Uko Kasha yagobotse abagorwaga no kugura agakingirizo mu ruhame

Yanditswe na Evariste Nsengimana
Kuya 21 Ugushyingo 2018 saa 02:19
Yasuwe :
0 0

Nuganira n’abagerageje gukora imibonano mpuzabitsina ariko bibasaba gukoresha agakingirizo kubera impamvu zitandukanye, bazakubwira urugamba barwanye bagiye ku gasanteri kukagura.

Hari abazakubwira uko ‘bakoraga urugendo bakarenga umudugudu bagafata undi, bashaka kugera byibuze aho batazwi, cyangwa bagatuma abana kubagurira agakingirizo, banga ko hari umuntu ubazi wababona bakagura ngo amenye ibyo bagiye gukora.’

Hari uwigeze kumbwira ukuntu umusore w’ibigango yamusanze kuri butiki (Boutique) yo muri Quartier, akumva abwiye umucuruzi ati ‘Ndashaka amasogisi nambaye godiyo’ abona umucuruzi ntazuyaje, ariko abimuha mu ibanga.

Abacuruzi baba basanzwe bazi amarenga abagura udukingirizo bakoresha. Hari abakita ‘amasogisi, amashashi, udupira, abashushanya mu kiganza inyuguti ya P (Prudence) n’andi, bakayobya utabimenyereye.

Bamwe uzasanga banahitamo kwishorera aho banze ko abantu babona batugura, bagakora ibyo bita ‘Kumanuka kizimbabwe’, bisa no kwiyahura aka wa mugani w’umunyarwanda wavuze ngo ‘Isoni zirisha uburozi.’

Nyuma yo kubona ko izo soni zishobora gutuma bandura indwara zandurira mu mibonano mpuzabitsina, Abanyamerikakazi, Joanna Bichsel na Amanda Arch, bazanya igisubizo mu Rwanda bashinga urubuga ‘Kasha’ rufasha abantu kubona udukingirizo, ibikoresho byo kuboneza urubyaro, iby’isuku n’ibindi mu ibanga rikomeye.

Uko Kasha ikugezaho agakingirizo mu ibanga

Biragoye kubona umukiliya n’umwe waba waraguze agakingirizo cyangwa ibindi bikoresho bya Kasha, kuko icyo ishyira imbere ari ibanga ry’umukiliya.

Ibi nibyo byatumye mfata iya mbere, ntanga komande y’udukingirizo nifashishije mudasobwa na Internet ariko sibyo gusa kuko ushobora no kuyitanga na telefoni yawe waba ukoresha internet cyangwa utayikoresha.

Nafashe mudasobwa yanjye, njya aho bashakishiriza kuri internet (Mozilla, Google chrome,…) nandika www.kasha.rw, imaze gufunguka, ndamanuka gato ngera ahanditse ‘Shop by Categories, mpitamo ahanditse ‘Condoms’ aritwo dukingirizo nashakaga.

Niba urimo kubigerageza nawe, nukanda ahanditse ‘Condoms’ urahita ubona amoko atandukanye yatwo n’ibiciro bijyanye n’ibyo buri bwoko bwihariye, ukanze ahanditse ‘Quick View’.

Ukibona ako wifuza, urabona ahanditse ‘Add to cart’ hanyuma nureba hejuru mu nguni y’iburyo ya mudasobwa, urabona ahanditse ‘cart’, ukande muri ‘View cart’ ubone amakuru ahagije ajyanye n’uko wishyuzwa.

Muri ayo makuru hari ahanditse umubare w’amapaki wifuza, akadirishya kanditsemo 1, iri hagati y’akamenyetso ko gukuramo no guteranya. Utwo tumenyatso (-+) nitwo ukandaho ushaka kongera cyangwa kugabanya umubare w’udupaki.

Njyewe nahisemo agapaki kagura 2500Frw, ariko ushobora guhitamo n’agapaki kabamo udukingirizo tune, kamwe kagura 500Frw. Uhita ubona aho uhitamo igihe umukozi wa Kasha yakakugerezaho cyangwa wabishaka ukajya kugafata aho umukozi wayo ari ubaye uhazi.

Uko ugashaka byihuse ni nako bigusaba amafaranga y’inyongera yo kukakugezaho. Urugero, iyo ugashaka mu isaha imwe, hari aho ubihitamo ukarenzaho 1500Frw. Ibi bikorwa guhera ku wa mbere kugeza ku cyumweru, kuva saa moya kugeza saa tatu z’ijoro. Bivuze ko wahisemo ipaki ya 2000Frw, wakishyura 3500Frw.

Hari kandi gutanga komande y’uwo munsi ariko bitarenze saa tatu z’ijoro. Icyo gihe wishyura urengejeho 800 RWF. Ubwo waguze ipaki ya 2000Frw wakishyura 2800Frw.

Ubundi buryo ni ugutanga komande, udukingirizo watumye tukakugezwaho umunsi ukurikiyeho, ukarenzaho 500Frw cyangwa ugahitamo kudufata ku mukozi wa kasha aho akorera. Aha ho nta n’ifaranga na rimwe urenzaho.

Aha hose, udukingirizo waguze uduhabwa mu ibanga ku buryo n’umuntu mwaba muri kumwe yagira ngo ni impano wohererejwe n’inshuti.

Ntibirangira aho, kuko uhita ukanda ahanditse ‘Proceed to check out’. Aha iyo uhakanze mu ruhande rw’iburyo uhabona ibyo wasabye n’amafaranga yabyo, munsi yabyo ukabona aho uhitamo uburyo bwo kwishyura ukoresheje Mobile Money cyangwa Tigo Cash/Airtel money, ugahita wuzuzamo nimero amafaranga avaho, bakaguha ‘Code’ wifashisha wishyura.

Muri uru ruhande unahabona ubundi buryo wakifashisha wishyura, harimo gutanga amafaranga mu ntoki babikuzaniye cyangwa gukoresha uburyo bw’akamashini (POS).

Mu ruhande rw’ibumoso, uhasanga aho wuzuza imyirondoro yawe n’aho ibyo waguze bazabikuzanira. Ibyo ni amazina yawe yombi, nimero ya telefoni, inyubako bazagusangamo, ikintu gihari kizwi na bose n’andi makuru yafasha umukozi wa ‘Kasha’ uzabikugezago.

Ibyo byose ibyo ubirangije, ubona ahanditse ‘Complete order’ wahakanda ukamenyeshwa niba komande watanze, yabagezeho, igihe wayisabiye ikaba ikugezeho.

Ushobora kugura igikoresho ukeneye nifashishije ‘Android application’ yitwa Kasha Vuba, ushyira muri telefone yawe uyikuye kuri Play Store.

Mu gihe udafite Internet cyangwa ukoresha telefoni isanzwe ushobora kugura ibyo ukeneye kuri Kasha unyuze ku *911#. Ugakurikiza amabwiriza.

Kasha ifasha abantu kubona udukingirizo, ibikoresho byo kuboneza urubyaro, iby’isuku n’ibindi mu ibanga rikomeye
Umukozi wa Kasha akugezaho ibyo wasabye byose mu gihe wowe wifuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza