Kuwa Kane mu Karere ka Rubavu hatangijwe gahunda yo guhugura abazahugura abaturage kwitabira gukoresha serivisi z’itumanaho by’umwihariko hakoreshwa telefone mu kohereza no kwakira amafaranga.

Umunyamabanga Mukuru muri Minisitiri y’Ikoranabuhanga mu biro bya Perezida wa Repubulika ushinzwe ikoranabuhanga, David Kanamugire niwe wayoboye gahunda yo gukangurira abaturage kwitabira gukoresha itumanaho rishingiye mu guhererekanya amafaranga hakoreshejwe telefone zigendanwa.

Iyi gahunda izabera mu Turere twose tw’igihugu izashimangira mu guhugura abantu bazahugura abaturage kurushaho kumenya gukoresha serivisi za telefone zitandukanye nko koherezanya amafaranga hakoreshejwe ikoranabuhanga(Money Transfer) ndetse kubika no kubikuza amafaranga(Mobile Banking Transaction).

Gukangarurira no guhugura Abanyarwanda bo mu Turere twa Kamonyi, Musanze, Kayonza na Rubavu gukoresha ikoranabuhanga mu bucuruzi biciye mu itumanaho rishingiye kuri telefone bibaye mu gihe byagaragaye ko kuva mu mpera z’umwaka wa 2011 abantu ibihumbi 424.326 bingana na 9% gusa nibo barimaze gufata ubuguzi muri serivisi zo koherezanya amafaranga hakoreshejwe ikoranabuhanga (Money Transfer) kubika no kubikuza(Mobile Banking Transaction).

Mu gihe imibare igaragaza ko mu mwaka wa 2009 abafatabuguzi bakoreshaga telefone bari miliyoni 2 gusa mu mwaka wa 2011 bikubye inshuro zirenga ebyiri kuri ubu bakaba babarirwa kuri miliyoni zisaga 4.

Iki gikorwa cyo kwegereza abaturage ikoranabuhanga rishobora kuborohereza itumanaho bityo bakigeza ku iterambere rihamye cyatangijwe na Perezida Paul Kagame kikaba gikomeje gushigikirwa na Minisiteri ifite ikoranabuhanga mu nshingano, Ikigo cy’Igihugu cy’Iterambere(RDB), amabanki, EWSA n’ibindi b’igo bitandukanye.