Tour du Rwanda 2021: Alan Boileau yegukanye etape ya kabiri, Umba Lopez afata umwambaro w’umuhondo (Amafoto + Video)

Yanditswe na Eric Tony Ukurikiyimfura, Ishimwe Israel
Kuya 3 Gicurasi 2021 saa 08:46
Yasuwe :
0 0

Umufaransa Alan Boileau w’imyaka 21 ukinira B&B Hotels yitabiriye Tour du Rwanda ku nshuro ya mbere, yegukanye agace ka kabiri kasorejwe i Huye nyuma yo guhagurukira i Kigali ku ntera y’ibilometero 120,5 kuri uyu wa Mbere.

Muri iri siganwa ryahagurukiye imbere y’inyubako ya MIC mu Mujyi wa Kigali, rigasorezwa imbere y’ishami rya COGEBANQUE i Huye, Alan Boileau yakoresheje amasaha atatu, iminota irindwi n’amasegonda 14.

Umukinnyi wabaye uwa kabiri akanambara umwenda w’umuhondo ni Umunya-Colombia Umba Lopez Abner Santiago wa Androni Giocattoli wasizwe amasegonda atandatu, ariko na we arusha abiri igikundi cy’abakinnyi 22 barimo na Sanchez Brayan Vergara (Medellin) wari wambaye umwambaro w’umuhondo, aho yabaye uwa gatatu uyu munsi.

Umunyarwanda waje hafi ni Uhiriwe Byiza Renus (Team Rwanda) wakoresheje amasaha atatu, iminota irindwi n’amasegonda 22, aba uwa 20 mu gihe Mugisha Samuel wa 26, yasizwe amasegonda 36 na Alan Boileau.

Tour du Rwanda 2021 izakomeza ku wa Kabiri tariki ya 4 Gicurasi 2021 hakinwa agace ka gatatu kazahagurukira i Nyanza kerekeza i Gicumbi ku ntera y’ibilometero 171,6.

UKO ISIGANWA RYAGENZE:

-  Uko abakinnyi bahembwe ku gace ka kabiri

  • Umukinnyi wegukanye etape ya kabiri: Alan Boileau (B&B Hotels, Fra):
  • Umukinnyi uyoboye isiganwa wambitswe umwenda w’umuhondo na VISIT RWANDA: Umba Lopez Abner Santiago (Androni, Col):
  • Umukinnyi witwaye neza mu guterera imisozi wahembwe na COGEBANQUE: Manizabayo Eric ‘Karadiyo’ (Benediction Ignite, Rwanda):
  • Umukinnyi warushije abandi kubaduka ‘sprint’ uhembwa na SP: Teugels Lennert (Tarteletto-Isorex, Bel):
  • Umukinnyi ukiri muto witwaye neza wahembwe na PRIME INSURANCE: Umba Lopez Abner Santiago (Androni, Col):
  • Umunyafurika mwiza witwaye neza wahembwe na RWANDAIR: Salim Kipkemboi (Bike Aid, Kenya):
  • Ikipe yitwaye neza yahembwe na INYANGE INDUSTRIES: Androni Giocattoli-Sidermic (mu Butaliyani):

- Abakinnyi 10 ba mbere ku rutonde rusange nyuma y’uduce tubiri

  1. Umba Lopez Abner Santiago (Androni, Col), 5h41’03”
  2. Sanchez Vergara Brayan Stiven (Medellin, Col), 5h41’03” + 02”
  3. Alex Hoehn (Wildlife Generation, USA), ibihe bimwe
  4. Restrepo Jhonatan Valencia (Androni, Col) , ibihe bimwe
  5. Quentin Pacher (B&B Hotels, Fra), ibihe bimwe
  6. Salim Kipkemboi (Bike Aid, Kenya), ibihe bimwe
  7. James Piccoli (Israel Start-up Nation, CAN), ibihe bimwe
  8. Valentin Ferron (Direct Energie, Fra), ibihe bimwe
  9. Vahtara Norman (Israel Start-up Nation, Est), ibihe bimwe
  10. Uhiriwe Byiza Renus (Team Rwanda), ibihe bimwe

- Abakinnyi 10 ba mbere kuri etape Kigali- Huye

  1. Alan Boileau (B&B Hotels, Fra), 3h07’14”
  2. Umba Lopez Abner Santiago (Androni, Col), 3h07’14” + 06”
  3. Sanchez Vergara Brayan Stiven (Medellin, Col), 3h07’14”+ 08”
  4. Vahtara Norman (Israel Start-up Nation, Est), ibihe bimwe
  5. Marchand Gianni (Tarteletto-Isorex, Bel), ibihe bimwe
  6. Alex Hoehn (Wildlife Generation, USA), ibihe bimwe
  7. Restrepo Jhonatan Valencia (Androni, Col) , ibihe bimwe
  8. Salim Kipkemboi (Bike Aid, Kenya), ibihe bimwe
  9. Quentin Pacher (B&B Hotels, Fra), ibihe bimwe
  10. Valentin Ferron (Direct Energie, Fra), ibihe bimwe

-  12:13: ALAN BOILEAU YEGUKANYE AGACE KA KABIRI KA TOUR DU RWANDA 2021

Quintero yasatiriye mu kilometero cya nyuma ndetse n’abandi batangira kwiyegeranya , Umba Lopez Abner Santiago wa Androni Giocattoli-Sidermec yacomotse, ariko hatsinze Alan Boileau wa B&B Hotels utanze abandi ku murongo yabasize amasegonda asaga atanu.

-  12:08: Hasigaye ibilometero bibiri gusa

Mu gihe hasigaye ibilometero bibiri gusa, abasiganwa batangiye kuzamuka ku nzu ndangamurage yo mu Karere ka Huye. Bane b’imbere bashyizemo ikinyuranyo cy’amasegonda 16.

-  12:04: Bashyizemo amasegonda 18 mu bilometero bitanu bya nyuma

Abakinnyi bane bacomotse: Teugels, Main, Quintero na Boileau, bashyizemo ikinyuranyo cy’amasegonda 18 mu gihe hasigaye ibilometero bitanu gusa.

11:59: Hasigaye ibilometero 11 gusa ku bakinnyi bari imbere. Bane muri bo bahise bacomoka, abo ni Teugels, Main, Quintero na Boileau.

-  11:53: Hasigaye ibilometero bitageze kuri 15

Abasiganwa bamaze kugera ku kilometero cya 106. Abakinnyi batanu bari bacomotse bahise bagarurwa bwangu n’igikundi cyasize ikirimo Brayan Sanchez iminota ibiri n’amasegonda 10.

-  11:50 Hamaze gukorwa ibilometero 100

Ku kilometero cya 103, abakinnyi batanu basohotse mu gikundi aribo Gautier (B&B Hotels), Marchand (Tarteletto), Gaillard, Ferron (Total-Direct Energie) na Bisolti (Androni).

11:45 Mu bakinnyi bayoboye harimo Ferron na Gaillard (Total-Direct Energie), Eyob ( Terengganu), Restrepo na Bisolti (Androni), Lagab (Algérie), Mugisha (Rwanda), Main, Ormiston na Nigrini (Pro Touch), Sevilla (Medellin), Goldstein na Piccoli (Israël), Nsengiyumva (SACA), Pacher, Boileau na Gautier (B&B Hotels), Uhiriwe (Rwanda).

-  11:40: Sanchez mu gikundi kiyoboye

Hamaze gukorwa ibilometero 94, Brayan Sanchez wambaye umwenda w’umuhondo n’igikundi bari kumwe cy’abakinnyi 32, bafashe Valentin Ferron (Total-Direct Energie) na Alan Boileau (B&B Hotels) bari basize abandi.

-  11:36: Ikinyuranyo gikomeje kugabanyuka

Mu gihe abasiganwa bageze ku kilometero cya 93, Valentin Ferron (Total-Direct Energie) na Alan Boileau (B&B Hotels) basize igikundi kirimo Brayan Sanchez wambaye umwenda w’umuhondo amasegonda 10 gusa.

-  11:32: Abasiganwa binjiye i Huye- Brayan Sanchez atangiye gusatira

Hasigaye ibilometero 30 gusa. Twinjiye mu karere Huye, Brayan Sanchez wambaye umwambaro w’umuhondo yasizwe amasegonda 20 n’ababiri bacomotse (Valentin Ferron (Total-Direct Energie) na Alan Boileau (B&B Hotels). Igikundi cyo cyasizwe amasegonda 36.

11:25: Tugeze mu bilometero 84, ikinyuranyo kimaze kugera ku masegonda 45. Gusa, Abafaransa babiri bacomotse; Ferron w’imyaka 23 na Boileau w’imyaka 21, bombi nta n’umwe uregukana isiganwa rizwi na UCI.

Brayan Sanchez wambaye umwenda w’umuhondo yari yategewe mu gikundi cya kabiri, ariko yamaze kukivamo agaruka mu cya mbere.

11:22: Abakinnyi bamaze kugenda ibilometero 79, ubu ikinyuranyo kiri hagati ya babiri bari imbere n’igikundi ni 42’’.

11:19: Abakinnyi babiri bacomotse mu gikundi. Aba ni Valentin Ferron (Total-Direct Energie) na Alan Boileau (B&B Hotels). Basize igikundi ho 18’’.

11:16: Nyuma yo kugenda ibilometero 71, igice kimwe cy’abari mu gikundi cyafashe abari imbere. Mu isaha ya kabiri, abakinnyi bagendeye mu muvuduko wa 36 km/h.

11:10: Abakinnyi bamaze kugenda ibilometero 69. Babiri barimo Bernardo Suaza (Medellin) na Valentin Ferron (Total-Direct Energie) basohotse mu gikundi. Bahise bagisigaho amasegonda 10.

-  AMANOTA YA SPRINT YA KABIRI

11:07: Amanota ya “sprint” ya kabiri yegukanywe na 1. Goytom. 2. Roldan. 3. Teugels.

11:05: Abasiganwa bamaze kugenda ibilometero 68. Kuri ubu bari kugendera mu gikundi nyuma yo gufata Tewelde wari imbere.

- Abafana bakumiriwe ahasorezwa isiganwa

Mu Mujyi wa Huye ahasorezwa etape ya kabiri ya Tour du Rwanda 2021 hateguwe nk’uko bisanzwe, ariko abantu bakumiriwe kuza kureba uko irushanwa risozwa, bitewe n’uko amabwiriza yo kwirinda ikwirakwira ry’icyorezo cya Covid-19 atemera ko abantu bahurira hamwe ari benshi.

-  Tewelde anyonze igare ku muvuduko uhambaye asiga ba bandi babiri

11:03: Abakinnyi bamaze gusiganwa ibilometero 67. Tewelde yahise acomoka asiga ba Banyarwanda babiri barimo Nsengimana Jean Bosco na Manizabayo Eric.

-  Igikundi cyarushijeho gusatira abari imbere

10:56: Abakinnyi bari mu gikundi bakomeje kugabanya ibihe bashyizwemo n’ababari imbere.

Mu gihe bamaze kugenda ibilometero 52, ikinyuranyo cyageze ku munota umwe n’amasegonda 20.

Nyuma y’ibilometero 64, ikinyuranyo cyaanutse cyane kigera ku munota umwe n’amasegonda 14.

-  IGIKUNDI CYATANGIYE GUKORA CYANE NGO KIGABANYE IBIHE

10:50: Abakinnyi bamaze kugenda kimwe cya kabiri cy’intera y’ibilometero bagomba gusiganwa uyu munsi. Mu gihe bitegura gusohoka muri Muhanga binjira mu Ruhango, igikundi cyatangiye kugabanya ibihe, kuko ubu ikinyuranyo kiri hagati ni 3’25’’.

10:46: Abakinnyi bamaze gusiganwa ibilometero 54, bageze i Buhanda. Manizabayo Eric “Karadiyo’’, Jani Tewelde Weldegaber na Nsengimana Jean Bosco basize igikundi ho 4’10’’.

10:38: Ba bakinnyi batatu bari imbere bamaze gusiga igikundi ho iminota 3’20’’.

- IKINYURANYO HAGATI Y’ABARI IMBERE N’IGIKUNDI GIKOMEJE KWIYONGERA

10:31: Manizabayo Eric “Karadiyo’’, Jani Tewelde Weldegaber na Nsengimana Jean Bosco basize igikundi ho 2’50’’. Abari imbere ubu bageze mu Karere ka Muhanga aho bamaze kugenda ibilometero 45.

-  Manizabayo yegukanye amanota ya ‘sprint’ ya mbere

Amanota ya sprint yatangiwe kuri SP mu Karere ka Muhanga, yegukanywe na Manizabayo Eric “Karadiyo’’; yakurikiwe na Jani Tewelde Weldegaber na Nsengimana Jean Bosco.

Abakobwa bo muri SP bari kumwe na MIGO Ltd muri iri rushanwa

- IBYO WAMENYA KURI HUYE, UMUJYI WAREZE INTITI USOREZWAMO AGACE KA KABIRI KA TOUR DU RWANDA

Huye ni kamwe mu turere umunani tugize Intara y’Amajyepfo. Igizwe n’imirenge 14, utugari 77 n’imidugudu 509 ku buso bwa kilometero kare 581.5.

Ibarura ryo mu 2012 ryagaragaje ko aka karere gatuwe n’abaturage 314,022 ku bucucike bw’abantu 540 kuri kilometero kare.

Aka karere ni ko kabarizwamo Kaminuza y’u Rwanda iri mu nkuru mu gihugu ndetse n’inzu Ndangamurage y’Amateka. Ibindi birangamateka biri muri aka gace birimo Ibisi bya Huye, Urutare rwa Nyirankoko, Iriba rya Nyagakecuru, ikawa ya Maraba, Arboretum n’ahandi.

Kaminuza yazamuye ubudahangarwa bwa Huye

Kaminuza Nkuru y’u Rwanda yashinzwe ku wa 3 Ugushyingo 1963 ku bufatanye bwa Guverinoma y’U Rwanda n’Umuryango w’Abafurere b’ Abadominikani bo mu Ntara ya Quebec ho muri Canada. Yatangiranye n’abanyeshuri 51 n’abarimu 16 mu mashami atatu arimo iry’Ubuganga, iry’Imibanire rusange n’iryo Guhugura abarimu.

Kaminuza Nkuru y’u Rwanda yashinzwe kandi iyoborwa bwa mbere n’umufurere w’umudominikani w’umunya-Canada witwaga Frère Georges-Henri Lévesque. Frère Lévesque ni nawe kandi waje kwitirirwa kimwe mu byumba binini bigize inyubako Kaminuza Nkuru y’u Rwanda yatangiriyemo Levesque cyangwa Audi Levesque.

Kuva yashingwa mu 1963 kugeza mu 1993, UNR nkuko yakunzwe kwitwa mu mpine z’Igifaransa, yari imaze gushyira ku isoko ry’umurimo abanyeshuri 1,962.

Nubwo yakomeje kugira iterambere mu bice bitandukanye kuva yashingwa, iterambere ry’iyi Kaminuza yakunze kwitwa imwe rukumbi, kubera ukuntu yabayeho ari imwe mu myaka irenga 30, ryagaragaye cyane cyane hagati y’umwaka wa 1995-2013; kuko muri iyi myaka 18 yari imaze gushyira ku isoko abanyeshuri barenga 18,000 mu mashami no mu byiciro bitandukanye.

Yari ifite amashami atatu Rusizi, Kigali na Huye ari nayo yakunze kumenyekana cyane nko “ku gicumbi cy’ubwenge” mu mujyi w’intiti.

Kaminuza Nkuru y’u Rwanda yahindutse rimwe mu mashami ya Kaminuza y’u Rwanda ryitwa “Ishuri rikuru ry’Indimi, Ubuhanzi n’Ubumenyamuntu” (College of Arts and Social Sciences).

- Nsengimana Jean Bosco wa Team Rwanda yegukanye amanota y’agasozi ka gatatu yatangiwe Nyamabuye, yakurikiwe na Manizabayo Eric “Karadiyo” wa Benediction Ignite na Jani Tewelde Weldegaber ukinira Eritrea. Uyu musozi uri ku rwego rwa kabiri.

10:21: Abakinnyi bamaze kugenda ibilometero 40. Abari imbere basize igikundi ho +1’20’’.

- Uko byari byifashe mu muhanda Nyabugogo- Ruyenzi:

Brayan Sanchez wa Medellin ni we wambaye umwenda w'umuhondo uyu munsi
Abakinnyi barimo Manizabayo Eric “Karadiyo’’ (iburyo), Jani Tewelde Weldegaber (inyuma) na Nsengimana Jean Bosco bakomeje kuyobora isiganwa igihe kirekire

10:15: Abakinnyi bamaze kugenda ibilometero 35. Ubu baritegura kwinjira mu Karere ka Muhanga. Mu isaha ya mbere abasiganwa bagendeye ku muvuduko wa 34,9 km/h.

-  Makuza Bernard yakomeje gushimangira urukundo afite ku mukino w’amagare

Makuza Bernard wabaye Minisitiri w’Intebe ndetse na Perezida wa Sena yakomeje gushyigikira amagare ndetse aho etape ya Kigali-Huye yatangiriye yari kumwe n’abakinnyi barimo aba SACA.

Uyu wahoze ari umunyapolitiki ukomeye mu nzego zitandukanye mu bihe binyuranye yakunzwe kwerekana ko afitiye urukundo rudasanzwe umukino w’amagare.

09:52: Abakinnyi baracyari kugendera mu gikundi ku muvuduko ugerereye ari nako bagerageza kureba uko ikinyuranyo cy’iminota ibiri n’ababari imbere kitakomeza kuzamuka.

- Meteo Rwanda yateguje ko hashobora kugwa imvura

Mu majyepfo aho turi kwerekeza, biragaragara ko ikirere cyijimye ndetse hari icyo gihatse.

Ikigo cy’Igihugu cy’Iteganyagihe, Meteo Rwanda, cyateguje ko uyu munsi hashobora kugwa imvura mu masaha ya nyuma ya saa sita.

Cyagize kiti "Tariki ya 03 Gicurasi 2021 hagati ya saa 06:00 na saa 12:00 hateganyijwe ibicu byiganje bidatanga imvura mu gihugu hose; naho hagati ya saa 12:00 na saa 18:00 hateganyijwe imvura mu turere twose tw’Igihugu."

Ubwo hari hasojwe agace ka mbere i Rwamagana ku Cyumweru, abakinnyi bahembwe mu mvura nyinshi yaguye.

09:48: Manizabayo Eric, Nsengimana Jean Bosco na Tewelde bakomeje gushyira ikinyuranyo hagati yabo n’igikundi cy’abakinnyi kibari inyuma. Kugeza ubu bamaze kugenda ibilometero 20.

-  AMANOTA Y’AGASOZI KA KABIRI YEGUKANYWE N’UMUNYARWANDA

09:44: Manizabayo Eric yegukanye amanota y’agace ka kabiri yabariwe ku Mugina muri Kamonyi. Yakurikiwe na Nsengimana Jean Bosco na Tewelde.

09:36: Abakinnyi batatu bari imbere basize igikundi ho umunota n’amasegonda 45, bageze mu Kagari ka Gihinga mu Murenge wa Gacurabwenge bakiri imbere.

- Amafoto y’uko byifashe mu muhanda

Perezida wa UCI, David Lappartient uri mu Rwanda, yitabiriye aka gace ka kabiri nk’uko byagenze no ku gace ka mbere.

David Lappartient uyobora UCI na Murenzi Abdallah uyobora FERWACY
Perezida wa UCI, David Lappartient, atangiza agace ka kabiri ka Tour du Rwanda ya 2021
Umutoza wungirije wa Team Rwanda, Nathan Byukusenge, aganiriza abakinnyi

09:36: Abakinnyi batatu bari imbere basize igikundi ho umunota n’amasegonda 45, bageze mu Kagari ka Gihinga mu Murenge wa Gacurabwenge bakiri imbere.

09:29 Manizabayo (Benediction), Nsengimana (Team Rwanda) na Tewelde (Eritrea) bakomeje kuyobora isiganwa neza. Ubu bashyizemo umunota n’amasegonda 20 ku kilometero cya 13.

09:24 Batatu ba mbere barimo Manizabayo (Benediction), Nsengimana (Team Rwanda) na Tewelde (Eritrea) basize igikundi amasegonda 43 ku kilomtero cya 11. Mu bilometero bibiri byabanje, ikinyuranyo cyari ku masegonda 25.

09:21: - AMANOTA Y’AGASOZI KA MBERE YEGUKANYWE NA MANIZABAYO ERIC

Umunyarwanda Manizabayo Eric ‘Karadiyo’ ukinira Benediction Ignite, yegukanye amanota yo kuzamuka umusozi wa Ruyenzi, umwe muri ine igize aka gace, akurikiwe na Nsengimana Jean Bosco wa Team Rwanda.

Mu mwaka ushize, nabwo uyu musozi wazamutswe bwa mbere n’Umunyarwanda Munyaneza Didier na we ukinira Benediction Ignite.

09:18: Hamaze gukorwa ibilometero bitanu, abakinnyi batatu bavuye mu gikundi barimo Nsengimana Jean Bosco wa Team Rwanda uri gukina iri rushanwa ku nshuro ya 10, Tewelde wa Eritrea na Manizabayo Eric wa Benediction Ignite.

09:13: Abakinnyi batangiye gushaka uko bava mu gikundi barimo bose hamwe.

- Imiterere y’agace ka kabiri ka Tour du Rwanda 2021

Bitandukanye n’agace ka mbere kegukanywe n’Umunya-Colombia Brayan Sanchez, kari gafite umusozi umwe gusa (wa Ntunga), agace ka kabiri ko gafite imisozi myinshi bivuga ko abakinnyi b’abahanga mu guterera imisozi aribo bahabwa amahirwe.

Ni agace gafite imisozi ine itangirwaho amanota y’abahiga abandi kuzamuka, bahembwa na Cogebanque nyuma ya buri gace. Aya mbere aratangirwa ku isonga y’agasozi ko ku Ruyenzi, bongere bayatangire ku musozi wo ku Kamonyi.

Andi aratangirwa ku musozi wa Nyamabuye mu karere ka Muhanga no ku gasozi gasorezwa ku nzu ndangamurage y’u Rwanda iri mu karere ka Huye, uzamuka uvuye mu Rwabuye.

Harimo uduce tubiri dutangirwaho amanota ya ‘sprint intermediair’ aho abasiganwa batanguranwa kuhagera bakiyongerera amahirwe yo kwegukana umwenda utangwa na ‘SP’ uranga urusha abandi Sprint mu isiganwa. Aho ni i Muhanda kuri SP ndetse no mu Ruhango.

09:09: Abakinnyi batangiye kubarirwa ibihe

Nibwo abakinnyi bari imbere bageze kuri Sitasiyo Gemeca ndetse hatangiye kubarwa ibihe ku bilometero 120,5 bigiye gukorwa, bikaza gusorezwa ku ishami rya COGEBANQUE riri mu Mujyi wa Huye.

09:05: Nyabugogo babukereye

Abo mu gace ka Nyabugogo ku gukunda umukino w’amagare ni aba mbere. Imodoka z’abanyamakuru zimaze gutambuka muri aka gace, hari abafana benshi cyane ku muhanda ndetse bamwe bahagaze ku nyubako zaho kugira ngo babashe kureba abasiganwa.

09:01: Agace ka kabiri karatangijwe!

Abakinnyi bagiye kugenda ibilometero 5.1 mbere yuko batangira kubarirwa ibihe bageze kuri Station Gemeca.

08:50 Abakinnyi baritegura guhaguruka:

Aka gace kagiye guhagurukira hafi ya rond point nini yo mu Mujyi wa Kigali rwagati, imbere y’inyubako y’Ubucuruzi ya Muhima Investment Corporation (MIC).

Mobisol iri mu bafatanyabikorwa ba Tour du Rwanda 2021
Abakobwa bo muri Mobisol-Rwanda, ikigo gikwirakwiza ingufu zikomoka ku mirasire y’izuba

-Kuri iyi etape, abafana babaga ari benshi ku mihanda

Kuri uyu munsi wa kabiri wa Tour du Rwanda 2021, abasiganwa baranyura Nyabugogo, kamwe mu duce tubamo abakunzi b’umukino w’amagare benshi kurusha utundi tw’u Rwanda. Nyuma baranyura mu yindi mijyi minini nka Muhanga mbere yo gusoreza i Huye.

Gusa, nta cyizere ko abafana baza kongera kuba ari benshi nk’uko byari bimeze mu mwaka ushize no mu yawubanjirije dore ko uyu mwaka isiganwa riri kuba mu bihe bidasanzwe bya COVID-19 ndetse uyu munsi akaba ari umunsi w’ikiruhuko kuri bamwe mu bakozi.

Amateka y’Umujyi wa Kigali n’uwa Huye muri Tour du Rwanda

Uyu munsi ni ku nshuro ya 47 agace ka Tour du Rwanda kagiye guhagurukira mu Mujyi wa Kigali kuva mu 2009 ubwo hakinwaga agace ka kasorejwe i Rubavu.

Ni inshuro kandi ya 11 agace ka Tour du Rwanda kagiye gusorezwa mu Mujyi wa Huye kuva mu 2009 ubwo hasorezwaga akari kahagurukiye ku Kibuye (Karongi).

Ni ubwa karindwi etape ya Tour du Rwanda iraba isorejwe i Huye, yatangiriye i Kigali.

- Abakinnyi bayoboye ku munsi wa mbere

Ejo hashize ku Cyumweru nibwo hakinwe agace kahagurukiye kuri Kigali Arena, abakinnyi berekeza i Rwamagana, aho basoreje bamaze gukora intera y’ibilometero 115.6.

  • Umukinnyi wegukanye agace ka mbere: Sanchez Vergara Brayan Stiven (Team Medellin), yambaye umwenda w’umuhondo wa VISIT RWANDA.
  • Umukinnyi uhiga abandi mu kurira imisozi: Mohd Zariff Muhammed ( Terengganu Cycling), yambaye umwenda wa COGEBANQUE.
  • Umukinnyi uhiga abandi mu kuvuduka: Suaza Arango Bernardo Albeiro (Team Medellin), yambaye umwenda wa SP.
  • Umukinnyi ukiri muto mwiza: Umba Lopez Abner Santiago (Androni Giocattoli-Sidermec), yambaye umwenda wa PRIME INSURANCE.
  • Umunyafurika mwiza: Basson Gustav (Protouch), yambaye umwenda wa RWANDAIR.
  • Ikipe yitwaye neza: Androni Giocattoli-Sidermec (ihembwa na INYANGE INDUSTRIES).

- Abanyarwanda batanu bitwaye neza ku munsi wa mbere banganye ibihe n’abayoboye isiganwa

  • 14 Hakizimana Seth (SACA) 2h33’43”
  • 15 Uhiriwe Byiza Renus (Team Rwanda), 2h33’43”
  • 33 Byukusenge Patrick (Benediction Ignite), 2h33’43”’
  • 39 Muhoza Eric (Team Rwanda) 2h33’43”
  • 44 Areruya Joseph (Benediction Ignite) 2h33’43”

- Uwegukanye agace kasorejwe i Huye yiyongerera amahirwe yo kwegukana Tour du Rwanda

Mu mateka ya Tour du Rwanda kuva yaba mpuzamahanga mu 2009, Akarere ka Huye kamaze gusorezwamo agace k’iri siganwa inshuro 10. Eshanu muri zo uwegukanye aka gace ni na we wegukanye Tour du Rwanda nk’uko byagendekeye Jelloul Adil ukomoka muri Maroc mu 2009, Darren Lill mu 2012, Areruya Joseph mu 2017, Mugisha Samuel mu 2018 na Merhawi Kudus mu 2019.

- Uduce dusorezwa i Huye duhira Abanyarwanda

Mu mwaka ushize, aka gace kegukanywe n‘Umunya-Ethiopia Mulu Kinfe Hailemichael mu gihe mu 2019, kegukanywe na Merhawi Kudus watwaye isiganwa rya mbere rya Tour du Rwanda ryari kuri 2.1.

Undi munyamahanga waherukaga kwegukana agace kasorejwe i Huye ni Darren Lill w’Umunya-Afurika y’Epfo mu 2012 waje no kwegukana Tour du Rwanda y’uwo mwaka. Mu yindi myaka, kihariwe n’Abanyarwanda. Ese uyu munsi barabikora?

Mu 2018, aka gace kahagurutse i Kigali gasorezwa i Huye kegukanywe na Mugisha Samuel binamuhesha kwambara umwenda w’umuhondo yatamirije kugera ku munsi wa nyuma w’isiganwa.

Mu 2017 ni Areruya wegukanye agace kahagurutse i Kigali gasorezwa i Huye, ni na we kandi wegukanye agace kahagurutse i Rusizi gasorezwa i Huye mu 2016, mu gihe mu 2015 ari Bintunimana Emile wari wegukanye agace kasorejwe i Huye afashijwe cyane na Ruhumuriza Abraham wari mu minsi ye ya nyuma muri uyu mukino.

Mugisha Samuel ukinira Team Rwanda na Areruya Joseph kuri ubu ukinira Benediction Ignite, bombi barahari uyu mwaka kandi bahanzwe amaso.

- Ni isiganwa rya gatatu rya Tour du Rwanda riri ku rwego rwa 2.1

Ni inshuro ya gatatu iri siganwa rigiye kuba riri ku kwego rwa 2.1 nyuma y’abiri aheruka, yegukanywe n’Abanya-Erythrée; Merhawi Kudus mu 2019 na Natnael Tesfazion mu 2020, ariko bombi bakaba bataritabiriye uyu mwaka.

Tour du Rwanda yatangiye gukinwa mu 1988, yabaye mpuzamahanga kuva mu 2009, aho yashyizwe ku cyiciro cya 2.2 kugeza mu 2018.

Itandukaniro ry’ibi byiciro byombi riba ko mu isiganwa riri kuri 2.1, amakipe yemerewe gutumirwamo arimo ayo mu cyiciro cya mbere ‘World Tour’ atarenze 50% y’amakipe yose agize isiganwa, n’amakipe yo mu cyiciro cya kabiri ‘Pro-Continental teams’, naho isiganwa riri ku cyiciro cya 2.2 ryo amakipe yemerewe gutumirwa ni ayo mu cyiciro cya gatatu gusa bita ‘Continental teams’ n’amakipe y’ibihugu yo ku mugabane irushanwa ryabereyeho.

Amafoto: Niyonzima Moses na Igirubuntu Darcy

Video: Mushimiyimana Azeem


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .