00:00:00 IGIHE NETWORK KN KINYARWANDA EN ENGLISH FR FRANCAIS

Umuburo ku bakundanira ku mbuga nkoranyambaga

Yanditswe na Clairia Mutoni
Kuya 6 June 2024 saa 07:52
Yasuwe :

Abakorera ibyaha ku mbuga nkoranyambaga cyangwa imbuga zo gukundaniraho bafatirana abakeneye urukundo, bakoresheje imyirondoro y’ibinyoma igamije kubakurura kugira ngo babarye amafaranga.

Hari bimwe abantu bahuriraho, bemeza ko biranga aba bagizi ba nabi, birimo gusaba ubufasha bya hato na hato cyangwa amafaranga. Ni ngombwa kubagiraho amakenga mu gihe bagaragaje iyi myitwarire.

Ubusanzwe abagizi ba nabi ku mbuga nkoranyambaga bakunze kubeshya ko batuye kure cyane bidashoboka ko mwahura imbona nkubone, bakirinda ko mwavugana mu buryo bwa video, babeshya ko bafite ibibazo bya tekiniki.

Bagerageza buryo ki bihutisha ubucuti bwanyu ngo mwinjire mu rukundo, kuko intego zabo ari ugufatirana amarangamutima yawe mbere y’uko umuvumbura.

Abakoresha izi mbuga basanzwe bo ubasangana amafoto menshi, naho abatekamutwe bo usanga ntayo bafiteho cyangwa bakiyitirira imyirondoro y’undi muntu n’amafoto atari ayabo.

Ikigo cy’u Rwanda gishinzwe umutekano w’ikoranabuhanga, NCSA, kivuga ko ukwiye kwirinda mu gihe uwo muganira ku mbuga nkoranyambaga agusabye nimero za telefone, Email cyangwa n’ibindi bikuranga kuko bishobora kumufasha kumenya no gucukumbura ibikwerekeyeho.

Ni byiza ko ukoresha imbuga nkoranyambaga n’izo gukundaniraho zizewe, zasuzumwe kandi zikoreshwa n’umubare munini ariko ugakomeza kugira amakenga kuko na zo hari ubwo zikorerwaho ibyaha. Usabwa kwirinda kugira amakuru yawe bwite uvugaho nk’amazina yose, tariki wavutseho, amafoto, videwo cyangwa aho utuye kuko bishobora gukoreshwa mu bikorwa by’ubugizi bwa nabi.

Ntugomba kwizera abo muhuriye ku mbuga nkoranyambaga cyangwa izo gukundaniraho, ngo wemere kohereza cyangwa kwakira amafaranga aturutse ku muntu utazi. Ukwiye kwirinda kugira icyo uvuga ku bijyanye n’uko ubika amafaranga yawe, nk’umubare w’ibanga ndetse na nimero y’ikarita ya banki.

Mu gihe watekewe imitwe n’abo mwahuriye ku mbuga nkoranyambaga cyangwa izo gukundaniraho, bakwibye amafaranga cyangwa bashyize hanze ibiranga ubuzima bwawe bwite n’igihe uri kubakemanga, ihutire kubimenyesha ishami rishinzwe gutanga ubufasha ku rubuga uri gukoresha ndetse ubigeze mu nzego z’igihugu zibishinzwe kugira ngo zibikurikirane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .