00:00:00 IGIHE NETWORK KN KINYARWANDA EN ENGLISH FR FRANCAIS

Ricoh, ikigo cyubatse izina mu bijyanye n’ikoranabuhanga ryo kubungabunga inyandiko cyinjiye ku isoko ry’u Rwanda

Yanditswe na Igizeneza Jean Désiré
Kuya 30 November 2023 saa 03:10
Yasuwe :

Ikigo gicuruza ibikoresho by’ikoranabuhanga byifashishwa mu gutunganya inyandiko (Ricoh), cyafunguye imiryango mu Rwanda, aho kizajya gifatanya n’ikindi bikora kimwe kizwi nka RD Tech.

Ricoh ni ikigo cy’Abayapani cyatangijwe mu 1936, aho kugeza ubu gikorera mu bihugu birenga 200 ku Isi kikagira abakozi barenga ibihumbi 81 batanga serivisi zitandukanye.

Ni serivisi zijyanye no gutanga ibikoresho byifashishwa mu bijyanye no gutunganya inyandiko, amashusho n’ibindi, harimo za imprimantes, Scanneurs, photocopieuses, projecteurs zigezweho n’ibindi.

Ibi bikoresho bifite ikoranabuhanga rigezweho aho nka imprimantes za Ricoh ushobora kuzikoresha bidasabye ko ucomekaho umugozi, ubwazo ziba zifitemo n’aho umuntu ashobora kumanurira porogaramu ya mudasobwa (App Store) ku buryo iyo ushaka kwifashisha uyimanura bidasabye ko ubanza gukoresha mudasobwa.

Ricoh ifite uburyo umuntu yasangira na mugenzi we inyandiko, bidasabye umukozi guhaguruka ngo ayishyire undi.

Ni ukuvuga ko niba ufite ibaruwa ushaka ko nk’umuyobozi ayisinyaho, ushobora kumusangiza iyo baruwa, na we akayisinya cyangwa akaguha ibyo ukosora bidasabye ko umusanga mu biro.

Ibi Ricoh ibifashwamo n’ikoranabuhanga rya DocuWare, rifasha mu kohererezanya inyandiko bidasabye ko umuntu ahaguruka, kuzibika neza, n’ibindi byoroshya akazi, umusaruro ukiyongera.

Bijyana kandi n’uburyo bugezweho bwo kurinda amakuru hifashishijwe porogaramu za mudasobwa zifasha muri iyo mirimo amakuru ntiyibwe.

Ricoh yo yifashisha uburyo bwa RansomCare bufasha mu guhangana n’ibitero by’ikoranabuhanga, aho umujura yinjira mu makuru yawe hanyuma akayafunga, akagusaba akayabo k’amafaranga ngo yongere aguhe uburenganzira bwo kuyageraho.

Umwihariko w’iyi porogaramu ni uko nk’iyo ibitero bitangiye kugabwa ku mashini z’ikigo runaka, yo yirwanaho imashini ziri kugabwaho ibitero ikazikura mu zindi mu guhererekanya amakuru, zimwe ikaba yanazizimya kugira ngo yime urwaho abo bajura.

Umuyobozi Ushinzwe Ubucuruzi muri Ricoh, Mark Oldfield yavuze ko uretse izo serivisi bafite na za ecran nini (Smart board) zigezweho, zishobora kwifashishwa mu mirimo itandukanye yaba mu nama z’iyakure (video conferences), guteguriraho ibintu witegura nko kugaragaza mu nama n’ibindi.

Ati “Ni igikoresho cyiza. Iyo wigisha abanyeshuri hari ahabugenewe ho kwandikaho n’igisa n’ikaramu, cyangwa washaka gusobanura ibintu wandika na byo iki gikoresho kibigufashamo, kuko wakoresha na internet ugaraza amashusho mu nama cyangwa mu ishuri.”

Yavuze ko iki kigo kiri guhindura imikorere, kikibanda ku gutanga ibisubizo by’ikoranabuhanga ku babikenera, akavuga ko mu gukora biriya bikoresho ubu bari kwibanda kuri bike ariko bitanga umusaruro wikubye.

Kugeza ubu RD Tech inakorera mu Burundi ni yo izajya iba ifite uburenganzira bwo kuranguza ibikoresho bya Ricoh ku isoko ry’u Rwanda, ababigeza ku baturage bakabikura kuri iki kigo.

Iki kigo gitanga byibuze imprimantes zigera ku 2000 ku mwaka, ubu kigiye kujya na cyo gicuruza ibikoresho bya Ricoh bigezweho, ndetse buri serivisi z’ikoranabuhanga Ricoh itanga na RD Tech izajya izitanga.

Ubusanzwe iki kigo gicuruza imprimantes, kinanafasha ibigo mu bijyanye n’umutekano w’ikoranabuhanga, gushyingura inyandiko mu buryo bugezweho, uburyo bwo gukoresha inyandiko hifashishwa impapuro nke n’ibindi.

Umuyobozi Mukuru wa RD Tech, Munyampeta Jules yavuze ko bijyanye n’ubunararibonye iki kigo gifite, bizabafasha kongera serivisi batanga ariko bakibanda no ku ikoranabuhanga ryisumbuyeho ry’ibikoresho bacuruza.

Ati “Kuba baje mu Rwanda ni ikintu kidasanzwe kuko ibikoresho byabo bifite ikoranabuhanga rihambaye. Iyo nka imprimante yapfuye wenda ibarizwa mu ntara, ntabwo uyikora bimusaba kuyisangayo cyangwa ngo bayimuzanire, ahubwo yifashisha ikoranabuhanga akayikora atageze aho iri.”

Munyampeta yerekanye ko ubu bakorana n’ibigo bitandukanye nka za banki, amashuri, ibigo nderabuzima n’ibindi bigo byaba ibya leta n’iby’abikorera, akemeza ko ubufatanye bwa RD Tech na Ricoh bugiye guhindura ikintu kinini mu mikorere, abakiliya bakabona serivisi nziza kurushaho.

Imibare ya Ricoh igaragaza ko umwaka ushize w’ingengo y’imari warangiye itanze imprimantes zirenga miliyoni 11, photocopieuses zirenga miliyoni 14 ndetse igurishije impushya zo kubika inyandiko mu buryo (Digital Archiving) bw’ikoranabuhanga zirenga miliyoni eshatu. Ibyo n’ibindi bikorwa byatumye yinjiza arenga miliyari 18,1 z’amadolari.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .