Truecaller yagaragaje inyota yo gukorana n’ibigo byo mu Rwanda

Yanditswe na Mukaneza M.Ange
Kuya 19 Gashyantare 2019 saa 08:20
Yasuwe :
0 0

Sosiyete Truecaller, ifite porogaramu igufashe kumenya imyirondoro y’umuntu uguhamagaye nubwo waba udasanganywe nimero ye ya telefoni, yatangaje ko yifuza gukorana n’ibigo bitandukanye mu Rwanda.

Porogaramu ya Truecaller ikoreshwa n’abasaga miliyoni 200 ku Isi, muri bo abarenga miliyoni 50 bari muri Afurika. Nubwo yatangiye ikoreshwa n’abafite telefoni za ‘smartphone’ n’abatunze izisanzwe bashobora kuyikoresha.

Mu kiganiro yagiranye na Business Times ubwo yari yitabiriye Inama ya Africa Tech Summit yabaye mu Cyumweru gishize, Umuyobozi ushinzwe iterambere ry’ubucuruzi n’ubufatanye muri Truecaller Africa, Zakaria Abdulkadir Hersi, yagaragaje inyota yo kuba bifuza gutangira gukorana n’ibigo byo mu Rwanda.

Yagaragaje ko ku munsi Truecaller ikoreshwa n’abasaga miliyoni 100, bituma iza mu bigo by’ikoranabuhanga bikomeye ku Isi, bakaba bifuza kwinjira cyane mu isoko rya Afurika aho abantu bitabira gukoresha telefoni bahamagara kurusha ibindi bice by’Isi.

Ati “ Kuba abantu bakunda guhamagara hari abandi baba babishakamo izindi nyungu. Niyo mpamvu nko muri Kenya gusa dukumira ubutumwa busaga miliyoni 14 n’abahamagara basaga miliyoni enye buri kwezi”.

Zakaria yagaragaje ko impamvu abo bakorana nabo biyongera aho kugabanuka ari uko kuva batangira mu myaka ishize, bagenda bahanga udushya bakurikije ibikenewe.

Ati “ Tugitangira twatangaga serivisi yo kumenya imyirondoro y’uguhamagaye, nyuma ariko tuza kumenya ko no mu butumwa bugufi harimo ikibazo cyo kuba haza ubutumwa bwinshi umuntu atifuza”.

Uretse kuba Truecaller ibasha kugufasha kumenya abaguhamagaye, iguha n’ububasha bwo gukumira abo utifuza ko baguhamagara cyangwa bakoherereza ubutumwa.

Zakaria yagaragaje ko kuri ubu bari kwiga kuri serivisi bashobora gutanga mu Rwanda zitandukanye n’izirebana no kumenya abaguhamagaye kuko basanze atari byo Abanyarwanda bakeneye cyane.

Uyu mugabo ufite ubunararibonye mu ikoranabuhanga yanagarutse ku birebana no kuba byinshi mu bigo bihomba bitararenga umutaru, agaragaza ko ahanini ibi bituruka ku kuba benshi bazana ibisubizo bivuye ahandi bagashaka kubishyira mu bikorwa uko bimeze, birengagije ko uduce dutandukanye.

Ati “ Kugira ngo ubashe gutera imbere muri Afurika y’Uburasirazuba ntabwo ugomba kujya kuzana iby’ahandi ngo ushake kubishyira mu bikorwa uko byakabaye. Ugomba kubitegura mu buryo bugendanye n’ibikenewe mu karere”.

Zakaria yavuze ko kugira ngo batere intambwe, bave ku mugabane w’u Burayi ibikorwa byabo bigere no muri Afurika byabasabye gutega amatwi abakoresha Truecaller ndetse bashyira imbaraga mu bushakashatsi.

Truecaller ifite intego yo ukugira abayikoresha nibura miliyari enye, aho bazibanda cyane ku mugabane wa Afurika ahari isoko rikomeza kwaguka n’ikoranabuhanga rikaba rikomeje kwihuta.

Truecaller ifite ikoranabuhanga rigufasha kumenya abaguhamagaye cyangwa abakoherereza ubutumwa no gukumira abo udashaka kabone nubwo waba udafite nimero zabo
Umuyobozi ushinzwe iterambere ry’ubucuruzi n’ubufatanye muri Truecaller Africa, Zakaria Abdulkadir Hersi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza