Ku wa Gatatu, tariki ya 26 Gashyantare 2025, nibwo isiganwa rya Tour du Rwanda 2025 ryari ryakomeje gukinwa ku Gace karyo ka Gatatu, katurutse i Musanze kerekeza i Rubavu.

Ubwo ryari rigeze i Busogo, Mugisha Moïse wa Team Rwanda yakiriwe n’umuryango we aho umugore we n’abana babo b’impanga baje kumushyigikira baranamusuhuza.

Hari benshi bafashe iki gikorwa nk’ubunyamwuga buke, bumva ko yari gukomezanya na bagenzi be agakomeza guhatana, akareba ko byibuze kakegukanwa n’Abanyarwanda.

Uyu mukinnyi yavuze ko guhagarara kuri we nta kibazo byari bimuteye, kuko umuryango we aricyo kintu aha agaciro kurusha ibindi ndetse yari yizeye neza ko aza kongera agafata abo bari kumwe.

Ati “Umuryango uza mbere kandi ntekereza ko umukino w’amagare ari ukwishimisha. Uyu mukino ni siporo ndetse ni umuryango. Iyi ni yo mpamvu nabonye umuryango wanjye ngahagarara ngo mbasuhuze.”

“Ndi umukinnyi w’umunyamwuga, ntabwo mwagahangayikishijwe n’uko nahagaze kuko narinzi ko nakongera nkihuta ngafata igikundi.”

Mugisha yongeyeho ko abakinnyi ba Team Rwanda biteguye kugerageza kwegukana agace kamwe mu dusigaye bahereye ku ka Kane katurutse mu Karere ka Rubavu kerekeza i Karongi.

Uyu mukinnyi ni we Munyarwanda rukumbi wabashije kwegukana agace muri Tour du Rwanda ya 2,1. Ibi yabikoze mu 2022 akinira ProTouch.

Mugisha Moïse yahagaze mu isiganwa hagati asuhuza umuryango we

Mugisha Moïse ni we Munyarwanda wenyine wegukanye agace muri Tour du Rwanda yo ku rwego rwa 2,1

Mugisha Moïse yahagaze ashaka gusuhuza abana be b'impanga

Mugisha Moïse yahagaze yizeye ko aza gusubira mu isiganwa agafata igikundi