifuza kurikina kugeza umubare uzamutse ukarenga 200 bazahatana muri uyu mwaka wa 2025.

Umuyobozi wa Sensitive Group yitiriwe iri rushanwa nyuma yo kuba umutrankunga waryo mukuru, Mugwema Wilson, yavuze ko ryavuguruwe rigashyirwamo ibindi byiciro.

Ati “PMC Sensitive Golf League ni irushanwa ubona ko rifite aho ryavuye n’aho rigana. Turashaka ko rimenyekana, abakinnyi bakaba benshi noneho mu gihe kiri imbere rikaba ryaba n’irya mbere mu karere.”

“Uyu mwaka twongeyemo icyiciro cy’abakina babigize umwuga kugira ngo na bo bahatane, ariko nanone abatarabigize umwuga na bo bazahatana. Icyo gihe umukino uzazamuka mu buryo bwo kubona impano z’abakinnyi ba Golf zizamuka, kandi n’abashoramari muri uyu mukino biyongere.”

Kapiteni wa Kigali Golf Club, Eugene Murenjekha, yashimye ko kuba irushanwa ryabonye umutrankunga mushya bigiye gufasha irushanwa.

Ati “Uyu munsi dufite umuterankunga mushya w’irushanwa. Uyu azadufasha muri byinshi bitandukanye, bityo umukino wacu uzamuke kandi tubone witabirwa n’abakinnyi benshi harimo n’abakiri bato.”

PMC Sensitive Golf League izakinwa mu bihe bitandukanye, ariko umukino wa nyuma ube tariki ya 6 Ukuboza 2025.

Irushanwa rya PMC Sensitive Golf League rizabera kuri Kigali Golf Resorts & Villas

Umuyobozi wa Sensitive Group, Wilson Mugwema, yavuze ko umukino wa Golf ugomba kwitabirwa cyane binyuze mu irushanwa rya PMC Sensitive Golf League

Kapiteni wa Kigali Golf Club, Eugene Murenjekha, yishimiye ko abatrankunga bari kwiyongera muri Golf

Abakinnyi ba Golf banyuzwe n'uko PMC Sensitive Golf League igiye kujya ikinwa n'abakinnyi barimo abakina kinyamwuga

Mu myaka iri imbere PMC Sensitive Golf League rizaba irushanwa mpuzamahanga

Kapiteni wa Kigali Golf Club, Eugene Murenjekha, yavuze ko PMC Sensitive Golf League ari ryo rushanwa ryitabirwa cyane mu Rwanda

Jenny Linda Kalisa ari mu bakinnyi b'abagore bitwara neza muri Golf mu Rwanda

Umukino wa Golf mu Rwanda uri gutera imbere