00:00:00 IGIHE NETWORK KN KINYARWANDA EN ENGLISH FR FRANCAIS

Icyakorwa ni ugutoroka- Icyafasha Abanyarwanda kwegukana etape muri TDR 2021 mu mboni za Ntiyamira

Yanditswe na Eric Tony Ukurikiyimfura
Kuya 7 Gicurasi 2021 saa 09:01
Yasuwe :
0 0

Umwe mu bakomiseri ba Tour du Rwanda, Ntiyamira Jean Sauveur, yavuze ko amahirwe yo kwegukana irushanwa ry’uyu mwaka ku Banyarwanda yarangiye, ahubwo bakwiye gushaka uburyo batoroka igikundi byibuze bakegukana kamwe mu duce tw’isiganwa ry’uyu mwaka.

Ku rutonde rusange, Muhoza Eric (28) ni we Munyarwanda uza hafi, aho kuri ubu arushwa iminota itandatu n’amasegonda 48 mu gihe Nsengimana Jean Bosco (30), Manizabayo Eric (31), Nsengiyumva Shemu (35), Gahemba Barnabé (36) na Mugisha Samuel (40) aribo bari muri 40 ba mbere.

Mu gihe hasigaye uduce dutatu gusa ngo irushanwa ry’uyu mwaka rirangire, Komiseri Ntiyamira Jean Sauveur, yabwiye umunyamakuru wa IGIHE ko ubu bikigoye kwemeza uzatwara Tour du Rwanda 2021, ariko hari ishusho byamaze kugaragaza.

Yakomeje avuga ko kuba Eyob Metkel yambaye umwenda w’umuhondo bidasobanuye ko ari we uzatwara irushanwa ry’uyu mwaka.

Ati “Ibyo ntiwabishyiraho akadomo, ahubwo ni akabazo ukurikije amasegonda abiri yashyizemo n’ukuntu tuzarangiriza ku musozi wa Norvège ukomeye, wenda ikipe ye ishobora kumufasha, ariko hariya bisaba kwirwanaho. Ubu ntushobora kwemeza uzatwara Tour du Rwanda, ariko ikigaragara ni uko iri hagati y’abakinnyi batanu bari imbere gusa, umwe azavamo ayitware.”

Amahirwe menshi yayashyize kuri Alan Boileau umaze kwegukana uduce dutatu muri dutanu tw’uyu mwaka, Vuillermoz Alexis wigeze kwegukana agace muri Tour de France na Jhonatan Restrepo wanigaragaje muri Tour du Rwanda ya 2020 akegukana uduce tune.

Ati “Boileau ntabwo nakwemeza ko ashobora gutwara Tour du Rwanda kuko ku rutonde rusange asigwa amasegonda arenga 30, ntibashobora kumwemerera nubwo ashobora gutwara etape. Ejo [ku wa Gatanu] nibidakunda, tuzamenya ku wa Gatandatu ushobora kuyitwara kuko azaba ari muri bariya bazamutsi.”

Abajijwe icyo Abanyarwanda bashobora gukora aho isiganwa rigeze ubu, Ntiyamira yavuze ko ari ugushaka uko bakwegukana kamwe mu duce dusigaye nubwo bigoye.

Ati “Icyizere gisigaye ku Banyarwanda ni uko bashobora gutwara etape, ariko nabwo kugira ngo bayitware, igikomeye kimwe ni uko bajya muri échappés [bacomoka mu bandi], bagatoroka bakagenda, noneho igikundi kitabyitaho kuko bari inyuma [mu bihe], wenda uwagiye n’uwo bajyanye akaba yagira amahirwe akabasha gutsinda etape.”

Yakomeje agira ati “Ariko kuvuga ngo uwo mukinnyi yazanye n’iki gikundi n’aba bakinnyi bakomeye, biragoye kuba yahita atwara etape, biragoye ni ukuvuga ngo ni etape nta kindi, urutonde rusange urarubona, urabona ko iyi Tour du Rwanda nibwo dutsinzwe cyane kurusha izindi zabayeho. Igikomeye cyakorwa ni uko hakongera gushyirwa imbaraga mu kubaka abana, tutirengagije ko na Tour du Rwanda yazamuye urwego harimo no kuzamo abakinnyi babigize umwuga.”

Tour du Rwanda 2021 irakomeza kuri uyu wa Gatanu tariki ya 7 Gicurasi 2021 hakinwa agace ka gatandatu gahagurukira i Kigali (kuri Convention Centre) kagasorezwa Mont Kigali ku ntera y’ibilometero 152,6, ariko kanyuze i Gicumbi na Rulindo.

Abakinnyi b'Abanyarwanda bakomeje kugorwa na Tour du Rwanda y'uyu mwaka
Komiseri Ntiyamira Jean Sauveur (ibumoso) asanga icyafasha Abanyarwanda gutsinda etape ya Tour du Rwanda uyu mwaka ari uko bacomoka bagacika igikundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .