Babiri barangije muri IPRC-Kigali bakoze ikoranabuhanga rifata amashusho y’ushobora kwibwa rikanayamwoherereza

Yanditswe na Evariste Nsengimana
Kuya 21 Werurwe 2019 saa 06:09
Yasuwe :
0 0

Niyibizi Benjamin na Ngizwenayo Cyprien, basoje amasomo mu Ishuri Rikuru ry’u Rwanda ry’Imyuga n’Ubumenyingiro (Rwanda Polytechnic), ishami rya Kigali bakoze ikoranabuhanga ritamenyerewe, ryihariye mu gucunga umutekano w’ibintu no kumenyesha nyirabyo igihe hari ugiye kubivogera.

Abo banyeshuri bari mu 2088 basojemo amasomo ashamikiye ku ikoranabuhanga, ubuhinzi, ubworozi, ubukanishi, ibidukikije, guhanga udushya n’ibindi.

Bahawe impamyabushobozi zo ku rwego rwa Diploma (zigaragaza ko barangije amasomo y’umwaka) na Advanced Diploma (Bize imyaka itatu ya Kaminuza) kuri uyu wa 21 Werurwe 2019 kuri Stade ya IPRC Kigali.

Nyuma yo guhembwa mudasobwa kubera uwo mushinga w’udushya bakoze, Niyibizi na Ngizwenayo babwiye IGIHE ko ufite ikoranabuhanga rifata amashusho y’ibibera aho ryashyizwe nko ku nzu, rikayoherereza nyirayo kuri email no kuri telefone, yabona byateza ikibazo akaba yabimenyesha inzego z’umutekano.

Niyibizi yavuze ko igitekerezo cy’uwo mushinga cyabajemo nyuma y’uko uwo bigana yibwe telefone ariko bakagira imbogamizi zo gushakisha uwayibye mu mashusho maremare yafashwe na Camera zimenyerewe mu gucunga umutekano.

Ati “Twashatse icyo twakora kikadufasha ku buryo umuntu asize ikintu cy’agaciro ahantu, ugerageje kuhajya atabyemerewe, camera igafata amashusho ye ikayohereza kuri email ya nyirayo, akanabona ubutumwa kuri telefone bumumenyesha.”

Ngizwenayo yavuze ko imikorere y’ikoranabuhanga ryabo itandukanye n’iya camera zimenyerewe zicunga umutekano kuko zo ari ugufata amashusho gusa ntizitange amakuru y’ibibaye ako kanya ariko iryabo rikaba rihita riyatanga.

Ati “Umuntu azajya acunga ibintu byiwe aho ari hose. Twakoresheje ikoranabuhanga ritegeka camera iyo hari ikibaye, rigahita rifata amashusho rikayohereza kuri email. Iyo nyirayo [email] atari ku murongo, agahita abona ubutumwa [kuri telefone] bumumenyesha ko hari ikintu kibaye.”

Uyu mushinga bawutangiye umwaka ushize, ubatwara amadolari 150 bahawe n’ishuri ryabo ariko ngo bagiye kuwagura batangire kuwubyaza amafaranga.

Minisitiri w’Uburezi, Dr. Eugène Mutimura, yabwiye abanyeshuri basoje amasomo ko ubumenyi bahakuye bagomba kubwifashisha mu guteza imbere igihugu binyuze mu guhanga imirimo no guteza imbere gahunda y’ibikorerwa mu Rwanda.

Ni ku nshuro ya Kabiri Ishuri Rikuru ry’u Rwanda ry’Imyuga n’Ubumenyingiro rihaye impamyabumenyi abiga mu mashami yaryo arimo IPRC Kigali, IPRC Huye, IPRC Karongi, IPRC Ngoma, IPRC Musanze, IPRC Kitabi, IPRC Tumba na IPRC Gishari nyuma y’imfura 1882 ryazihaye umwaka ushize.

Abanyeshuri 2088 bahawe impamyabushobozi mu ishuri rikuru ry'imyuga n'ubumenyingiro
Abanyeshuri bahize abandi mu masomo atandukanye bahembwe
Abanyeshuri babiri barangije IPRC-Kigali bakoze ikoranabuhanga rifata amashusho y’ushobora kwibwa rikanayamwoherereza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza