Icyegereranyo cyavuye mu bushakashatsi cyashyizwe ahagaragara n’abashinzwe ubugenzuzi bwo gukoresh telefoni (ITU) kigaragaza ko ku isi abasaga miliyari esheshatu batunze telefoni zigendanywa.

Nk‘uko urubuga businessmobile.fr rwabitangaje ibihugu byateye imbere ni byo bitunze telefone nyinshi.

Ubwo bushakashatsi bugaragaza ko ubwinshi bwo gukoresha telefone zigendanywa, buzatuma hiyongera isoko ryazo n’ubumenyi bushya mu gukoresha ikoranabuhanga.

Iki icyegeranyo kivuga ko mu mpera z’umwaka wa 2011, mu Bushinwa abari batunze telefone zigendanwa basagaga miliyari imwe , mu gihe mu Buhinde abari bazitunze nabo basaga miliyari.

Ubwiyongere bw’abari batunze telefone zigendanwa mu mwaka ushize bwari kuri kigereranyo cya 40% ku isi hose, na 78% mu bihugu byateye imbere. ITU ivuga ko byerekana intambwe ishimishije mu gutera imbere kw’ikoranabuhanga.

Kuri ubu nk’uko ubushakashatsi bubigaragaza , imibare y’abakoresha telefone yikubye kabiri iy’umwaka ushize.

Telefone zigendanwa zifashishwa mu mirimo itandukanye irimo iy’ubucuruzi, ubuhinzi, ibikorwa by’iterambere, imirimo itandukanye by’umwihariko zigafasha mu itumanaho abo mu bihugu bikiri mu nzira y’amajyambere mu itumanaho rigezweho.

Amakuru dukesha raporo y’umuryango ushinzwe iby’itumanaho mu bihugu bitanu bigize Umuryango w’Afurika y’Iburasirazuba (EACO) avuga ko mu Rwanda mu mwaka wa 2010 abakoresheje itumanaho rya telefone zigendanwa bangana na 2,722,236 , naho muri uyu mwaka kugeza muri Kanama abasaga 4,889,741 bahawe imirongo ya telefone zigendanywa.