Imiterere ya ‘Tesla Cybertruck’, imodoka y’akataraboneka igiye guhindura ibintu ku isoko

Yanditswe na Umwali Zhuri
Kuya 5 Ukuboza 2019 saa 03:51
Yasuwe :
0 0

Ni imodoka bigoye kwiyumvisha imiterere yayo, uhereye ku buryo igaragara, wagira ngo ni imwe yifashishwa mu ntambara ariko siko biri kuko ni imodoka isanzwe umuntu wese yatunga, icyiza ni uko ihendutse; Yego ni byo irahendutse kuri wowe utunze zimwe twita V8, iyo utunze irimo izi ebyiri ariko ntaho bihuriye.

Ni imodoka yakozwe n’uruganda rwa Tesla rw’umuherwe, Elon Musk, wanditse izina mu gukora ibijyanye na za satellites ariko ubu akaba yarashyize imbaraga nyinshi mu modoka zikoreshwa n’amashanyarazi.

Mu mpera z’uyu mwaka nibwo hamuritswe uko ‘Cybertruck’ izaba imeze aho igomba kujya ku isoko mu 2020.

Kugira ngo wumve ubudahangarwa bwayo, reka duhere ku buryo ikoze. Icyo benshi bita ibati ry’imodoka kuri iyi itandukanye na nyinshi uzi. Rikozwe mu byuma bikomeye bizwi nka ‘inox’ ku buryo mu gihe cy’impanuka idashobora guhongama nk’uko izindi bibaho. Yo urayigonga ntihagire icyo iba ahubwo iyawe igashanyagurika.

Iki cyuma ikozemo usibye kuba kidahongama biranagoye kugisana iyo cyangiritse ndetse ntibinashoboka ko cyasigwa irangi.

Umuyobozi wa Tesla, Elon Musk, yatangaje ko umubiri w’iyi modoka uyibashisha kuba itangizwa n’inyundo nini za kinubi ndetse ndetse ntishobora gutoborwa n’amasasu y’imbunda nto zimwe na zimwe.

Ireshya n’imodoka zindi nyinshi twita ‘double-cabine’ nka Ford F-150 cyangwa Silverado 1500 ya Chevrolet. Uburebure bwayo ni metero 5.8; ubugari ni metero ebyiri ndetse ifite metero 1.9 kuva hasi ujya hejuru. Ifite imyanya ishobora kwicarwamo n’abantu batandatu bakuru.

Ifite aho batwara imizigo hashobora gufungwa ku buryo ibirimo biba bifite umutekano, atari nka kwa kundi umuntu aba akeka ko hari abari busimbukiremo bakabitwara.

Iyi modoka izajya hanze idakoresha lisansi cyangwa mazutu nk’izisanzwe ahubwo izaba ikoresha amashanyarazi, ariko izaba ikoranye uburyo bwakira ingufu z’izuba ku buryo igenda yiyongeramo umuriro. Ubwo buryo buzaba bufite ubushobozi bwo kwakira ingufi zatuma imodoka igenda ibilometero biri hagati ya 24 na 64, gusa birashoboka ko ubu buryo butazana n’imodoka ahubwo bukajya buhabwa abantu babishaka.

Cybertruck izasohoka mu moko atatu, buri bumwe bufite ubushobozi bw’ingufu bwihariye. Ubwibanze buzaba bufite icyo umuntu yakwita batiri ishobora gutuma igenda nibura ibilometero 402; iyi izaba ishobora kwikorera cyangwa gukurura ikintu gipima toni 3.4. Tesla ivuga ko iyi modoka izajya hanze igura nibura $39,900.

Ikindi cyiciro kizaba kigura $49,900 aho yo izaba ifite ubushobozi bwo kugira bimwe twise batiri, ebyiri ndetse yo ingufu ziyihutisha zituruka mu mapine yose uko ari ane bimwe twita 4WD. Yo izaba ifite ubushobozi bwo kugenda nibura ibilometero 482 ihetse toni 4.5

Icyiciro cya nyuma yo izaba ifite za batiri eshatu akaba ari nayo irusha ubushobozi izindi zose. Igitangaje ni uko izaba igura $69,900, amafaranga make ugereranyije n’arenga ibihumbi 80 by’amadolari agura za V8.

Kuri ariya mafaranga, umuntu azaba abasha kugira imodoka igenda ibilometero 804 nta muriro wongewemo kandi ihetse toni 6.3.

Umwaka utaha nibwo Tesla izatangira gukora izi modoka ku bwinshi, hanyuma mu 2020 iza mbere zijye ku isoko, gusa ku muntu uyisha yatangira kuyabika hakiri kare.

Nibura ifite batiri ebyiri ifite ubushobozi bwo gufata umuvuduko w’ibilometero 100 mu isaha mu gihe cy’amasegonda 2.9. Icyo bisobanuye ni uko uyicayemo, ugakandagira ku muriro, mu masegonda 2.9, urushinge ruba rugeze ku 100 naho iya batiri eshatu yo ni mu masegonda 4.5 naho imwe bikaba mu masegonda 6.5.

Reba amashusho agaragaza igerageza ryakozwe ubwo yamurikwaga

Iyi modoka izasohoka mu mabara atandukanye gusa ntabwo umuntu ashobora kuyisiga irangi ngo ayihindure
Amapine yayo ni uku ateye...
Mu kuyimurika, abasore b'inkorokoro bayikuse inyundo ntiyahongama
Imbere muri iyi modoka ni uku hameze, ifite imyanya itandatu
Cybertruck ifite ahantu hakoze neza ho kubika imizigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .