Sobanukirwa uko internet ya 5G izahindura ubuzima bwa muntu

Yanditswe na Umwali Zhuri
Kuya 2 Kamena 2020 saa 04:53
Yasuwe :
0 0

Umunsi ku wundi, ikoranabuhanga rikomeje guhindura ubuzima bw’abatuye Isi, ndetse ubu umuyoboro wa internet yihuta ya 5G niwo uhanzwe amaso nk’ugiye kugira uruhare rukomeye mu guhindura ubuzima bw’abantu.

Ni umuyoboro ugereranywa nk’intambwe nshya ndetse na none nk’itafari rizaganisha ku rugendo ruhindura buri kimwe, uhereye ku buvuzi bwifashishije ikoranabuhanga nk’aho umuganga ashobora kubaga umuntu kandi batari kumwe, ikoranabuhanga mu modoka, mu buzima busanzwe ku buryo waba uri ku kazi ugacana imbabura wasize mu rugo n’ibindi bizwi nka Internet of Things.

Ni byinshi, ariko wakwibaza impamvu abantu muri iki gihe bashishikariye 5G! Ni iki cyayo cyiza gitandukanye n’ibisanzwe cyangwa se ni ibiki izahindura mu buzima bwa muntu?

Mu Kinyarwanda cyoroshye, 5G wayisobanura nk’icyiciro cya gatanu cy’ikoranabuhanga ryihutisha amakuru kurusha ibisanzwe. Gusa iyo tuvuze kwihuta bisobanurwa kwinshi. Nko muri Amerika, sosiyete y’itumanaho ya Verizon iherutse gukora igerageza kuri 5G, isanga ishobora kwihuta nk’igihe umuntu amanura ibintu (download), akabona gigabits 1.0 ku isegonda (1.0 Gbps).

Ni ukuvuga ngo ni nk’inshuro ziri hagati y’icumi na 100 z’umuvuduko usanzwe, ndetse ni umuvuduko mwinshi utanabona no ku miyoboro ya fibre optique, bisobanuye ko uyifashishije ushobora kumanura kuri internet ibintu amagana ku muvuduko wo hejuru.

Ntabwo ari umuvuduko gusa. Niba uri kuri internet ugakanda ku kintu runaka ugiye gusoma, hari umwanya bifata kugira ngo rwa rupapuro wakanzeho rufunguke (mu cyongereza bizwi nka Latency). Ubusanzwe bishobora kumara milliseconde 20 [mu isegonda rimwe harimo milliseconde 1000) kugira ngo rwa rupapuro rufunguke, ariko kuri 5G ni munsi ya milliseconde imwe. Bifate nk’aho ari nk’igihe bitwara kugira ngo telefoni yawe itere umurabyo mu gihe uri gufotora.

Ikindi cyiza cyayo ni uko yo ifite ubushobozi bwo kuba wacomekaho ibikoresho byinshi by’ikoranabuhanga kurusha ibyo washyira kuri internet isanzwe, ukayifashisha mu rugo wenda ucometseho firigo yawe ikaza kuguha amakuru ko ibintu birimo harimo ibyakonje cyane cyangwa se ibigiye kubora n’ibindi.

Wumvise ibyo ikora, uhita wibaza ku giciro cyayo. Ubu mu Rwanda ntabwo ihari wenda ku buryo twarebera ku bintu byo hafi yacu, ariko nko muri Leta Zunze Ubumwe za Amerika, sosiyete z’itumanaho ziri kwishyuza nibura amadolari 10 yiyongera ku yari asanzwe yishyurwa n’umuntu ku kwezi; uru ni urugero rwa Verizon.

Kugira ngo ukoreshe 5G bisaba ko uba ufite igikoresho kiyakira, ntabwo ari ikibonetse cyose. Urugero nka telefoni, nyinshi ziri gusohoka zigezweho zakira 5G, kimwe n’uko hamaze iminsi hasohoka izakira 4G. Umwaka ushize Sumsung yashyize ku isoko Samsung Galaxy S10 ishobora kwakira 5G.

Ikindi ni uko telefoni nyinshi zashyizwe ku isoko mu ntangiriro z’umwaka ushize usanga zikoresha ikoranabuhanga rizifasha kwakira no gutanga amakuru ryakozwe na Qualcomm, [Snapdragon X50], rizibashisha no kwakira 5G.

Uyu mwaka byitezwe ko hazashyirwa ku isoko telefoni nyinshi zakira 5G kurusha ushize.

Internet ya 5G yitezweho guhindura byinshi mu mikorere ya muntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .