Nk’uko bisanzwe bikorwa buri mwaka, ku wa 28 Kanama 2026, urubuga rwa Forbes rwashyize hanze urutonde rw’abakinnyi ba Tennis binjiza amafaranga menshi ku Isi, yaba ayo bakura mu kibuga no hanze yacyo.

Mu busesenguzi bwakozwe, Forbes States yasanze abakinnyi 10 ba mbere binjiza agatubutse ku Isi bageze kuri miliyoni 333$. Ibi bivuze ko yazamutseho 17% ugererayije na miliyoni 285$ yari yitezwe.

Ku nshuro ya mbere kandi mu mateka y’uyu mukino wa Tennis, abakinnyi b’abagore ni bo benshi kuri uru rutonde, aho bagera kuri batandatu mu gihe abagore ari bane.

Nimero ya mbere winjiza agatubutse ku Isi ni Jannik Sinner uheruka kuva muri US Open, aho yinjiza miliyoni 58$ mu mwaka ushize. Aya arimo miliyoni 23$ akorera mu kibuga na miliyoni 35$ hanze y’ikibuga.

Ni umukinnyi wa kane uyoboye urutonde mu myaka 20 Forbes imaze irukora. Abandi ni Roger Federer wabikoze imyaka 15, Novak Djokovic na Carlos Alcaraz.

Umunya-Espagne, Alcaraz, ari ku mwanya wa kabiri na miliyoni 53,7$, arimo miliyoni 15,7$ yo mu kibuga na miliyoni 38$ yo hanze y’ikibuga.

Serena Williams ni uwa gatatu kuri uru rutonde, akaba uwa mbere mu bagire binjiza agatubutse ku Isi muri Tennis, aho yinjiza miliyoni 40,1$ harimo 0,1$ yinjiza mu kibuga kuko asa n’uwahagaritse gukina, ndetse na miliyoni 40$ yinjiza hanze y’ikibuga. Muri rusange uyu mukinnyi afite umutungo wa miliyoni 400$.

Ni mu gihe kuko uyu mukinnyi agikorana n’ibigo bikomeye nka Nike, Heineken, Factor na Ro.
Aryna Sabalenka ari ku mwanya wa kane na miliyoni 36,1$, harimo miliyoni 13,1$ akura mu kibuga na miliyoni 23$ zo hanze y’ikibuga.

Coco Gauff yinjiza miliyoni 35,5$ harimo miliyoni 7,5$ yo mu kibuga na miliyoni 28$ yo hanze y’ikibuga.

Novak Djokovic uri gukina marushanwa make kuko asa n’uri kugana ku iherezo ryo gukina uyu mukino, yinjiza miliyoni 5,2$ mu kibuga na miliyoni 25$ yo hanze y’ikibuga. Ibi bimushyira ku mwanya wa gatandatu na miliyoni 30,2$.

Qinwen Zheng ari ku mwanya wa karindwi na miliyoni 22,6$, Iga Swiatek akaba ku mwanya wa munani na miliyoni 20,5$, Alexander Zverev akaba ku mwanya wa cyenda na miliyoni 18,7$, mu gihe uwa 10 ari Elena Rybakina na miliyoni 17,4$.

Serena Williams ni we mugore wa mbere winjiza amafaranga menshi mu Tennis

Carlos Alcaraz ari ku mwanya wa kabiri mu bakinnyi ba Tennis bakorera amafaranga menshi

Jannik Sinner yabaye umukinnyi wa mbere muri Tennis winjiza amafaranga menshi