Nyuma y’itariki 8 Mata 2014, mudasobwa zigikoresha ‘operating system’ ya Windows XP ntizizongera kwakira ibizirindira umutekano hamwe n’ibijyanye n’igihe, bishobora kuzatuma zibasirwa n’amavirusi hamwe no gutuma abajura mu by’ikoranabuhanga bazibasira bakangiza amadosiye atandukanye baba babitse.

Ubushakashatsi bwakozwe na Microsoft bwagaragaje ko Windows XP ishobora kwibasirwa na virusi cyangwa abajura inshuro eshanu kurusha Windows 8.1 kuko ‘operating systems’ za kera zitakozwe ku buryo zibasha guhangana n’iterambere rya tekiniki zibasira mudasobwa z’iki kihe.

Rotimi Olumide ukuriye Windows Group mu Burengerazuba, u Burasirazuba, hagati muri Afurika ndetse no mu birwa byo mu nyanja y’u Buhinde, yagize ati "Kurekera aho gutanga serivisi za XP ntibivuze ko izahagarara gukora, ariko uko iminsi ihita umutekano n’imikorere yayo bizibasirwa bikomeye."

"Urwego mpuzamahanga rushinzwe ikusanyamakuru (International Data Corporation/IDC) rugaragaza ko ibikorwa by’ubucuruzi bishobora kuzakuba gatatu byita ku kibazo cy’umutekano mu mwaka utaha, nibidasezerera Windows XP ngo bigane Windows 7 cyangwa Windows 8."

Inyigo ya Microsoft igaragaza ko mudasobwa zigendanwa zikoresha XP zishobora gukuba kabiri agaciro k’umusaruro hagati y’imyaka ibiri n’itatu, nyamara ‘operating systems’ nka Windows 8 ifite ubushobozi bwo guhangana n’ibibangamira umutekano by’iki gihe ndetse ikongera imigendekere myiza y’ibikorwa bitandukanye byifashisha mudasobwa.