Amasendika y’abakozi mu Rwanda arigira hamwe uburyo ikoranabuhanga ryafata iya mbere mu kwihutisha no kunoza umurimo. Ibi birakorwa ku bufatanye ku bufatanye bw’Ihuriro mpuzamahanga rya sendika (ITUC: International Trade Union Confederation) n’Ihuriro ry’amasendika y’abakozi mu Rwanda (CESTRAR: Centrale des Syndicats des Travailleurs au Rwanda), baha abakozi amasomo y’ikarishyabwenge ku mikoreshereje y’ikoranabuhanga mu kazi.
Abahagarariye amasendika y’abakozi mu Rwanda, barahabwa amasomo y’ikarishyabwenge ku mikoreshereze y’ikoranabuhanga, mu rwego rwo kwihutisha akazi, gukora umurimo unoze no kujyana n’icyerekezo cy’ikinyagihumbi. Abitabiriye ayo masomo bishimira ko hari byinshi bungutse bigiye kubafasha mu buzima bwa buri munsi.
Manzi Eric, Umunyamabanga mukuru wa CESTRAR mu kiganiro na IGIHE yadutangarije ko aya masomo y’ikarishyabwenge bayateguye mu rwego rwo gushishikariza abakozi gukoresha ikoranabuhanga. Agira ati “Turakangurira abakozi gukoresha ikoranabuhanga, ikindi kandi tugomba gufatanya twese muri politiki y’u Rwanda yo guteza imbere ikoranabuhanga. Gukora ibi byaturutse ku nama mpuzamahanga yabereye i Dubai mu 2012, yahuje imiryango itari iya Leta n’amasendika y’abakozi, higwa uruhare bagira mu gushyiraho politiki y’ikoranabuhanga.”
Akomeza atangaza ko ikoranabuhanga rifite uruhare rukomeye mu iterambere ry’igihugu n’imibereho myiza y’abaturage, abahagariye abakozi ndetse banaharanira imibereho myiza yabo, batagombye gusigara inyuma kuko abakozi ari bog ice kinini gitanga umusaruro. Ati “Twahuje abikorera ndetse n’abahagarariye Leta, kugira ngo turebere hamwe uburyo ikoranabuhanga ryagira ingaruka nziza ku mibereho y’abakozi n’abaturage bose muri rusange.
Dusenge Emmanuel, ushinzwe ibikorwaremezo by’ikoranabuhanga muri Minisiteri y’urubyiruko n’ikoranabuhanga mu isakazabumenyi (MYICT), atangaza ko Sendika zifite uruhare runini mu guhuza abakozi, kandi bafite uruhare runini mu guteza imbere ikoranabuhanga. Agira ati “Sosiyete sivile ifite uruhare runini muri politiki y’ikoranabuhanga rinogeye Abanyarwanda. Ikoranabuhanga mu Rwanda rigeze ahantu hashimishije, kuko hagaragara impinduka mu buzima bwa buri munsi.”
Tim Noonan, Umuyobozi ushinzwe itumanaho muri ITUC, mu kiganiro na iGIHE yadutangarije ko ashimishijwe cyane n’intera ndetse n’umuvuduko u Rwanda ruriho mu guteza imbere ikoranabuhanga. Agira ati “Mu bihugu byateye imbere, abakozi bakangukiye ikoranabuhanga mu gihe ubundi bari barasigaye inyuma. Ugereranyije n’ibindi bihugu byo muri Afurika, u Rwanda rurihuta cyane mu ikoranabuhanga. Abakozi rero bagombye kugira uruhare mu gutegura no gushyira mu bikorwa politiki y’ikoranabuhanga, kuko ari ryo rihindura byinshi kandi mu ngeri zose.”
Cyubahiro Christophe, uhagarariye sendika y’abakozi bo mu mahoteli, utubari n’amaresitora, atangaza ko hari byinshi ikoranabuhanga rifasha mu kazi kabo. Agira ati “Hari intambwe urwego dukoreramo rwateye rubikesheje ikoranabuhanga. Byatumye akazi kihuta cyane kandi karushaho kunoga. Mu rwego rw’itumanaho, serivisi zihuse n’ibindi. Turaharanira ko rishyirwamo imbaraga rikagera ku bakozi bose.”
Hitezwe ko aya masomo karishyabwenge hari isomo asigira abayakurikiye, kandi imyanzuro ivamo ikazafasha politiki y’ikoranabuhanga mu Rwanda.
TANGA IGITEKEREZO