Criterium de Kigali iri ku ngengabihe ya “Rwanda Cycling Cup” yakiniwe mu muhanda wa BK Arena - Kimironko Simba - KIE - RRA - Airtel - Stade Amahoro - BK Arena, abakinnyi bazenguruka intera y’ibilometero bine.

Uwera Aline wa Bugesera Cycling Team ni we wabanje gusogongera ku ntsinzi ya mbere y’umunsi, ahigika abo basiganwe hamwe mu cyiciro cy’abangavu aho yakoresheje isaha imwe, iminota 50 n’amasegonda 22 ku ntera y’ibilometero 62.

Yakurikiwe na bagenzi be bakinana; Byukusenge Mariate, Ingabire Domina na Iragena Charlotte abasize amasegonda 12 mu gihe Ishimwe Gisèle wa Cine Elmay yageze ku murongo yasizwe iminota 27 n’amasegonda 38.

Iki cyiciro cyakurikiwe n’icya basaza babo, na bo bakinnye intera ingana n’ibilometero 62 nk’uko byagenze ku bagore. Mu ngimbi zitarimo Shyaka Janvier na Tuyishime Hashim bakundaga kwiharira intsinzi ariko ubu bakaba barazamutse mu bakuru, hatsinze Nizeyimana Fiacre wa Nyabihugu Cycling Team wakoresheje isaha, iminota 34 n’amasegonda atatu.

Nizeyimana yagereye ku murongo rimwe na Tuyipfukamire Aphrodis bakinana, Ntirenganya Moses (Les Amis Sportifs), Nshutiraguma Kevin wa Cine Elmay na Twagirayezu Didier wa Kayonza Young Stars Cycling.

Mu bagore, wabaye umunsi udasanzwe kuri Mwamikazi Djazilla wabonye intsinzi ye ya mbere muri iki cyiciro nyuma yo gukoresha imbaraga nyinshi agatanga ku murongo Ntakirutimana Marthe na Mukashemana Josiane wa Benediction Club nubwo bose bakoresheje isaha imwe, iminota 50 n’amasegonda 29.

Mwamikazi wujuje imyaka 19 kuri uyu wa Gatandatu, yaririmbiwe ubwo yahembwaga nk’umukinnyi watsinze mu bagore ndetse akaba ari na we watsindiye ibihumbi 30 Frw ya ‘sprints’ zari mu muhanda wifashishijwe mu isiganwa.

#IgareNiUrukundo

Mwamikazi Djazilla aririmbiwe yifurizwa isabukuru nziza y'amavuko nyuma yo gutsinda #CriteriumdeKigali mu bagore.

Ni ubwa mbere atsinze mu bakuru kuko yujuje imyaka 19 kuri uyu wa Gatandatu.

Yahembwe n'abarimo Hadi Janvier wakiniye Team Rwanda, ubusanzwe uba… pic.twitter.com/PpYyfLs3gl

— IGIHE Sports (@IGIHESports) September 9, 2023

Icyiciro cy’abagabo n’abasore batarengeje imyaka 23 cyari cyitabiriwe n’abakinnyi 45 bazengurutse inshuro 22 zingana n’ibilometero 86, harimo igice cyakinwe mu mvura bigatuma abagera kuri 11 barimo batatu ba Java-Inovotec badasoza.

Mugisha Moïse watsinze nyuma yo gukoresha amasaha abiri, umunota n’amasegonda atanu, ni we wayoboye isiganwa igihe kirekire nubwo hari aho yageze akagendana n’abarimo Hakizimana Félicien na Niyonkuru Samuel wa Les Amis Sportifs, uyu wa nyuma wabaye uwa kabiri yasizwe amasegonda ane.

VIDEO: Ibyishimo bya Mugisha Moïse ubwo yatsindaga #CriteriumdeKigali.

🎥@cyclingrwanda pic.twitter.com/bHWGLXa0bC

— IGIHE Sports (@IGIHESports) September 9, 2023

Areruya Joseph ukinira Java-Inovotec, utaherukaga kugaragara aho bahembera, yabaye uwa gatatu yasizwe amasegonda 55, ahigika Uwiduhaye, Hakizimana Félicien na Tuyizere Hashim bamukurikiye.

Munyaneza Didier ‘Mbappé’ usanzwe atoza Java-Inovotec, yongeye gukina nk’uko yabikoze muri “Legacy Sakumi Anselme Race” yabaye muri Nyakanga, asoreza ku mwanya wa munani yasizwe umunota n’amasegonda 35.

Muhoza Eric waguye bamaze kuzenguruka inshuro ebyiri, agasubira mu isiganwa hasigaye kuzengurika inshuro 16, yasoreje ku mwanya wa 31 yasizwe iminota 19 naho Byukusenge Patrick na we wagize ikibazo cy’igare, aba uwa 25 yasizwe iminota irindwi n’amasegonda 35.

Nta mpamvu yo kurekura!

Muhoza Eric uri kuganira n'Umutoza wa Team Rwanda, David Louvet, yemerewe gusubira mu isiganwa.

Mugisha Moïse n'abandi bari imbere bamaze kuzenguruka inshuro 7/22 muri #CriteriumdeKigali. pic.twitter.com/JhXNsTNvtC

— IGIHE Sports (@IGIHESports) September 9, 2023

Senderi International Hit na Mico The Best basusurukije abafana b'amagare bitabiriye #CriteriumdeKigali.

Abahanzi bombi baherekeje uruganda Ingufu Gin Ltd rutera inkunga amasiganwa y'amagare y'imbere mu gihugu. pic.twitter.com/kDZ3nW9lyn

— IGIHE Sports (@IGIHESports) September 9, 2023

“Criterium de Kigali” yabaye isiganwa rya mbere ryateguwe n’Ishyirahamwe ry’Umukino w’Amagare mu Rwanda (FERWACY) nyuma yo kwegura kwa Murenzi Abdallah wari Perezida waryo ku wa 31 Kanama 2023.

Nizeyimana Fiacre wa Nyabihu Cycling Team ni we watsinze mu ngimbi

Mwamikazi Djazilla wujuje imyaka 19 kuri uyu wa Gatandatu, yabonye intsinzi ya mbere mu bagore

Mwamikazi yakoresheje imbaraga yivuye inyuma kugira ngo ahigike Ntakirutimana Marthe na Mukashema Josiane

Umuyobozi Mukuru wa Ingufu Gin Ltd, Ntihanabayo Samuel, yitegura gutangiza isiganwa ry'abagabo ubwo yari kumwe na Visi Perezida wa FERWACY, Karangwa François

Isiganwa ry'abagabo n'abatarengeje imyaka 23 ryitabiriwe n'abakinnyi benshi

Mugisha Moïse yayoboye isiganwa igihe kirekire

Imvura yaguye i Remera yatumye bamwe mu bakinnyi badasoza

Byukusenge Patrick (uri imbere) ari mu bakinnyi bagowe n'ubunyereri, ahindura igare

Hari aho isiganwa ryageze riyoborwa n'abakinnyi benshi bagendera hamwe ku muvuduko uri hejuru

Abakinnyi batatu ba mbere mu ngimbi barimo babiri ba Nyabihu Cycling Team

Bugesera Cycling Team yihariye imyanya itatu ya mbere mu bangavu

Mwamikazi Djazilla yaririmbiwe ku isabukuru ye y'amavuko yanabonyeho intsinzi ya mbere mu bagore

Mwamikazi, Ntakirutimana na Mukashema ni bo babaye aba mbere mu bagore

Mugisha Moïse yatanze abandi gusoza kuzenguruka inshuro 22 zari zateganyijwe

Mugisha akomerwa amashyi nyuma yo kubona intsinzi yakoreye kuri uyu wa Gatandatu

Niyonkuru Samuel yabaye uwa kabiri yasizwe amasegonda ane

Areruya Joseph anyonga igare n'imbaraga kugira ngo atange abandi ku murongo

Areruya wabaye uwa gatatu, yakurikiwe n'abarimo Hakizimana Felicien

Mugisha Moïse yahembwe ibihumbi 30 Frw byo kubona amanota menshi ya 'sprints' mu muhanda bakiniyemo

Areruya Joseph yongeye kuzamuka aho bahembera nyuma y'igihe kinini adahagaze neza

Umuyobozi Mukuru wa Ingufu Gin Ltd, Ntihanabayo Samuel ashimira Areruya Joseph wabaye uwa gatatu

Umuyobozi Mukuru wa Ingufu Gin Ltd, Ntihanabayo Samuel na Visi Perezida wa Mbere wa FERWACY, Karangwa François, ni bo bahembye Mugisha, Niyonkuru na Areruya nk'abakinnyi batatu ba mbere mu bagabo

Visi Perezida wa Kabiri wa FERWACY, Kayirebwa Liliane na Rwema Denis ushinzwe Imenyekanishabikorwa muri Ingufu Gin Ltd bahemba Niyonkuru (hagati), Hakizimana (ibumoso) na Tuyizere (iburyo) bitwaye neza mu batarengeje imyaka 23

Rwema Denis ushinzwe Imenyekanishabikorwa muri Ingufu Gin Ltd ashimira Tuyizere Hashim uri mu bitwaye neza mu batarengeje imyaka 23 aho yabaye uwa gatatu

Visi Perezida wa Mbere wa FERWACY, Karangwa François, na we yashimiye Areruya Joseph utaherukaga kugaragara aho bahembera

Mugisha Moïse ashimirwa na Visi Perezida wa Mbere wa FERWACY, Karangwa François, nyuma yo kwegukana Criterium de Kigali

Amafoto: Shema Innocent