Habimana Jean Eric yegukanye isiganwa ryitiriwe Intwari, SACA ihigika Benediction

Yanditswe na Eric Tony Ukurikiyimfura
Kuya 26 Mutarama 2020 saa 04:20
Yasuwe :
0 0

Habimana Jean Eric wa SKOL Adrien Cycling Academy (SACA) ni we wegukanye isiganwa ryitiriwe intwari z’igihugu "Heroes Cycling Cup" ryateguwe n’Ishyirahamwe Nyarwanda ry’Umukino w’Amagare “FERWACY” ku bufatanye n’Urwego rw’Igihugu rushinzwe Intwari z’Igihugu, Imidari n’Impeta by’Ishimwe, CHENO.

SACA ni ikipe nshya ishobora gukina amarushanwa yo ku migabane nka Tour du Rwanda, aho igizwe n’abakinnyi bamwe bari muri Les Amis Sportifs nka Hakizimana Seth na Nsengiyumva Shemu, abo muri SKOL Cycling Club nka Mugisha Moïse (uzabanza gusoza amasezerano afite mu ikipe yo mu Bufaransa), Dukuzumuremyi Ally, Habimana Jean Eric n’abandi. Skol Fy Cycling Club ikaba kugeza ubu nta kipe y’abakuru ifite.

Muri iri siganwa ryabaye kuri iki Cyumweru mu gitondo, rikazenguruka mu Karere ka Nyarugenge, abakinnyi bahagurukiye i Nyamirambo ku ishuri ry’Intwari bazamuka kuri Tapis Rouge, bakata berekeza i Nyabugogo, bazamuka ku Muhima (Apacope), berekeze mu Agakiriro - Gitega na Nyamirambo (Intwari) ku ntera y’ibilometero 12.

Mu cyiciro cy’abagabo bahazengurutse inshuro icyenda zingana n’ibilometero 108, uwa mbere yabaye Habimana Jean Eric wa SACA, wakoresheje amasaha atatu, iminota itatu n’amasegonda 59, akurikirwa na mugenzi we bari gukinana muri iyi kipe nshya, Nsengiyumva Shemu, amusize umunota umwe n’amasegonda 41.

Aba bakinnyi bombi baje bakurikiwe n’abakinnyi bane ba Benediction Ignite Club (yari ikipe imwe rukumbi yo mu Rwanda ikina amarushanwa yo ku migabane - Continental); Manizabayo Eric, Byukusenge Patrick na Nkurunziza Yves.

Mu bakinnyi 41 batangiye iri siganwa, 25 ni bo basoje, aho abenshi muri bo bagowe n’umuhanda wanyereraga kubera imvura yaguye mu Mujyi wa Kigali.

Mu cyiciro cy’abagore hasiganwe abakinnyi barindwi, bazengurutse inshuro esheshatu zingana n’ibilometero 72. Ingabire Diane wa Benediction Club yegukanye isiganwa, akurikirwa na mugenzi we, Nzayisenga Valentine amusize iminota itanu n’amasegonda 36 mu gihe Nirere Xaverine werekeje muri Bugesera Cycling Team, yabaye uwa gatatu asizwe iminota umunani n’amasegonda 41.

Mu cyiciro cy’ingimbi zazengurutse inshuro umunani zingana n’ibilometero 96, isiganwa ryegukanwe na Muhoza Eric wa Les Amis Sportifs wakoresheje amasaha abiri, iminota 55 n’amasegonda 20.

Tuyizere Étienne wa Nyabihu Cycling Team na Hategekimana Jean Bosco wa Les Amis Sportifs ni bo baje bamukurikiye, yabasize amasegonda abiri.

Iri siganwa niryo rya mbere ribimburiye andi mu Rwanda muri uyu mwaka, ni mu gihe habura iminsi 28 ngo Tour du Rwanda ya kabiri ya 2.1 itangire tariki ya 23 Gashyantare kugeza ku ya 1 Werurwe 2020.

Areruya Joseph, Mugisha Samuel, Mugisha Moïse, Nzafashwanayo Jean Claude, Munyaneza Didier na Uhiriwe Byiza Renus ni bamwe mu bakinnyi batagaragaye muri Heroes Cycling Cup kuko bahagarariye u Rwanda muri La Tropicale Amissa Bongo isozwa muri Gabon kuri iki Cyumweru.

Habimana Jean Eric wa SACA itozwa na Niyonshuti Adrien, yegukanye isiganwa ryitiriwe Intwari
Habimana Jean Eric, Ingabire Diane na Muhoza Eric ni bo batsinze mu byiciro bitatu byakinnye iri siganwa ryabimburiye andi muri uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza