00:00:00 IGIHE NETWORK KN KINYARWANDA EN ENGLISH FR FRANCAIS

Urunturuntu hagati y’ikipe ya Adrien Niyonshuti na Ferwacy

Yanditswe na Byiringiro Osée Elvis
Kuya 24 August 2022 saa 06:12
Yasuwe :

Hashize iminsi Ishyirahamwe ry’Umukino w’Amagare mu Rwanda (Ferwacy) rifitanye ibibazo n’ikipe ya Adrien Niyonshuti Cycling Academy (ANCA) yahoze iri mu nshingano zayo.

Ishyirwaho rya ANCA byari ku mpamvu zo guteza imbere umukino w’amagare uhereye mu bakiri bato, by’umwihariko abo mu karere ka Rwamagana, hasanzwe ikipe ya Les Amis Sportif Niyonshuti yakinnyemo.

Mu rwego rwo gutera ishyaka abo bana no kubaha uwo bafata nk’icyitegererezo, iri rerero ryiswe amazina ya Niyonshuti nk’umwe mu bakinnyi ukomeye wabayeho mu mateka y’umukino w’amagare mu Rwanda.

Kwihuza kwa Les Amis Sportif n’iri rerero, ntibyatinze kuko baje gushwana ibyari irerero bihinduka ikipe ukwayo yitwa Adrien Niyonshuti Cycling Academy (ANCA) muri 2019.

Kuva ubwo ANCA yatangiye urugendo rwo gushaka kuba umunyamuryango wa Ferwacy gusa n’ubu ntibirakunda.

Umuyobozi wa ANCA, Ishimwe Nkurayija Jean Hubert, ngo ntiyumva impamvu batakirwa nk’umunyamuryango, nyamara Ferwacy yo ivuga ko itabakira kuko bafitanye ibibazo by’ibikoresho n’abakinnyi n’umunyamuryango wayo Les Amis Sportif.

Ku ruhande rwa ANCA yo ikavuga ko niyo ikibazo koko cyaba gihari bagakwiye kwakirwa kuko abakinnyi bavuga bayo bose atari aba les Amies Sportif bityo bumva bagakwiye kwakirwa.

Iyi kipe igaragaza ko atari ikibazo bafitanye na Les Amis Sportif gituma batakirwa nk’umunyamuryango, ahubwo ari ikibazo Ferwacy ifitanye na Team Africa Rising (TAR) y’uwahoze ari umutoza w’Ikipe y’Igihugu y’Amagare Jonathan Boyer.

Ikipe ya ANCA ishinjwa gutwara abakinnyi n’amagare bya Les Amis Sportif nkuko bigaragara mu ibaruwa Ferwacy yandikiye ANCA kuwa 29 Kamena 2022, ubwo yasabaga uburenganzira bwo kwitabira amarushanwa ategurwa n’iri shyirahamwe mu mwaka 2021/22.

ANCA yo ivuga ko nta bikoresho ndetse n’abakinnyi ba Les Amis Sportif batwaye kuko kuva mu ntangiriro aya makipe yombi yari umushinga umwe.

Ikomeza ivuga ko ikibazo cyabayeho ari ugucunga nabi ibyo bikoresho kwa Les Amis Sportif.

Mu ngero batanga, bavuga ko mu magare atandatu aheruka gutangwa hasigaye igare rimwe gusa kandi naryo ari uko ribitswe na ANCA.

Urundi rugero ni imodoka yari iya Les Amis Sportif yaje gukora impanuka maze Niyonshuti ayikoresha ibihumbi bine by’amadorali. Ngo nayo yaje kugurishwa ANCA itabizi kandi ari umushinga umwe.

Ahanini ibibazo byiyongereye ubwo Rugambwa Jean Baptiste wari umuyobozi n’umutoza wa Les Amis Sportif yitabaga Imana muri 2018.

ANCA yemera ko hari abakinnyi bavuye muri Les Amis Sportif bayijemo nta baruwa bahawe, ngo ariko ntibikwiriye kuba ikibazo kuko ariko n’ahandi hose bisanzwe bikorwa.

Na Ferwacy irashinjwa…

ANCA ishinja Ferwacy kwanga kuyitumira mu marushanwa, gutinda kuyemeza nk’umunyamurwango wayo ndetse no kutitabira kw’iri shyirahamwe mu bikorwa ANCA yateguye.

Umuyobozi w’Ishyirahamwe ry’Umukino w’Amagare mu Rwanda (Ferwacy), Murenzi Abdallah, yabwiye IGIHE ko gutumira ANCA ari ubushake bwayo kuko atari umunyamuryango bityo bitagakwiye kuba itegeko.

Gusa akomeza avuga ko mu marushanwa ataha ishobora kuzatumirwa kubera ko ikibazo bari bafitanye na Les Amis Sportif bagihaye akanama nkempuramaka kari kugiha umurongo.

Ku kijyanye no kutitabira ubutumire bw’iyi kipe, Murenzi yabwiye IGIHE ko Federasiyo itamenyeshwa, ahubwo iba igomba kuba umufatanyabikorwa cyane ko ari rwo rwego tekinike mu gihugu rushinzwe uwo mukino.

ANCA ivuga ko ihorwa kuba iterwa inkunga na Team Africa Rising (TAR) y’uwahoze ari umutoza w’Ikipe y’Igihugu y’Amagare Jonathan Boyer.

Murenzi yagize ati “Nibyo koko icyo kibazo kirahari kimaze imyaka kuko nagiye ku buyobozi 2019 ngisanga. TAR yashinjaga Ferwacy kutagaragaza neza imicungire y’umutungo na Ferwacy nayo ikavuga uko.”

Akomeza avuga ko byose byakomotse ku masezerano Umuyobozi wa TAR, Jonathan Boyer, yagiranye na Minisiteri ya Siporo na Ferwacy ubwo yari atashye muri 2017. Amasezerano avuga ko Federasiyo izakomeza gucunga ibikorwa TAR yacungaga hanyuma TAR nayo igakomeza gushakira inkunga umukino w’amagare.

Iyo nkunga yabarirwaga hagati ya miliyoni 100 na 150 Frw ku mwaka, TAR ikayashyikiriza federasiyo.

Murenzi akomeza avuga ko kuva yajya ku buyobozi iyo nkunga ntayo yigeze abona kandi ko iyo marushanwa yo gushaka inkunga yakomeje gukorwa.

TAR ivuga ko kubera imicungire mibi y’umutungo itazongera kunyuza inkunga muri federasiyo ahubwo izajya iyihera amakipe ari naho ANCA yaziyemo.

ANCA ni imwe mu makipe yatangaga icyizere muri siporo y'amagare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .