00:00:00 IGIHE NETWORK KN KINYARWANDA EN ENGLISH FR FRANCAIS

Apple yashyize ku isoko MacBook Air nshya, inamurika iOS 16

Yanditswe na Umwali Zhuri
Kuya 7 June 2022 saa 09:00
Yasuwe :

Apple yashyize ku isoko mudasobwa nshya ya MacBook Air, nyuma y’imyaka icumi ubu bwoko bujya ku isoko ariko nta mpinduka zihariye bwakozweho. Ubu, imiterere y’izi mudasobwa yahindutse, zinatangwa mu mabara atandukanye kandi zihuta kurusha izari zisanzwe.

Ku wa Mbere nibwo Apple yatangaje ibikoresho byayo bishya byashyizwe ku isoko.

MacBook Air, ifite ubugari bwa santimetero 33. Ifite RAM ya GB 24 n’ububiko bushobora kongerwa bukagera kuri Terabyte ebyiri hanyuma kandi batiri yayo ikaba yamara amasaha 20 itarashiramo umuriro.

RAM yayo ihera kuri GB 16 ariko ku giciro hiyongeraho amadolari 200$ kugira ngo bagushyiriremo iyisumbuyeho washaka iya GB 24 ukishyira amadolari 400$ y’inyongera.

Ifite Touch Bar yari isanzwe, ku buryo nko kongera urumuri, kugabanya amajwi n’ibindi umuntu abona aho abikorera byoroshye.

Izatangira kujya ku isoko mu kwezi gutaha aho ubu umuntu ushaka kuyitumiza yishyura guhera ku 1.299$.

Ntabwo ifite umubyimba munini kuko inanutse ku kigero cya 11mm kandi ikaba ipima ikilo kimwe n’amagarama 22.

Mu gutunganya amashusho, yihuta cyane ku kigero cya 38% ugereranyije n’izari zisanzwe.

Mu yandi mavugurura Apple yakoze, harimo ajyanye n’amasaha yayo aho ubu ikoranabuhanga rifasha umuntu kumenya neza uburebure bw’ahantu yirutse ryanogejwe, ikamwibutsa ibintu birimo no kwitekerezaho.

Apple yanashyize hanze iOS 16, ihesha umuntu ubushobozi bwo kuba yasubiramo ubutumwa yohereje cyangwa se kuba yagarura ubwo yari yohereje yibeshye.

Umuntu kandi azaba afite ubushobozi bwo kugaragaza muri telefoni ye ubutumwa atarasoma, bugaherera ukwabwo.

iOS 16 izahesha uyikoresha amahitamo yo kuba yahindura amashusho agaragara imbere muri telefoni ye, cyo kimwe no guhindura uburyo ibintu bigaragara muri screen byanditse [umukono byanditsemo] cyangwa akaba yakongeramo indangaminsi n’ibindi.

Abantu batunze iPhone 6S, iPhone 7, iPhone SE ntabwo bazajya babasha gushyira iOS 16 muri telefoni zabo. Utunze iPhone 8 kuzamura, ni we wemerewe gushyira iOS 16 muri telefoni ye.

Izi mudasobwa zifite ubushobozi bwo kumara amasaha 20 zikora zitarashiramo umuriro
MacBook Air nshya izajya ku isoko mu kwezi gutaha, ubu igiciro cyayo gihera ku 1.299$
iOS 16 ihesha umuntu kuba yahindura ibigaragara muri screen ya telephone ye
Apple Watch zongerewemo ikoranabuhanga rifasha umuntu kwita ku buzima bwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .