00:00:00 IGIHE NETWORK KN KINYARWANDA EN ENGLISH FR FRANCAIS

Ubucuruzi bw’imodoka buragenda biguru ntege mu Burayi, bipfira he?

Yanditswe na Kubwimana Yvan
Kuya 1 June 2022 saa 01:54
Yasuwe :

U Burayi ni isoko rikomeye ku nganda zikora imodoka, ariko muri iyi minsi ibintu biri kugenda nabi kuri uwo Mugabane ugizwe n’ibihugu 27, byinshi bikabarizwa mu cyiciro cy’ibifite ubukungu buteye imbere.

Imibare y’Ikigo gicuruza Imodoka Jato Dynamics nk’uko yatangajwe n’Ikinyamakuru Autocar cyo mu Bwongereza, igaragaza ko abagura imodoka mu Burayi bagabanuka, kuko nko muri Mata uyu mwaka, izaguzwe zari ibihumbi 821, igabanuka rya 20% ugereranyije na Mata 2021.

Kugera nibura muri Mata 2022, imodoka zimaze kugurishwa mu Muryango w’Ubumwe bw’u Burayi ni miliyoni 3,5, igabanuka rya 13% ugereranyije n’uko byari bimeze kuva muri Mutarama kugera muri Mata 2021. Ni ubwa kabiri habayeho igabanuka ringana gutya mu Burayi kuva mu 1991.

Zimwe mu mpamvu ziri gutera iki kibazo, nk’uko Felipe Munoz, Impuguke muri Jato Dynamics, abitangaza, harimo intambara yo muri Ukraine, igihugu kigura nibura imodoka ibihumbi 100 ku mwaka.

Hari kandi ibibazo bya ‘semiconductors’ byatumye nyinshi mu nganda zikora imodoka zigabanya izo zishyira ku isoko muri rusange, mu gihe intambara yo muri Ukraine yakanze abaturage b’u Burayi, ibi bikarushaho gutizwa umurindi n’ikibazo cy’izamuka ry’ibiciro, byose bigatuma abagura imodoka bigengesera.

Icyakora ku rundi ruhande, iki kibazo gikomezwa n’uko inganda zikora imodoka zitabashije guhaza ibyifuzo by’abakiliya muri rusange, kuko umubare w’abifuza izikoresha amashanyarazi warushijeho kuzamuka, ariko izikorwa zikagabanukaho 1.4% zikaba 154,219 kubera ibibazo byatewe na ‘semiconductors.’

Munoz avuga ko “Biteye impungenge kuba umubare w’abagura imodoka waragabanutse kuri iki kigero, nubwo ku rwego rw’Isi byahindutse kubera igabanuka rya Covid-19.”

Ubwoko bw’imodoka zacurujwe mu Burayi

10. Fiat Panda

Ni imodoka zatangiye gukorwa mu 1980, zigakorwa n’Uruganda rwa Fiat rwo mu Butaliyani. Izi modoka ziracyakunzwe ku isoko, aho zikunze ziberanye no gukoreshwa mu mijyi.

Nubwo igurwa ry’izi modoka ryagabanutseho 4% muri Mata 2022 ugeranyije na Mata 2021, ziracyafite igikundiro cyane cyane mu rubyiruko. Muri Mata uyu mwaka, haguzwe imodoka 11.554. Izi gukorwa ubu ni icyiciro cya gatatu (third generation), ugereranyije n’izatangiriweho.

9. Kia Sportage

Ubwoko bw’imodoka bwa Kia Sportage bwatangiye gukorwa bwa mbere mu 2006, kuva icyo gihe hamaze gukorwa ibyiciro bitanu (five generation).

Icyiciro cya nyuma cyatangiye gukorwa mu Ugushyingo 2021, ubwo Uruganda rwa Kia rwo muri Koreya y’Epfo, rukaba ari Ishami rya Hyundai Motor Company, rwafunguraga Ishami muri Slovakia, mu rwego rwo gukora imodoka zihariye ku Burayi.

Izi modoka zarakunzwe cyane muri Mata uyu mwaka kuko izigera kuri 11.653 zaguzwe, inyongera ya 53%. Gukundwa kw’izi modoka gufitanye isano n’impinduka zayikozweho, kuko kuva ku ikoranabuhanga, imiterere y’imbere n’inyuma mu modoka n’ibindi bitandukanye byose byavuguruwe, mu gihe n’imodoka ubwayo yahinduwe yagutse ikaba nini.

Kia Sportage ni ubwoko bw’imodoka bwatangiye gukorwa bwa mbere mu 2006

8. Toyota Corolla

Toyota Corolla ni imodoka zimenyerewe cyane muri Afurika, uretse ko usanga izihacuruzwa ziba zitandukanye n’izicuruzwa mu Burayi. Nyuma yo kuva mu modoka 10 zikunzwe mu Burayi, Toyota yakoze amavugurura kuri iyi modoka iri mu zakunzwe cyane ku Isi, ari nabyo byatumye yongera kugirirwa icyizere.

Izagurishijwe muri Mata 2022 ni 11.678, igabanuka rya 4% ugereranyije na Mata 2021.

7. Opel/Vauxhall Corsa

Ni imodoka zikorwa n’Uruganda rwa Opel Corsa rwo mu Budage, zigakunda gucuruzwa mu bihugu birimo u Bwongereza ku bufatanye n’Uruganda rukora imodoka rwa Vauxhall.

Gukundwa kw’izi modoka kwazamuwe na moteri ikoranye ndetse no kuba ifite ubushobozi bwo gukoresha amashanyarazi na lisansi.

Muri Mata uyu mwaka hacurujwe izigera kuri 11.843, igabanuka rya 30% ugereranyije n’uko byari bimeze muri Mata 2021. Mu mwaka ushize, iyi modoka yabaye iya mbere mu zacurujwe mu Bwongereza.

6. Toyota Yaris

Ni imodoka zatangiye gukorwa mu 1999, zikaba ari into zifite umuvuduko. Ni yo modoka yakozwe na Toyota yakunzwe cyane mu Burayi, nubwo kuri iyi nshuro izagurishijwe zagabanutseho 28, zikagera kuri 12.448.

5. Ford Puma

Izo modoka zikorwa n’Uruganda rwa Ford rwo muri Romania, zikunzwe cyane kubera igiciro cyazo kiri hasi, ndetse n’ikoranabuhanga rigezweho zikoranye. Hagurishijwe izigera kuri 12.601 muri Mata 2022, igabanuka rya 5% ugereranyije na Mata umwaka wabanje.

4. Fiat 500

Ni imodoka zikorwa n’Uruganda rwa Fiat kuva mu 2007. Ni imodoka nto zikundirwa gukoresha amashanyarazi, zikagira umwihariko w’uko batiri zazo zirambana umuriro. Muri Mata 2022 hagurishijwe izigera kuri 12.35, igabanuka rya 18% ugereranyije n’umwaka ushize.

Fiat 500 ni imodoka zikorwa n’Uruganda rwa Fiat kuva mu 2007

3. Dacia Sandero

Ni imodoka zikorwa n’Uruganda rwa Dacia Sandero rwo muri Romania, rukaba ari Ishami ry’urwa Renault rwo mu Bufaransa. Ni imodoka nto zikundirwa kuba zihendutse ku isoko, ari nacyo cyatumye zikundwa kuva mu 2007 ubwo zashyirwaga ku isoko bwa mbere.

Hacurujwe izigera kuri 12.835 muri Mata 2022, igabanuka rya 2% ugereranyije na Mata umwaka ushize.

2. Volkswagen T-Roc

Ni imodoka zakozwe n’Uruganda rwa Volkswagen rwo mu Budage kuva mu 2017, zigakundirwa kuba zishobora gukoresha lisansi n’umuriro w’amashanyarazi.

Volkswagen yatangaje ko nibura muri uyu mwaka wa 2022 ku isoko hagurishijwe izisaga 13.998, igabanuka rya 18%.

1. Peugeot 208

Iyi modoka y’uruganda rw’Abafaransa ni yo iza ku mwanya wa mbere mu modoka zacurujwe cyane muri uyu mwaka wa 2022, ubu bwoko bwazo bwatangiye gusohoka mu mwaka wa 2012, aho mu myaka isaga 10 ishize zakunze kwiharira igikundiro gikomeye.

Ubwoko bw’izi modoka zagurishijwe cyane mu 2022 ni izasohotse mu cyiciro cya kabiri (second generation) cyatangiye kujya hanze mu 2019. Ni imodoka zikoresha umuriro w’amashanyarazi. Hacurujwe izigera kuri 15.615, igabanuka rya 15% ugereranyije n’umwaka ushize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .