Ni stade itera ubwoba igatera n’ishema abantu benshi icyarimwe. Si ukubera abafana ba Mexique gusa bazaba bayuzuye cyangwa ubutumburuke bwayo butuma ishyuha, bushobora kugora abakinnyi batabumenyereye kubera ikirere, ahubwo ni kubera amateka yayo aremereye ku mupira w’amaguru.

Azteca ni yo stade yabereyemo imwe mu mikino ikomeye kurusha indi mu mateka ya ruhago. Ni ho Pelé yatwariye Igikombe cy’Isi cya gatatu mu 1970, Brésil ikina umukino mwiza benshi batazibagirwa. Ni na ho Diego Maradona yakoreye amateka mu 1986, ubwo yatsindaga u Bwongereza ibitego bibiri byamamaye, kimwe cyiswe “Hand of God”, ikindi cyitwa “Goal of the Century”.

Ni yo mpamvu umukino w’u Bwongereza na Mexique urenze kuba umukino usanzwe. Abongereza bagiye gukinira ahantu habibutsa kimwe mu bikomere bikomeye mu mateka yabo y’Igikombe cy’Isi.

Gary Stevens, wahoze akinira u Bwongereza mu 1986, yavuze ko kwinjira muri Azteca byabaga biteye ubwoba. Yibuka ko abakinnyi bavaga mu rwambariro ruri hasi, banyura ahantu hijimye kandi hakonje, mbere yo gusohokera mu rumuri, ubushyuhe n’urusaku rw’abafana.

Umutoza w’u Bwongereza, Thomas Tuchel, na we azi neza uburemere bw’iyi stade. Yavuze ko gukina na Mexique muri Mexique ari umwe mu mikino myiza ikipe ishobora kubona, ariko yanagarutse ku mateka ya 1986 nk’ikintu kitazabura kugaruka mu bitekerezo.

Azteca yubatswe mu 1966, ivugururwa inshuro nyinshi. Nubwo FIFA ishaka kuyita “Mexico City Stadium” ku mpamvu z’ubucuruzi, abakunzi ba ruhago ntibabishaka, barashaka ko ikomeza kwitwa Azteca.

Azteca ni yo yakiniwemo umukino ubanza Mexique yakinnye na Afurika y'Epfo mu gikombe cy'Isi

Igitego cyiswe The Hand of God cya Maradona yagitsindiye kuri iyi stade

Diego Maradona yatwariye Igikombe cy'Isi kuri iyi stade

Mu 1986 ni kuri iyi stade Argentine yatwariye Igikombe cy'Isi

Brésil yakiniye kuri iyi stade umwe mu mikino myiza yabayeho mu mateka mu 1970

Azteca ni uku isigaye imeze nyuma yo kuvugururwa inshuro nyinshi

Mexique izaba ikinira imbere y'abafana bayo