Munyaneza Didier yahembwe nk’umukinnyi muto w’irushanwa rya Grand Prix Chantal Biya 2019

Yanditswe na Eric Tony Ukurikiyimfura
Kuya 20 Ukwakira 2019 saa 05:45
Yasuwe :
0 0

Munyaneza Didier ni we Munyarwanda waje hafi, asoreza ku mwanya wa kane mu isiganwa ry’amagare rya Grand Prix Chantal Biya ryasojwe kuri iki Cyumweru muri Cameroun.

Kuri uyu wa 20 Ukwakira, ni bwo hakinwe agace ka kane, ari nako ka nyuma muri iri rushanwa ryitiriwe umugore wa Perezida wa Cameroun, Paul Biya.

Abakinnyi bakoze intera y’ibilometero 166.2, aho bahagurukiye muri Sangmelima, baca mu murwa mukuru Yaoundé mbere yo gusoreza i Douala.

Umunyarwanda Munyaneza Didier warushwaga amasegonda umunani yagiyemo ku gace ka mbere, ntiyashoboye kuyakuramo kuko yageze ku murongo ari uwa gatanu, yakoresheje ibihe bimwe n’Umunya-Algerie Lagab Azzedine wari uyoboye, uyu we wabaye uwa 11.

Munyaneza yakoresheje amasaha ane, iminota 15 n’amasegonda 38, ibihe bingana n’iby’abandi bakinnyi 22 bose bageranye ku murongo, barimo Nzafashwanayo Jean Claude wabaye uwa gatandatu na Ruberwa Jean Damascène wa 15.

Aka gace ka nyuma kegukanwe n’Umunya-Algèrie Hamza Yacine.

Nyuma yo guteranya uduce tune twakinwe mu isiganwa ry’uyu mwaka, Lagab Azzedine yegukanye Grand Prix Chantal Biya 2019 nyuma yo gukoresha amasaha 13, iminota umunani n’amasegonda 42.

Canecky Marek watwaye agace ka kabiri, Hofman Arjan na Munyaneza Didier ni bo bamukurikiye ku rutonde rusange, abarusha amasegonda umunani gusa.

Nzafashwanayo Jean Claude yasoje irushanwa ku mwanya wa 15 arushwa amasegonda 44, Manizabayo Eric aba uwa 21 arushwa umunota umwe n’amasegonda 45.

Byukusenge Patrick yabaye uwa 24 mu gihe Ruberwa Jean Damascène yabaye uwa 26 mu bakinnyi 33 basoje isiganwa ryose.

Munyaneza Didier ‘Mbappe’ w’imyaka 21, ni we watashye yambaye umwambaro w’umukinnyi muto wigaragaje mu irushanwa.

Munyaneza Didier yahembwe nk’umukinnyi muto w’irushanwa rya Grand Prix Chantal Biya 2019
Ikipe y'u Rwanda yakinnye Grand Prix Chantal Biya 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza