00:00:00 IGIHE NETWORK KN KINYARWANDA EN ENGLISH FR FRANCAIS

Mugisha Moïse yegukanye Tour du Cameroun 2022

Yanditswe na Israel Ishimwe
Kuya 12 June 2022 saa 03:19
Yasuwe :

Umunyarwanda Mugisha Moïse ukinira Ikipe y’Igihugu ’Team Rwanda’ yegukanye Tour du Cameroun 2022 yasorejwe mu Mujyi wa Yaoundé, kuri iki Cyumweru, tariki ya 12 Kamena 2022.

Mugisha yegukanye Tour du Cameroun akoresheje 26h34’24’’ ku ntera y’ibilometero 1066.2. Yakurikiwe na Andreev Yordan wa Team Martigues SC yarushije amasegonda 32 n’Umunya-Cameroun, Artuce Jodele Tella ukinira SNH Vélo Club yasize ho amasegonda 33.

Agace ka Munani ari na ko ka nyuma kakinwe kuri uyu munsi, abasiganwa bava Ebolowa bagana i Yaoundé ku ntera y’ibilometero 151.4 kegukanywe n’Umunya-Maroc El Arbaoui Adil wakoresheje 3h40’17", arusha Mugisha Moïse amasegonda 18.

Mugisha Moïse yafashe umwambaro w’umuhondo uhabwa uyoboye urutonde rusange nyuma y’Agace ka Karindwi kakiniwe mu mihanda ya Boumnyebel na Mbalmayo ku ntera y’ibilometero 112.6.

Aka gace kegukanywe na Taillandier Axel ukinira Team France Défense, yakoresheje 2h48’14’’, arusha Mugisha wa kane amasegonda atatu.

Ku rutonde rusange, Mugisha yahise afata umwanya wa mbere nyuma yo gukuramo ikinyuranyo cy’iminota itatu n’amasegonda 30 yarushwaga na Andreev Yordan, amusiga 32".

Ku munsi wa nyuma, Mugisha yakinnye aharanira ko ibihe byari hagati ye n’umukurikiye bitavamo akaba yamwambura umwambaro uhabwa uwa mbere. Yahiriwe no kubigeraho, asesekara i Yaoundé ari imbere mu bakoresheje ibihe bito mu minsi umunani isiganwa ryamaze.

Muri iri siganwa, u Rwanda rwongeye kwigaragaza nk’igihugu gifite ahazaza, rwasoje ku mwanya wa kane mu makipe umunani yaryitabiriye.

Mu bandi bakinnyi baruhagarariye, Munyaneza Didier yasoje ku mwanya wa karindwi, Muhoza Eric [12], Nzafashwanayo Jean Claude [25], Niyonkuru Samuel [27] na Tuyizere Etienne [33].

Abakinnyi 44 ni bo basoje iri siganwa rizenguruka Cameroun ryakinwaga ku nshuro ya 18.

Akimara kuryegukana, Mugisha yavuze ko ashimishijwe n’intsinzi yabonye. Yatangarije CRTV SPORTS ati “Nzagaruka hano mu 2023 gutwara irindi siganwa. Twakinnye tugerageza guhatana cyane, twatsinze.’’

Mugisha w’imyaka 25 yatangiye umwaka ahirwa cyane! Ni we Munyarwanda wa mbere wegukanye Agace ka Tour du Rwanda kuva igeze ku rwego rwa 2,1 mu 2019. Yabigezeho ku wa 27 Gashyantare 2022, ubwo iri siganwa rizenguruka igihugu ryasozwaga abakinnyi bazenguruka Umujyi wa Kigali ku ntera y’ibilometero 75,3.

Nyuma y’aho yegukanye na Tour du Cameroun 2022. Iri rushanwa yegukanye ni irya kabiri rikomeye yatwaye muri iki gihugu nyuma ya Grand Prix Chantal Biya afite mu 2020.

Ni ku nshuro ya kabiri, Tour du Cameroun yegukanywe n’Umunyarwanda, uwaherukaga kubigeraho ni Uwizeyimana Bonaventure wabikoze mu 2018.

Mugisha Moïse yegukanye Tour du Cameroun 2022, Rwanda Nziza iraririmbwa
Uwo musore w'imyaka 25 yabaye Umunyarwanda wa kabiri wegukanye Tour du Cameroun 2022 nyuma ya Uwizeyimana Bonaventure wabikoze mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .