Smartphone zishobora guhenda muri EAC mu mezi atandatu ya 2020

Yanditswe na Rosine Ingabire
Kuya 3 Mata 2020 saa 12:18
Yasuwe :
0 0

Isoko rya telefone zigezweho muri Afurika y’Iburasirazuba (EAC) biteganyijwe ko rizagabanyuka ku kigero cya 12% mu mezi atatu ya mbere ya 2020 na 3% mu mezi atatu azakurikiraho.

Ibyo bivuze ko telefone za smartphone zinjira mu karere zizaba nke, igiciro cyazo kikazamuka kubera ibibazo biri mu gutumiza ibikoresho by’ikoranabuhanga bitewe n’icyorezo cya coronavirus.

Biteganyijwe ko isoko rizakomeza kugenda nabi mu mezi atandatu ya 2020, ibintu bizasubira mu buryo mu gihembwe cya gatatu n’icya Kane by’umwaka nabwo nihagira igikorwa ngo icyorezo gihagarikwe, ubucuruzi busubire uko bwahoze.

Raporo y’ikigo cy’ubushakashatsi, International Data Corporation (IDC) igaragaza ko umubare wa telefone zigezweho zizinjira muri EAC uyu mwaka uzagabanukaho 1.6 % ugereranyije n’izinjiye umwaka ushize.

Ugereranyije na telefone zigezweho zinjiye muri Kenya umwaka ushize, mu mezi atandatu ya mbere ya 2020 zizagabanukaho 10 % kandi ibiciro byiyongere.

Umwaka ushize muri Kenya, Uganda na Tanzania telefone zigezweho zinjiye muri ibyo bihugu zari miliyoni 10.7, zivuye kuri telefone miliyoni 9.4 zinjiye mu 2018.

Ibihugu byo mu karere bifite isoko rito rya telefone, raporo ivuga ko bizagerwaho n’ingaruka nyinshi kuko ibigo bicuruza n’ibiranguza telefone bizaba bishishikajwe n’amasoko manini nka Kenya ari naho bashobora kohereza telefone nyinshi mu gihe cya coronavirus.

Uretse telefone kandi n’ibindi byuma by’ikoranabuhanga nka televiziyo, firigo n’bindi bizahenda kuko abari bafite ububiko bwabyo mbere y’uko icyorezo cya coronavirus gikwirakwira, ubu mu bubiko bigiye gushira. Ikindi ni uko muri Mutarama mu Bushinwa bari mu birori byo kwizihiza umwaka mushya ku buryo inganda zitakoraga, hiyongereyeho n’icyorezo cya coronavirus cyacaga ibintu muri icyo gihugu.

Raporo igaragaza ko telefone zicuruzwa muri Afurika y’Iburasirazuba ziganjemo iz’inganda zo mu Bushinwa nka Tecno, Itel, Infinix, Xiaomi na Huawei kuko bigize 85 % bya telefone zose zicuruzwa mu karere. Samsung na Nokia ni ubundi bwoko bwa telefone zicuruzwa muri EAC.

Bagaragaza ko coronavirus ishobora no kugira ingaruka ku gushyira hanze telefone nshya kuko hari bimwe mu bikoresho byifashishwa mu gukora telefone bitari kubasha kugera ku nganda kuko biva hanze y’u Bushinwa.

Ibiciro bya telefone zigezweho bishobora kuzamuka mu mezi atandatu ya 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .