Iri siganwa ribaye ku nshuro ya kabiri ryabaye kuri uyu wa Gatandatu tariki ya 14 Ukuboza ribera mu Karere ka Rwamagana, aho abaryitabiriye bakoresheje amagare asanzwe ya pinebalo (Pneu-ballon) na Phoenix.

Bazengurutse imihanda yo mu Karere ka Rwamagana, bahagurukiye ku cyicaro cya Cogebanque basoreza kuri Polisi Rwamagana.

Abakobwa baryitabiriye ni 11 bakaba bakoze ibilometero 19 na metero 400, naho abahungu bitabiriye ni 53 bakaba bazengurutse kilometero 32.

Ikundabayo yabaye uwa mbere mu bahungu akoresheje isaha imwe n’iminota 42 n’amasegonda 49 ahembwa amafaranga ibihumbi 60 Frw, akurikirwa na Iradukunda Idrissa wakoresheje isaha imwe n’iminota 43 n’amasegonda 27.

Ku mwanya wa gatatu ni Niyonkuru Samuel w’imyaka 16 wanahembwe igare, uwa kane ni Bikorimana Theoneste naho uwa gatanu aba Niyigena Jean d’Amour, aba uko ari batanu bakaba bahise banabona amahirwe yo kwinjizwa mu ikipe ya Les Amis Sportif.

Mu bakobwa isiganwa ry’ibilometero 19 na metero 400 ryegukanywe na Niyobyose Goreth w’imyaka 17 wakoresheje iminota 52 n’amasegonda umunani ahembwa igare n’amafaranga ibihumbi mirongo itanu.

Ku mwanya wa kabiri haje Queen Djazira w’imyaka 15 wakoresheje iminota 54, ku mwanya wa gatatu ni Irakoze Aline, uwa kane ni Ingabire Confiance naho uwa gatanu aba Benegusenga Benise, nabo bakaba babonye amahirwe yo kwinjizwa mu ikipe ya Les Amis Sportif.

Ikundabayo uturuka mu Karere ka Kayonza, yavuze ko yatangiye gukunda igare cyane nyuma y’uko Areruya Joseph basanzwe baturanye ukina uyu mukino nk’uwabigize umwuga, atangiye kwitwara neza ndetse akanabona bimutunze.

Yakomeje avuga ko kuri ubu afite intego zo kongera imyitozo ku buryo azagirirwa icyizere cyo kuzitabira Tour du Rwanda, mu myaka iri imbere.

Niyobyose wabaye uwa mbere mu bakobwa nawe uturuka mu Karere ka Kayonza, yavuze ko yakuze akunda uyu mukino w’amagare, ngo yaje kuwushishikarizwa na muramu we wanemeye kumugurira ibikoresho birimo amagare n’imyenda kugira ngo azakine uyu mukino ngo intego ni ugukomeza kwitwara neza.

Umuyobozi wa Les Amis Sportif iterwa inkunga na Cogebanque Plc Sebugwiza Youssuf, yavuze ko bishimiye uko iri rushanwa ryagenze ku nshuro ya kabiri bariteguye, yavuze ko abana batsinze batanu ba mbere binjijwe mu ikipe y’abato ya Les Amis Sportif.

Ati “Iri rushanwa turikuramo impano nyinshi kandi zikomeye, umwaka ushize abana baritsinze bakomereje muri shampiyona y’amagare birangira umwe anabaye uwa kabiri ariko twarabyishimiye cyane kuko ni ubwa mbere yarakinnye irushanwa rikomeye, urumva ko iri rushanwa rifite icyo rimaze gikomeye.”

Sebugwiza yavuze ko akurikije abana b’abakobwa bari kwitabira amarushanwa y’abato n’abandi basanzwe hirya no hino mu makipe, yakwizeza abanyarwanda ko bakwitega kwitwara neza kwabo mu marushanwa mpuzamahanga mu myaka iri imbere.

Iyamuremye Antoine ushinzwe iyamamazabikorwa muri Cogebanque, yavuze ko bishimira gutera inkunga ikipe ya Les Amis Sportif, mu rwego rwo kuzamura impano z’abana bakiri bato.

Yavuze ko nka banki imaze imyaka isaga makumyabiri bifuza ko abanyarwanda bakomeza kubagana kugira ngo babahe serivise zirimo kubitsa cyangwa kubikuza, gusaba inguzanyo ku bigo bito n’ibicirirtse n’ibindi.

Iyamuremye yavuze ko kuri ubu basigaye baravugururye inguzanyo ku mushahara, aho batanga miliyoni eshanu nta ngwate isabwe.

Les Amis Sportif yazamukiyemo abakinnyi bakomeye mu mukino w’amagare mu Rwanda nka Adrien Niyonshuti usigaye unayitera inkunga, Areruya Joseph, Ndayisenga Valens na Uwizeye Jean Claude.

Abakiri bato bitabiriye iri siganwa ari benshi

Abakobwa bitabiriye iri siganwa bagenze kilometero 19 na metero 400

Abasiganwa bacaga mu mihanda y'ibyaro bakoresheje amagare asanzwe

Abitabiriye iri siganwa bahagurukiye ku cyicaro cya Cogebanque giherereye mu Mujyi wa Rwamagana

Gisubizo Isaa ku myaka icumi yakoze kilometero 15 ahembwa ibihumbi 20 mu rwego rwo kumutera imbaraga

Ibyishimo byari byose kuri Ikundabayo wabaye uwa mbere

Ikundabayo Ruben yabaye uwa mbere mu bahungu mu gusiganwa kilometero 32 akaba yakoresheje isaha imwe n'iminota 42

Girubuntu Jeanne d'Arc wamenyekanye cyane mu mukino w'amagare waje gusezera niwe washyikirije igihembo Queen Djazira w'imyaka 15 wabaye uwa kabiri

Ikundabayo yashyikirijwe n'ibihumbi 60 FRW

Iyamuremye Antoine ushinzwe iyamamazabikorw a muri Cogebanque ashyikiriza ibihembo umwe mu bitwaye neza muri iri siganwa

Niyobyose Goreth wabaye uwa mbere mu bakobwa w'imyaka 17 yahembwe ibihumbi 50 n'igare ndetse aninjizwa mu ikipe ya Les Amis Sportif

Niyonkuru Samuel w'imyaka 16 wabaye uwa gatatu mu bahungu niwe wahembwe igare nyuma yuko byagaragaye ko ari muto mu myaka ugereranyije n'abamuje imbere

Sebugwiza Youssuf uyobora Les Amis Sportif yishimiye uko isiganwa ryagenze

Umuhanzi Danny Vumbi yasusurukije abitabiriye iki gikorwa

Iyamuremye Antoine ushinzwe iyamamazabikorwa muri Cogebanque yavuze ko iri siganwa ritegurwa na Les Amis Sportif basanzwe batera inkunga rikurwamo abanyempano bashya batanga umusaruro mu marushanwa akomeye