00:00:00 IGIHE NETWORK KN KINYARWANDA EN ENGLISH FR FRANCAIS

Imibare yihariye kuri Tour du Rwanda 2021

Yanditswe na Eric Tony Ukurikiyimfura
Kuya 2 Gicurasi 2021 saa 07:21
Yasuwe :
0 0

Guhera kuri iki Cyumweru tariki ya 2 kugeza ku ya 9 Gicurasi 2021, mu Rwanda hazabera isiganwa rizenguruka igihugu "Tour du Rwanda" rigiye kuba ku nshuro yaryo ya 13 kuva ribaye mpuzamahanga.

Ni isiganwa rya gatatu rigiye kuba riri ku rwego rwa 2,1 nyuma y’abiri aheruka, yombi yegukanywe n’Abanya-Erythrée; Merhawi Kudus (mu 2019) na Natnael Tesfazion (mu 2020), bombi batazakina iry’uyu mwaka.

Uretse u Rwanda ruzaba rufitemo abenegihugu 15, u Bufaransa buzaba bufitemo abakinnyi icyenda, ni ikindi gihugu kizaba gifite abenegihugu benshi muri iri rushanwa rigizwe n’uduce umunani tuzaba tugizwe n’ibilometero 913,3 byose hamwe.

Imibare y’ingenzi muri Tour du Rwanda 2021:

1- Ku nshuro yacyo ya mbere, ikigo gikora ibijyanye no guteza imbere ubukerarungo cya Visit Rwanda, kizahemba umukinnyi uyoboye abandi mu isiganwa, ahabwe umwenda w’umuhondo.

Muri uyu mwaka nta mwambaro uzatangwa wagenewe umukinnyi wegukanye agace ubusanzwe watangwaga na SKOL yikuye mu irushanwa ndetse n’uw’Umunyarwanda witwaye neza, watangwaga na Gorilla Games.

2- Mu irushanwa ry’uyu mwaka, hari abakinnyi bo mu bihugu bibiri bishya bitari bisanzwe byitabira Tour du Rwanda ari byo Roumanie na Singapour.

3- U Rwanda ruzaba rufitemo amakipe atatu : Team Rwanda, Benediction Ignite na SACA.

3- Inshuro irushanwa rigiye kuba riri ku rwego rwa 2,1 kuva mu 2019.

4- Ni amakipe mashya agiye gukina mu 2021: B&B Hotels (France), Team Medellin (Colombie), Tarteletto-Isorex (mu Bubiligi), Wildlife Generation Pro Cycling (USA).

5- Umubare w’abakinnyi buri kipe ikinisha muri Tour du Rwanda

5- Uduce twinshi twegukanywe n’abakinnyi babiri: Ndayisenga Valens ndetse n’umunya-Eritrea Metkel Eyob uzitabira iry’uyu mwaka.

6- Abakinnyi batandatu bigeze gutwaraho agace k’isiganwa muri Tour du Rwanda, no muri uyu mwaka wa 2021 baritabira (mu 2020 no mu 2019 bari icyenda): Eyob (5), Lagab (4), Nsengimana (4), Restrepo (4), Areruya (3), Mugisha Samuel (1).

8- Umubare w’uduce tugize Tour du Rwanda 2021

10- Umubare w’inshuro nyinshi zitabiriwe n’umukinnyi umaze gukina Tour du Rwanda kenshi, akaba ari Umunyarwanda Nsengimana Jean Bosco uyikina uyu mwaka, aho yahereye mu 2012. Yahigitse Gasore Hategeka wayikinnye hagati ya 2009 na 2017.

15- U Rwanda ni cyo gihugu kizaba gihagarariwe n’abakinnyi benshi (15) muri Tour du Rwanda 2021, bagabanyije mu makipe atatu (Team Rwanda, Benediction Ignite na SACA).

U Bufaransa burugwa mu ntege n’abakinnyi icyenda bagabanyije mu makipe abiri (B&B Hotels naTotal Direct Energie) mu gihe Erythrée na Colombie bifitemo abakinnyi batandatu.

16- Umubare w’amakipe azakina Tour du Rwanda 2021.

18- Merhawi Kudus ni we mukinnyi muto wegukanye agace ka Tour du Rwanda. Yabikoze mu 2012 ubwo yari afite imyaka 18 n’amezi 10. Abandi bageze kuri ibi bafite imyaka mike ni Natnael Berhane wari ufite imyaka 20 n’amezi 11 mu 2010 ndetse na Ndayisenga Valens wari ufite imyaka 20 n’amezi 11 mu 2013.

20- Mugisha Samuel ni we mukinnyi muto wegukanye Tour du Rwanda, aho mu 2018 yayitwaye afite imyaka 20 n’amezi umunani. Mu 2014, Ndayisenga Valens yayitwaye afite imyaka 21 n’amezi 11, mu 2017 Areruya Joseph ayitwara afite imyaka 21 n’amezi 11, mu 2010 Daniel Teklehaimanot yayitwaye afite imyaka 22 mu gihe Nsengimana Jean Bosco yayitwaye mu 2015 afite imyaka 22.

24- Abakinnyi bavuye mu bihugu 24 ni bo bazitabira Tour du Rwanda igiye kuba ku nshuro ya 13. Iri ni irushanwa rya kabiri ryitabiriwe n’abakinnyi bo mu bihugu byinshi mu mateka ya Tour du Rwanda, inyuma y’irya 2020 ryitabiriwe n’abo mu bihugu 26.

24- Agahigo k’uduce twinshi tw’isiganwa twegukanywe na Erythrée, ikurikiwe n’u Rwanda (19), Maroc (9), Afurika y’Epfo na Leta Zunze Ubumwe za Amerika (8).

26- Umubare w’abakinnyi bakinnye Tour du Rwanda mbere yo kujya mu makipe akomeye akina amarushanwa yo ku rwego rw’Isi: Aït El Abdia, Berhane, Chaoufi, Craven, De Bod, M.Debesay, Ghebreigezabhier, J.Janse van Rensburg, R.Janse Van Rensburg, Grmay, Jim, Kudus, Meintjes, Nyionshuti, Reijnen, Rosskopf, Smit, Teklehaimanot, Thomson, Van Zyl, O.Goldstein, Badilatti, Guglielmi, Bellicaud, Sobrero, Fedorov.

47- Abakinnyi bashya batigeze bitabira Tour du Rwanda na rimwe, barakina iry’uyu mwaka. Bangana na 62,7% by’abakinnyi 80 bose bitabira. Mu 2020 bari 52,5%, 48,7% mu 2019, 62,5% mu 2018, 59,2% mu 2017 na 54% mu 2016.

191- U Rwanda ni rwo rumaze guhagararirwa n’abakinnyi benshi (191) kuva mu 2009 kugeza uyu mwaka (ubariyemo n’abagenda bagaruka). U Bufaransa ni 74, Erythrée 65, Afurika y’Epfo, 64, Kenya 57, Ethiopie 53, Algérie 38, Cameroun 32, Leta Zunze Ubumwe za Amerika 27 n’u Busuwisi 25,

581- Abakinnyi 581 bamaze kwitabira Tour du Rwanda, ubaze abaje buri mwaka (harimo n’abagaruka) bose hamwe bakaba 935 kuva mu 2009.

850- Umubare w’abantu bemerewe kwitabira Tour du Rwanda 2021 mu buryo bunyuranye (accréditées). Bari munsi ya 980 bayitabiriye mu 2020.

913- Ibilometero byose by’irushanwa ry’uyu mwaka ni 913,3. Agace kagufi kazaba ari aka karindwi, aho abakinnyi bazasiganwa n’ibihe ku giti cyabo, bagakora intera y’ibilometero 4,5 tariki ya 8 Gicurasi, bahagurukiye i Nyamirambo bakazamuka kwa Mutwe (Mur de Kigali). Agace karekare ni aka Nyanza-Gicumbi, kazaba ari aka gatatu, kazakinwa ku wa Kabiri tariki ya 4 Gicurasi ku ntera y’ibilometero 171,6.

Impuzandengo y’umuvuduko uri hejuru (ku rutonde rusange rwa nyuma) ni: 40,43 km/h (2017) – 39,72 (2019) - 39,55 km/h (2012) - 39,18 km/h (2013) –38,91 km/h (2018) - 38,83 km/h (2015) - 38,52 km/h (2010) – 37,94 km/h (2016) - 37,43 km/h (2014) - 37,29 km/h (2011) - 36,43 km/h (2009).

Tour du Rwanda iraba ku nshuro ya 13 kuva ibaye mpuzamahanga
Nsengimana Jean Bosco agiye guca agahigo ko kwitabira Tour du Rwanda inshuro 10, aho yayitwaye mu 2015
Isiganwa rya Tour du Rwanda rikunzwe cyane n'Abanyarwanda
Abakinnyi bavuye mu bihugu 24 bitandukanye, baritabira Tour du Rwanda ya 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .