Mu kigo cy’amashuri cy’abakobwa - Gashora Girls Academy, abakobwa 48 bari mu biruhuko baturutse mu bigo bya G.S Rurenge, E.S Rugabano, E.S Murunda, G.S Saint Jerome Janja, G.S Kibangu, T.T.C Muramba na Gashora Girls Academy, bahavanye ubumenyi mu gukoresha ikoranabuhanga mu gihe cy’ icyumweru, mu guteza imbere impano bafitemo mu ikoranabuhanga n’itumanaho.

Aya mahugurwa yiswe Camp TechKobwa yari yateguwe mu gushishikariza abakobwa kwiteza imbere, bakigirira icyizere babinyujije mu ikoranabuhanga ribafasha kubona amakuru atandukanye, no guha agaciro ibikorwa bya media club bibafasha guteza imbere impano z’ikoranabuhanga ...

Bahawe amasomo mu gufungura umurongo w’ikoranabuhanga (e -mail), gukoresha Porogaramu z’ibanze za internet, baganirijwe ku buzima bw’abakobwa, n’uburyo bategura imishinga bateganya kuzakora.

Bagiye bahugurwa n’abantu batandukanye barimo abakobwa babashije kwiteza imbere bakagera ku mishinga bakoresha ikoranabuhanga, barimo abo mu itangazamakuru, Ella Mutuyimana ukora ibya sinema, Diana Mpyisi umuyobozi wa Sosiyeti ya Blue Oceans , Akaliza Keza Gara umuyobozi wa Shaking Sun wanashyinze urubuga nkoranyambaga rw’ u Rwanda kuri Twitter #RWOT na (Rwandans on Twitter).

Nisingizwe Marie Paule impuguke mu gufasha urubyiruko kwigirira icyizere, Neza Guillaine, ukora mu by’ikoranabuhanga (Software Developer), umuyobozi ushinzwe uburyo yateza imbere iby’ikoranabuhanga muri Kaminuza ya Carnegie Mellon University in Rwanda, babafashije kwiteza imbere binyuze mu ikoranabuhanga mu masomo atandukanye.

Betty Turishimiye, wari witabiriye aya mahugurwa avuga ko yageze ku nzozi ze, kuko azakomeza icyerekezo cyo kuziga iby’ikoranabuhanga rya za mudasobwa, yabonaga bidashoboka kuri we.

Umuhango wo gusoza aya mahugurwa witabiriwe n’abantu batandukanye bafite ikoranabuhanga mu nshingano zabo, ushinze ibikorwa muri Amabasade ya Amerika mu Rwanda, uhagarariye ishami ry’ikoranabuhanga muri Minisiteri y’Urubyiruko n’Ikoranabuhanga mu isatazabumenyi, n’abo mu mushinga DOT Rwanda.

Iki gikorwa cyatewe inkunga na Minisiteri y’Urubyiruko n’ikoranabuhanga mu isakazabumenyi (Ministry of Youth & ICT ), ku bufatanye n’abakorerabushake b’Abanyamerika bibumbiye mu muryango Peace Corps, Shaking Sun Ltd, Partners in Health, Hehe Ltd, Girls In ICT Rwanda na KLab kibafasha kureba kure mu ikoranabuhanga, no kwagura amarembo bakabasha kugera ku makuru n’ubumenyi butandukanye byo hirya no hino ku Isi.